16/08/2026
አርሰናል ከ ማንቸስተር ሲቲ - የኮሚዩኒቲ ሺልድ አሸናፊን የሚለየው ፍልሚያ ከጥቂት ደቂቃዎች በኋላ ይጀምራል
የ2026 የኢንግሊዝ ኮሚዩኒቲ ሺልድ ዓመታዊ የዋንጫ ጨዋታ ዛሬ ይደረጋል። የኢንግሊዝ እግር ኳስ የውድድር ዘመን መክፈቻ ተደርጎ የሚወሰደው ይህ መርሐ-ግብር፣ የቀደመውን የውድድር ዘመን የፕሪሚየር ሊግ ሻምፒዮን አርሰናልን ከኤፍ ኤ ካፕ አሸናፊው ማንቸስተር ሲቲ አገናኝቷል።
ይህ ታሪካዊ ጨዋታ ከ20 ዓመታት በኋላ ለመጀመሪያ ጊዜ ከለንደን ውጭ በዌልስ ካርዲፍ በሚገኘውና 74,500 ተመልካቾችን በሚይዘው ፕሪንሲፓሊቲ ስታዲየም ይካሄዳል።
የፕሪሚየር ሊጉ ሻምፒዮን የሚኬል አርቴታው አርሰናል፣ በቅድመ ውድድር ዘመን ዝግጅት ወቅት ከጂሮና እና ኤምኬ ዶንስ ጋር ያደረጋቸውን ጨዋታዎች በድል ቢያጠናቅቅም፣ ከሪያል ቤቲስና ቦሩሲያ ዶርትሙንድ ጋር ባደረጋቸው ጨዋታዎች ሽንፈት ገጥሞታል።
ሆኖም ባለፈው ረቡዕ ከጣሊያኑ ክለብ ኮሞ ጋር ባደረገው ጨዋታ በመለያ ምት በማሸነፍ ለዚህ የዋንጫ ፍልሚያ መልካም ስንቅ ሰንቋል።
የአርሰናሉ የተከላካይ ስፍራ ተጫዋች የሆነው ዊሊያም ሳሊባ በጉዳት ምክንያት ከጨዋታው ውጪ መሆኑ ለመድፈኞቹ ስጋት ሆኗል።
ለማንቸስተር ሲቲ ይህ ጨዋታ የፔፕ ጋርዲዮላ ስኬታማ ዘመን አብቅቶ ከአዲሱ አሰልጣኝ ኤንዞ ማሬስካ ጋር የአዲስ ምዕራፍ መጀመሪያ ነው።
ሲቲ በቅድመ ውድድር ዘመን የወዳጅነት ጨዋታዎች ከአትሌቲኮ ማድሪድ እና ከኬ ሊግ ጋር ባደረጋቸው ጨዋታዎች የ3 ለ 1 ተከታታይ ድል አስመዝግቧል።
በሁለቱ ቡድኖች የቅርብ ጊዜ ግንኙነት ማንቸስተር ሲቲ የበላይነት አለው። ካለፉት አምስት ጨዋታዎች ሲቲ ሁለት ጊዜ ሲያሸንፍ፣ አርሰናል አንድ ጊዜ ባለ ድል ሆኗል። በተቀሩት ሁለት ጨዋታዎች አቻ ተለያይተዋል፡፡
የኮሚዩኒቲ ሺልድ ዋንጫን አርሰናል 17 ጊዜ፣ ማንቸስተር ሲቲ ደግሞ 7 ጊዜ አንስተዋል። በ2023 አርሰናል ሲቲን በመለያ ምት አሸንፎ ዋንጫውን ማንሳቱ የቅርብ ጊዜ ትዝታ ነው።
