22/09/2026
🔴ምን ይባላል😭 በደቡብ ምዕራብ ኢትዮጵያ ህዝቦች ክልል በቤንች ሸኮ ዞን ሰሜን ቤንች ወረዳ ኦካ ቀበሌ፣ በህይወት እያለ የራሱን ምስል በመጠቀም "ከዚህ አለም በሞት ተለይቷል" የሚል የሃሰት የሃዘን መግለጫ እና የመርዶ ባነር አዘጋጅቶ በመስቀል ማህበረሰቡን ያደናገረ ግለሰብ በፖሊስ ቁጥጥር ስር ውሎ ምርመራ እየተካሄደበት ይገኛል።
የሰሜን ቤንች ወረዳ ፖሊስ አዛዥ ምክትል ኢንስፔክተር ዘለቀ ኮሽካ ስለ ሁኔታው በሰጡት መግለጫ፣ ድርጊቱ በአካባቢው ነዋሪዎች ዘንድ ከፍተኛ መደናገጥንና አለመረጋጋትን የፈጠረ መሆኑን ገልጸዋል። አክለውም አጋጣሚው በህይወት እያሉ ያልተከሰተን የሞት ክስተት እንደተከሰተ አስመስሎ የማቅረብ የጎላ የስነ-ምግባር ግድፈት ማሳያ እንደሆነ ጠቁመዋል።
ምክትል ኢንስፔክተሩ አክለው እንደተናገሩት፣ ህብረተሰቡ ማናቸውንም አይነት መረጃዎች ያለ በቂ ማጣራት እንዳያምንና ከተጨባጭ እውነት የራቁ የሃሰት ወሬዎችን በጥንቃቄ እንዲመለከት አሳስበዋል።
በተጨማሪም መሰል ህገ-ወጥ እና የህዝብን ስነ-ልቦና የሚነኩ ድርጊቶችን የሚፈጽሙ አካላት ከድርጊታቸው ሊቆጠቡ እንደሚገባ ያስጠነቀቁት የፖሊስ አዛዡ፣ በማህበረሰቡ ሰላምና ደህንነት ላይ ቀልድ በሚቀልዱ ግለሰቦች ላይ ፖሊስ አስፈላጊውን ህጋዊ እርምጃ አጠናክሮ እንደሚቀጥል አስታውቀዋል።
Via North Bench Communications Affairs
