01/09/2026
Lammileen Biyya Alaa Itoophiyaa Keessatti Mana Jireenyaa Ittiin Bitatan Akkaataa Haaraa Murteessuuf Qajeelfamni Haaraan Ba’e
• Akka qajeelfama kanaatti, lammileen biyya alaa manneen jireenyaa mootummaa irraa deeggarsa kallattiin ijaaraman (Kondominiyeemii) bitatanii abbaa qabeenyaa ta’uu hin danda’an.
Ministeerri Magaalaa fi Bu’uuraalee Misoomaa, lammileen biyya alaa Itoophiyaa keessatti mana jireenyaa ittiin bitachuu danda’an haala bal’inaan murteessuuf Qajeelfama Lakkoofsa 1147/2018 baaseera.
Qajeelfamni kun labsii lakkoofsa 1388/2017, kan lammileen biyya alaa Itoophiyaa keessatti mana jireenyaa ittiin bitatan sirreessuuf ba’e keessatti dhimmoota waliigalaan kaa’aman adda baasuun, ulaagaalee, daangaa fi dhorkaa lammileen biyya alaa mana jireenyaa bitachuuf guutuu qaban bal’inaan kaa’uuf kan ba’e dha.
Akka hiika qajeelfama kanaatti, lammii biyya alaa jechuun nama lammummaa Itoophiyaa hin qabne ykn lammummaa biyya biraa qabu jechuudha; garuu nama dhalootaan Itoophiyaa ta’ee lammii biyya alaa ta’e hin dabalatu.
Ulaagaalee guutamuu qaban
Lammii biyya alaa kamiyyuu hayyama mana jireenyaa bitachuuf Ministeericha irraa argachuuf ulaagaalee armaan gadii guutuu qaba:
* Paaspoortii fi sanada imalaa seera qabeessa ta’e dhiyeessuu;
* Viizaa seera qabeessa ta’e qabaachuu; ykn yoo Itoophiyaa keessa jiraate, hayyama jireenyaa dhaabbataa seera qabeessa ta’e qabaachuu;
* Ragaa biyya jiraatu irraa kennamu kan yakka irraa bilisa ta’uu isaa mirkaneessu dhiyeessuu;
* Ragaa maallaqa mana bitachuuf oolu baankii keessatti galchuu isaa mirkaneessu dhiyeessuu;
* Yoo invastara biyya alaa ta’e, invastimantii isaa keessatti yoo xiqqaate Doolaara Ameerikaa 150,000 qabaachuu isaa kan agarsiisu hayyama invastimantii fi ragaa barreeffamaa dhiyeessuu.
Maallaqa xiqqaa barbaachisu
Qajeelfamichi, bakka mana jireenyaa bitamu irratti hundaa’uun, lammii biyya alaa irraa maallaqa xiqqaa meeqa akka barbaadu bal’inaan kaa’eera:
* Finfinnee fi Bulchiinsa Magaalaa Shaggar: yoo xiqqaate USD 150,000;
* Oromiyaa (Shaggar malee), Amaaraa, Tigraay, Sidaamaa, Itoophiyaa Giddugaleessaa, Itoophiyaa Kibbaa, Itoophiyaa Kibba Lixaa, Somaalee, Hararii fi Bulchiinsa Dirree Dhawaa: USD 120,000;
* Affaar, Beenishaangul Gumuz fi Gaambeellaa: yoo xiqqaate USD 100,000.
Dabalataan, lammii biyya alaa tokko Itoophiyaa keessatti mana jireenyaa tokko qofa qabaachuu danda’a.
Maallaqni baankii keessatti akkamitti kaa’ama?
Lammii biyya alaa mana jireenyaa bitachuuf maallaqa biyya alaa baankii filate keessatti galchuuf, jalqaba Ministeericha irraa xalayaa hayyamaa argachuu qaba.
Baankiinis maallaqa biyya alaa dhiyaate sana gatii jijjiirraa guyyaa sanaatiin gara Birrii Itoophiyaatti jijjiiree, maqaa nama sanaatiin herrega baankii cufaa keessatti ni kaa’a.
Maallaqni herrega cufaa keessa kaa’ame kun kan gadhiifamu yeroo namni sun mana bitatu ykn lafa liizii irratti argatu qofa. Kunis Ministeerichi xalayaa maallaqicha akka gadhiifamu hayyamu baankiif erga dhiyeessee booda, baankiin akkaataa adeemsa isaa hordofuun maallaqicha ni gadhiisa.
Namoonni mana bitachuu hin dandeenye
Namni yakka shororkeessummaa, daldala namaa, daldala qorichoota sammuu namaa hadoochan, maallaqa dhiqachuu, malaammaltummaa cimaa, yakka saayibarii fi yakkoota ciccimoo biroo irratti shakkame ykn itti murtaa’e, mana jireenyaa bitatee abbaa qabeenyaa ta’uu hin danda’u.
Akkasumas, manneen:
* Mootummaan deeggarsa kallattii kenneen ijaaraman (Kondominiyeemii);
* Kaayyoo bu’aa hin dandeenyeef maallaqa mootummaa ykn maallaqa uummata irraa walitti qabameen ijaaraman;
* Mootummaa, invastara ykn dhaabbata mootummaa hin taaneen deeggarsi isaanii taasifamee ijaaraman;
* Waldaa hojii gamtaa (Cooperative) tiin ijaaraman;
lammileen biyya alaa abbummaan qabaachuu hin danda’an.
Kaffaltii fi yeroo hayyamaa
Hayyama abbummaa mana jireenyaa argachuuf USD 50, gatii jijjiirraa guyyaa sanaatiin shallagamee kaffalamuu qaba.
Hayyamni kennamu waggaa tokko qofa kan tajaajilu ta’a.
Namni sun yeroo waggaa tokko keessatti mana bitachuu ykn ijaaruu yoo hin dandeenye, sababni isaa waan humna isaa ol ta’e yoo ta’e, hayyamni isaa waggaa tokko dabalataaf haaromfamuu danda’a.
Garuu hayyama isaa yoo hin fayyadamne, hayyamicha gara Ministeerichaatti deebisuu qaba.
Adabbii
Lammii biyya alaa mana jireenyaa isaa kaayyoo hin hayyamamne ykn seeraan alaa ta’eef fayyadame, USD 1,000 hanga USD 3,000 adabamuu danda’a.
Namni hayyama malee mana jireenyaa bitatee argame immoo USD 2,000 hanga USD 5,000 adabamuu danda’a.
Namni gocha seeraan alaa ta’uu isaa beekee nama biraa gargaaru ykn waliin hojjetu immoo Birrii Itoophiyaa 30,000 hanga 50,000 adabamuu danda’a.
Finfinnee press
Hagayya 5, 2018 E.C.
