07/08/2026
Maqaa Abbaa kan Ilmaa kan Afuura Qulqulluu waaqa tokkoon ameen.
Hordoftoota amantaa Ortodoksii biyya keessaa fi guutuu addunyaarra jirtaniif
Kan nama jaallatuu fi dhala namaa fayyisuuf dubree Maariyaamii bultoo ilmasaa taasisuuf kan filate Waaqayyo Waaqni keenya baga sooma Filchataa kan bara 2018'n nu ga'e isin ga'e.
'Yoo na jaallattan abboommikoo eegaa.' (Wang.Yoh.14:15)
Jaalalli daandii hin mul'annee kan qaamonni jiraattota ta'an ittiin wal arganiidha.
Qaamonni jiraattota ta'an qaamasaanii guddaan bakka fi yeroo murtaa'aa keessatti wal arguu, dhimmoota waloosaaniifis waloon ni mari'atu, caalmaattis walitti dhihaatu.
Haata'u malee walitti dhufeenyi qaamolee jiraattotaa kun qaamaan, baakkaa fi yeroon kan daanga'e miti, jaalala afuuranis wal arganii walii galu. Jaalala afuuraan walii galuun kunis kan qaamaan wal arganirra kan caaludha.
Kanarraa ka'uun waaqayyoonis argachuu kan dandeenyu ija amantiin jaalaala afuuraan yoo taanedha.
Kana waan ta'eef duuka bu'aan qulqulluu Yohaannis ergaasaan 'Jaalaalaan kan jiraatu waaqayyo waliin jiraata, waaqayyos isa waliin jiraata' ( 1Yoh.4:16) jechuun nu barsiise.Kana jechuunis waaqayyo waliin jaalalaan yeroo wal agarru, inni nu waliin, nutis isa waliin haala itti jiraannu uumaa jechuudha.
Jaallattamtoota amantoota ijoollee afuuraa keenya
Gooftaan keenya 'Waaqayyo waaqa kee jaalladhu' jechuun laphee keenya guutuun raawwannee akka isa jaallannuu akkasumas hamma jaalaala ofii keenya jaallannuun walii walii keenyas akka jaallannu ajajuusaa ni beekna.
Mallattoon ibsituu safartuu madaallii jaallachuu keenyaas ajajasaa kabajuu fi eeguu akka ta'e 'Yoo na jaallattan abboommii koo eegaa' jechuun barsiiseera.
Gooftaa keenya jaallachuun, ajajasaa eguun ibsama erga ta'ee, ajajisaa maali kan jedhu ilaalun barbaachisaadha.
Ajajasaa waliigalaan kan ilaallu yoo ta'e waaqayyoo fi gartuu namaa hunda jaallachuun akka guduunfamuu innumti Gooftaan keenya nu hubachiiseera.
Keessattuu jaallalli gartuu namaa kan ta'e hunda ittiin jaallachuu qabnu akkuma olitti ibsame 'akka ofiikee jaallattutti nama kamuu jaalladhu' jedhamee ifatti taa'ee jira.
Gartuin nama hundaa namaa hundaa warreen kami? warra lubbuun jiranimoo warra du'an? firaa fi aantee ofiimoo gartuu nama kan ta'e hunda kan jedhus beekuu barbaachisa.
Gooftaan keenya sadarkaa kanatti adda baasee hin keenye.Maaliif jennaan warri du'anis haa ta'u warri lubbuun jiran isa biratti hunduu jiraattota waan ta'aniif gartuu namaa hunda jechuudha.
Kanaafis wal jaallachuu fi wal kabajuun keenya yeroo lubbuun jirru qofa osoo hin taane,isa boodaas bara baraan waan ta'eef gooftaannkeenya yeroo fi bakkaan adda baasee hin keenye.
Jaallatamtoota amantoota ijoollee afuuraa keenya
Hagayya 1 hanga 16 kan soomnu soomni haadha keenya qul/dubaroo Maariyaamii ka'umsa isaa ajaja fi jaalala waaqayyoodha.
Waaqayyo nama hunda, keessattuu immoo akka jaalalasaatti kan jiraatan qulqulloota akka kabajnu nu ajajeera.
Uumamtoota qulqulluu keessaa ammoo haati keenya qulqulleettii dubaroo Maariyaamii sadarkaa jalqabaarra jirti.
Kana waan ta'eefis gartuu uumamtootaa keessaa kabajasheen kan walqixxaatu waan hin jirreef hundarra caalsifnee ishee kabajna.
Manni kiristaanaa Ortodoksii sadarkaa kanatti kabaja haadha keenya qulqulleettii dubaroo Maariyaamiif qabdu kan ibsitu waaqayyoo fi warra waaqayyoon uffatan abboota keenya angafootarraa baratteeti.
Jaarraa 4ffaa keessa kan jiraatee fi qulqullichi beekaman qulqulluu abbaa Eefireem kabaja, qulqullinaa fi ol aantummaa qulqulleettii dubaroo Maariyaamii yeroo dubbatu 'Isheen Suuraafeliin ni caalti sadan qulqulluu Sillaasee keessaa isa tokkoof bultoo taatetihoo' jechuun nu barsiiseera.
Kana waan ta'eefis sooma yaadannoo maqaasheen soomnu kana keessa dubroo Maariyaamiin sadarkaa kanatti yeroo kabajnu ajaja waaqayyoo ni eegna, ajajasaa eeguu keenyaanimmoo waaqayyoon jaallachuu keenya mirkaneessina.
Nuti qulqulleettii dubaroo Maariyaamiin akka jaallannuuf 'haadha keessan' jedhee akkuma ajaje, isheenis nu jaallachuuf 'ijoollee kee' jedhamtee ajajamteetti waan ta'eef nuuf kadhatti.
Kadhannasheenis gidiraarraa nu oolchiti.
Walumaa galatti walitti dhufeenyi waaqayyo, qulqullootaa fi nuyi gidduu jiru ajajaa fi jaalaalan mana kiristaanaa ishee addunyaa mul'attu kana keessa jirtu biratti kan walitti hidhameedha.
Kana waan ta'eef waktii Subaa'ee(Torboo) fi sooma Filchataa kana keessa kanneen beela'an nyaachisuun kanneen daaranis daara baasuun, kanneen wal lolan walitti araarsuun, kanneen hidhamanii fi dhukubsatan gaafachuun akkasumas lubbuu keenyaaf gaabbii galuu fi foonii fi dhiiga gooftaa fudhachuun tibba soomaa kana dabarsuu qabna.
Dhumarrattis
Biyya keenyattis ta'e guutuu addunyaa hundatti yaaddoo guddaa fi waraana uumama balleessu waaqayyo aangoo fi ogummaa wummaasaan akka nurraa dhaabuuf laphee qulqulluu fi gad of qabummaan taanee yeroo soomaa fi subaa'ee kana keessa waaqayyoon akka gaafannu adaraa waliin ergaa abbummaa keenyaa maqaa Waaqayyoon dabarsina.
