23/10/2024
“AKKASAATTI...BAKKASAATTI !
Dachee warra Adiirrattii Amantii fi Saayinsiin jaarraa heedduu wal haate.
Keessumaa warri Awurooppaa jaarraa 'medival age' keessa, qaruuxewwan danuutti ibidda qabsiisanii, ijatti quba wal dhahan.
Qaroomni danuun Laga Mormorirratti dhalatanii, daldalaafi Koloniitiin harka Giriikotaa, Fooneshiyaanotaa, Roomaanotaa fi harka warra Arabaa akka galan silaa Afaan tokkoon walii galleerra mitiiree? Warri Adii waan Kuushotarraa hatan kanaan xurree qaroomina haaraa abuuruu yaadnaan, amantiin gonnonneessee qabe. Kun hanga isaan "Renaissance Era" jedhaniitti fulla'e.
Jaarraa haaromsaa keessa garuu dukkanni danuun golgolaa'ee, Saayinsiin muttee, lubbuu godhachuu eegalte.
Fknf: Addunyaan bara 1545 dura, Aduutu lafatti naanna'a jettee amanti mitiiree? Afaan warra adiitiin 'geo centerism' ykn lafti gidduu teessii, warri akka aduufaammoo dacheetti naanna'u jechuudha.
'Nickolas Copernicus' Ijasaa uumamaa fayyadamee, leensii walitti diree, herrega irratti dhahee, yeroo jalqabaatiif akka aduun hin deemne, inumaa dacheen keenya kun aduutti akka naannoftu argee sagalee gammachuutiin iyyee dubbate. Argannoo guddaan kun "Heliocentric" jedhama. Sana dura jarri "Aduutu lafatti naanna'a" jedhee amana ture. Kitaabileen amantii danuunis ,Lafti akka hin sochooneefi, aduun lafatti akka naannoftutti barreeffamaniiru.
Dubbiin Copernicus kaase gurra abbootii amantii seennaan; 'Sexanatu na dogoggorse jettamoo, ibiddaan gubachuu siif wayya?' jedhanii itti dhaadatan. Gorsa eessumasaatiitiin dafee "Kun hojii seexanaati" jedhee lubbuusaa oolfate Copernicus.
Itti aaneemmoo Saayintistiin guddaan warra Xaaliyaa 'Geordano Bruno' waan Coppernicus argate irratti waa dabalee, hawaa ilaale.
'Jarana dacheetu deema malee, aduun bakka hordamtee hin sochootu' jedhee caraanee lallabe. Dubbiin gurra abbootii amantii seente. 'Hin gubattamoo akka seexanni si dogoggorsite amanta?' Jennaan ;
"Ana seexanni na hin dogoggorsinee, yoo soba jettan ilaalaa!" jedhee barruu marraagaa 'Infinty of the universe' itti hiixate. Abbootiin amantii garuu, "Nuti kitaaba amantii malee xebexxebakee hin dubbifnu!" jedhanii, isas barreeffamootasaas wal faana ibidda itti qabsiisanii guban.
Yaadni sun garuu hin gubanne. Kunoo har'a akka dachiin aduutti naannoftu mana barumsaatti barataa jirra. Har'a utuu ati dhugaa kanaan mormitee jamaan Hawaa keessatti godoo ijaarratee, ji'a irratti boolii ba'ee, faajjii ofii mirmirsaa achirra oolee bulu martuu, kolfa kilii sitti gaggaba.
Itti aansee 'Galileo Galieili' faana Copernicus fi Bruno hordofee, Telescope dhundhulee, gaaratti ol ba'ee halkaniin Hawaatti ija miixe. Galileon ittuma fufee, leensiiwwan Teleskoppii haaraa itti dabalatee, dachee qofa mitii, dacheewwan biraa aduutti marmaaran jiru jedhe lallabe. Juppiterii argee, urjiiwwan achirra jiranittiyyuu maqaa moggaase. Ajaa'iba jedhame.
Silaa baras dubbiin isaan hin dhokattuu, gurra abbootii amantaa seente.
'Namichoo jiraatti ibidda sitti qabsiifnee si waadnamoo, eelee gubaarra si teessifnumoo, seexanatu na dogoggorse jetta?' jedhaniin.
Galileon hin malate. Bruno yaadate. Jarri ibidda itti qabsiisuurraa duubatti hin jettukaaa!
"Seexanatu na dogoggorse" jedhee waakkate. Barri kun 1610 ture. Galileon sababa argannoo sanaatti bara 1633 himatamee umuriisaa hafte hidhaa dhaabbiitti fixatee, Bara 1642tti manasaa, bakka hidhaan dhaabbi itti murtaa'e keessatti boqote.
Warra adii biratti, barri amantiin dagaage, saayinsiidhaaf bara dukkanaa ture. Barri saayinsiin dagaagemmoo amantiidhaaf jaarraa jufunfulaati. Akka nu martuu beeknu, amantiin rincicaadha. Hin fooyya'u. Hin socho'u. Saayinsii saayinsiidhaan kuffiftee fooyyessuu dandeessa. Santu bilbilan ittiin waa barreessaa jiru kanayyuu dhalche mitiiree?
Biyyuma keenya hin yaadattanii? Bara konkolaataan xoophiyaa seentu, bara bilbilli dhufe, waan seexanaati, 'baqqaa' xumura lafaatu ga'e jedhamee mana amantiitti barsiifamaa ture mitii?
Bara Faranjiin kaameeraa fiddee dhufte "Ittiin seexanni dhiiga isin keessaa xuuxxii baqadhaa!" Jedhamaa hin turree?
Maal jechuufin jedhe seetan? Argannoowwan saayinsii danuu kan abbootiin amantaa Hojii seexanaati jechaa turan, jaarraa keenya akka ruqoolee jireenyaaf barbaachisan warra ijootti itti dhimma ba'aa jirra. Argannoowwan kunniin immoo Abboota keenya Kuushotaan laga Mormorirratti kalaqaman. Boodarra Foonishaanotatu fuudhee Giriikotaafi Roomanota harka kaa'e. Daldalaa fi Kolonii humnaatiin achitti maqaan itti jijjiirame malee Amantiinis, Saayinsiinis harka Kushotaa keessatti dhalattee handhuuramte. Sammuu abboota keenyaatu ishee boce.
Dhugaan kana mirkaneessu tokko Ayyaantuu Oromooti. Dhaha dhahe, Urjii fi teessooshee hubata. Guyyaa hedatee qoricha siif sukkuuma. Ammoo akka namni daandii Waaqaarraa hin mixxiqne gorsa. Saayinsiis Amantiis kuulee, heerri uumaa akka hin dabnetti sirna kunuunsaa har'a ga'e.
Kanaafuu nuti;
Amantii akkasaatti!
Saayinsiis bakkasaatti!
Jenna.
Suuraan: Qorannoo Saayinsii Kuushota Durii fi Heeroogiliifiksii.”
Wabii Kabbadaa
