02/08/2025
⚜️Oolmaa fi Galgaleeffannaa Nama Tokkoo⚜️
⚜️Oolmaa fi Galgaleeffannaa Nama Tokkoo⚜️
[Barreeffamni] Kuni hanga ammaatti madda isaa kanan hin argatiin afaan faranjiitiin kan barreeffame muudannoo nama tokkoo obboleessi koo tokko naaf ergedha👇
➭Obboleessi tokko sagalee bilbila isaa balleessuu irraanfatee gara Mana Kiristiyaanaa seenee lallaba barata. Kana gidduutti bilbilli isaa ni iyya. Barsiisichi lallaba adda kutee ija isaatiin loleeni. Barumsicha booda, amantoonni lallaba waan jeeqeef itti dheekkamani. Tokko tokko immoo isa ilaalanii taajjabbiidhaan mataa isaanii sosochoosani. Haadha manaa isaa waliin gara manaa yeroo deemanis haati manaa isaa waa’ee kashalabbummaa isaa gorsa kennuu itti fufte. Qaaniin, saalfiin fii salphinni gadi fageenyaan akka isatti dhagahame fuulasaa irratti ni mul’ata ture. Sanbata sana booda miila isaa gara Mana Kiristiyaanaa kaasee hin beeku. Keessi isaa kan jeeqame namni kun, galgaluma sana gara mana dhugaatii qajeele. Sammuun isaa akkuma waliin dhahametti ture.
➭Bakka taa’etti tasa qaruuraan ittiin dhugaa ture kufee cabuudhaan dhugaatiinis naannoo isaatti faca’e. Namoonni dhugaatiin faca’ee isaan tuqe gara isaatti siquu jalqabani. Isatti iyyuu fi kaballaadhaan akka isa rukutan waan isatti beekameef dursee ija isaa junuunfate. Namoonni sun garuu cabaa qaruuraatiin miidhame yoo ta’e dhiphatanii isa gaafatani. Keessummeessaan dhufee kan isarratti dhangala’e akka gogsuuf haxooftuu kenneefi. Qulqulleessituun laficha qulqulleessite. Haati qabeenyaa manichaa “Homaa miti ni muudata; meeshaa kan hin cabsine eenyutu jira?” jettee dhugaatii biraa fichisiisteefi. Guyyaa sanaa jalqabee mana dhugaatii sanarraa hafee hin beeku.
➭Mana Kiristiyaanaa keessatti bilbila banaa gochuu fii sirna waaqeffannaa jeequun dogongora hamma mana qulqullummaa keessa kophee godhatanii seenuu gahudha. Mana Kiristiyaanaa mitii Embaasii illee bilbila kee ala keessee seenta. Balleessaa namichi sun balleesseef garuu jaalalaan kan isa dubbisu waan dhabeef bilbila isaa waliin baduu danda’eera. Manni Kiristiyaanaa bakka fayyinaati. Manni dhugaatii immoo daandii badiisaati. Seenaa nama kanaa keessatti garuu bakka fayyinaa namoota jiran caalaa bakka badiisaa namoonni jiran dogongora namichaatiif jaalala fooyya’aa agarsiisani. Altokko tokko amalli amantoota tokko tokkoo lubbuuwwan gara Si’oolitti arii’a.
➭Walii walii keenyaaf eegduu ta’uu ni dandeenya; addunyaa fayyisuuf waan dandeenyu haa goonu. Lubbuulee fayyisuurra lubbuu balleessuun baay’ee salphaadha. Amantoonni haa hafaniitii barsiisaan yeroo dheekkamu akkamitti ta’uu akka qabu qulqulluu Yohaannis Afaan Warqee yoo dubbatu “namni gorsu kan loluu fii jechisaa kan quuqu hin ta’iin; caalaatti garuu akka ogeessa madaa wal’aanuu gara laafinaan haa raawwatu” jedha. Fayyisaan addunyaa Kiristoos michuu cubbamootaa ture. Inni keessa eenyuutiyyuu jecha hamaadhaan hin cabsine. Nuti garuu namoota irratti yoo garaa jabaannu hammamtaa hin qabnu. Sababuma kanaan namoonni akka Niichee “Kiristiyaanni isa fannoo irratti du’e qofadha” jedhanii hanga nutti qoosutti gahaniiru.
Kitaabni garuu namni yeroo dogongoru yoo argine maal gochuu akka qabnu akkana jechuudhaan dubbata: “yaa obboloota, namni badii kamiin illee yoo argame, afuurawoo kan taatan isin nama akkana jiru afuura garraamummaatiin ol isa qabaa” Gal 6:1
[ : የግዮን ወንዝ በዲያቆን ሄኖክ ኃይሌ 2015 ዓ.ም ፤ ገጽ 172-174- የአንድ ሰው ውሎ እና አመሻሽ]
: Daanyee Darajjee (Dn)
Miidiyaa Sootiriyaa
Adoolessa 26, 2016
Finfinnee
Tajaajilichi kan hundaa waan ta'eef toorawwan miidiyaa Miidiyichaa gochuun, hiriyyoota keessan affeeruun tajaajilicha haa deeggarru!
Miidiyaa Sootiriyaa👇
➭YouTube►https://youtube.com/?si=VMAMZpRtucXIkMwg
➭Telegram Channel►https://t.me/Soteriamedia
➭page►https://www.facebook.com/soteriamedia21
