25/07/2025
"Mootummaan Naannoo Oromiyaa nageenya naannichaa waaressuun misooma itti fufiinsa qabu mirkaneessuuf cimsee hojjeta!" Obbo Hayiluu Addunyaa
= = =
Mootummaan Naannoo Oromiyaa imala badhaadhinaa eegalame milkeessuuf karoora xiiqii qopheessuun xiyyeeffannoo olaanaan hojjechaa jiraachuu hoogganaan Biiroo Kominikeeshinii Oromiyaa Obbo Hayiluu Addunyaa karoora xiiqii bara 2018 ilaalchisuun miidiyaaleef ibsa kennaniin himaniiru.
Mootummaan Naannoo Oromiyaa dhimmoota tarsiima’aa ta'an irratti xiyyeeffachuun diinagdee naannichaa bayyanachiisuuf hojjetaa jiraachuu ibsuun, Bara 2018tti Galmoota qonnaa gurguddoo wabii nyaataa mirkaneessuu, al ergee guddisuu, oomisha alaa galu kan biyya keessaa bakka buusuufi carraa hojii bal’inaan uumuu qabaman milkeessuuf xiyyeeffannaa olaanaan kennamee kan hojjetamu ta’uu Obbo Hayiluun dubbataniiru.
Qonna Arfaasaa 2017/2018 lafa hektaara Mil 1.7 misoomsuun Callaa kuntaala Mil 41 argachuuf karoorfamuu ibsuun, Qonna Gannaa 2017/2018 lafa hektara Mil 11.8 misoomsuun Callaa kuntaalli Mil 368 kan eegamu ta’uu eeraniiru.
Misooma Qamadii Bonaa bara 2018 lafa Hektaara Mil 4 ol misoomsuun callaa Kuntaalli Mil.163.6 kan eegamu ta’uu himuun, Qonna Naannichaa hirkattummaa roobaa jalaa baasuuf Pirojeektii Finnaa hojiirra oolchuun damdamannaa misooma gammoojjii Oromiyaa ijaaraa jiraachuu kan ibsan Obbo Hayiluun, bara bajataa 2018 keessatti Pirojektoota jallisii buleeyyii 237 ijaaramaa jiran keessaa Pirojeektota Finnaa 15 dabalatee pirojektoota 163 xumuruuf karoorfamuu ibsaniiru.
Mootummaan pirojektoota fayyadamummaa uummataa dabaluuf pirjektoota yeroo qabame keessatti xumursiisuun tajaajilaaf banaa taasisuun aadaa ta’aa dhufaa jiraachuu ibsanii bara kanas Pirojektoota bishaan dhugaatii qulqulluu 2,826 ijaaramaa jiran keessaa pirojektoota 2,602 xumuruun ummanni mil.1.6 fayyadamaa taasisuuf kan hojjetamu ta’uu himaniiru.
Magaalota bakka gurgurtaafi oomishaa taasisuuf xiyyeeffannoon hojjetama kan jiruu fi bara kana Kilaastarri Industirii Godoo kuma 25 oliifi, Jiddugalli gabaa 2,162 kan ijaaramu ta'uus eeraniiru.
Hojii barbaaddoota mil 2.7 oliif hojii uumuun, liqii Qar. bil.15.9 kennuuf kan karoorfame yoo ta’u, bakka omishaafi gurgurtaa lafa heektara. kuma 98 dhiyeessuu sheedii 6,818 dabarsuu xiyyeeffannaa olaanaan kan hojjetamu ta’uu kaasaniiru.
Diinagdee cimaa ijaaruun badhaadhina eegalame dhugoomsuu keessatti babal’inni investimantii shoora olaanaa qabaachuu kan ibsan Obbo Hayiluun, bara kana Pirojektoota Investimentii 10,500 kaappitaala qarshii bil. 200 argamsiisan kan simatan ta'uu himaniiru.
Kanaanis Carraan hojii namoota mil, tokkoof kan uumamu ta’uu dubbataniiru.
Egeree ijaaruuf misooma barnootaaf xiyyeeffannoo addaa kennamee hojii hojjetamaa jiruun manneen barnoota Bu’uura Boruu 2,853, mana jireenya barsiisotaa 30,444 manneen barnoota Sad.1ffaa 170, manneen barnootaa Sad. 2ffaa 22 humna waloofi baajaata mootummaan kan ijaaramman ta’uu kaasuun, dhaqqabamummaa tajaajila fayyaa fooyyeessuuf baroota darbanitti hojiiwwan eegalaman cimsuun kan hojjetamu ta’uus ibsaniiru.
Bu’uruma kanaan Miseensa inshuraansii fayyaa hawaasaa mil 31.5tti olguddisuuf kan hojjetamu ta'uu himuun, du’aatii haadholeefi daa’immaanii xiqqeessuufi ittisaafi to'annoo dhukkuboota irratti xiyyeeffannoon kan hojjetamu ta’uu dubbataniiru.
Galiin walqabatee idileen qarshii biliyoona 200.9, mana qopheessaan biliyoona 58.1fi galii keessoon biliyoona 28.4 waliigala qarshii biliyoona 283 ol kan walitti qabamu ta`uus eeraniiru.
Mootummaan Naannoo Oromiyaa gola Oromiyaa hunda keessatti nageenya mirkaneessuuf xiyyeeffannoo addaan kan hojjetamu ta'uu himuun, balballi nagaaf baname kan hin cufamneefi harki nagaaf diriire kan hin dachaane waan ta`eef qaamni nagaan galuu barbaadus akka galuu danda`u yaadachiisaniiru.
Hojiin olaantummaa seeraa kabachiisuus cimee kan itti fufu ta`uus Obbo Hayiluun himaniiru.
