26/10/2015
Galata Qulqulluu.
Nuyi Oromoo dhaa Ilmaan Oromtichaa
Maddi keenya fagoo burqaan keenya bal’aa
Hortee warra Kuushii warra sanyii jabaa
Warra dur ganamaa warra bara dheeraa.
Nuyi dhiphaa hin beeknu uumamuma keenyaan
Qubsumaan beekumsaan adaadhaan kalaqaan
Maaltu nutti hanqate kan badhaane Waaqaan.
Yoom rakkanee beekna fedhii jiruu keenyaaf
Jiidhaan marfamneerra mirgaa fi bitaadhaan
Waaqni uumaa keenyas yoom nutti waakkataa
Bara darbaa dhufu jidhaan nu badhaasaa
Ya Waaq galata kee Waaqa uumaa Oromoo
Waaqa garaa taliilaa taliila garaa leemmoo
Kunoo galata kee baranas dhufneerraa
Booruu gannaa baanee ifa argineerraa
Warqee moo meetii dha maaluma siif galchinaa
Maaltuu gatii baasaa maalumatu si quufsaa.
Lafa keessaa qotne albuuda gatii jabaa
Bocnee miidhagsinee isaan siif kaffalluu?
Yookimmoo horii comaa dilbii fidnee qallu?
Waawuu, waawu waawuu waawuu
atoo nama mitii
Waan murta’aa qofaa waan xiqqoo namaa hin gootu
waan al takkoo qofa waan yeroon daangooftuu
waan hara’a nuuf goote borii ammo nuffitu
waan har’a dandeessee bori ammoo dadhabdu
waan har’a jaalatte bori ammoo jibbituu
waan tokkoof kennitee isa kaan dhorgattuu
Isa tokkoof toltee isa kaanitti hammaattu.
Yaa uumaa garaa garbaa atoo hundaaf walqixaa
Keennaan kees waakkii hin qabu daangaa malee bal’aa dha.
Qoodaaf waakkii malee qilleensi atu nuuf laattu
Nagaa guyyaa fi halkan isa ittiin nu tiksitu
Ciifne akka boqonnu boqonnee akka dammaqnu
Teenyee akka kaanuu kaanee akka dhabbannu
Baanee akka gallu gallee akka baanu
Qootne akka facaafnu facaafnee akka hammannu
Haammannee akka dhahannu dhahannee akka galchannuu
Galchannee akka nyaannu nyaannee akka jabaannu
Jabaannee akka jiraannu jiraannee akka bara ceenu
Bara ceenee ceenee maree mareedhaanii akka si galateeffannu
Kuni hundi kan biraas kan tarraa’ee hin dhumne
Gatii maaliin baafama galchaa maaliin guutamaa
Galata qulqulluu adii galata dhugaa arrabaa
Kanaan qofa siif baafma ya Waaq gurraacha garaa garbaa.
Eliyas Nagaraa
Barruu SEENAADAA
Sadaasa 26,2015
Finfinnee, Oromiyaa
