23/11/2023
Xaqiyo dulmibaa rabbow
Dagaalku dhexdooda yahay
Rabbow baadil doobyayiyo
Naf daahira baa lagdami
Nin xoola cir-doona iyo
Rabbow xaq u dirir weeyaan
Xarbigu darafyadu dhex yaal
Duulaanka yuhuuda ee
Gaaladu dacal taagan yiin
Waxay dul dageen ummado
Ku nool dagalkooda oo
Intay ku fureen dagaal
Oo ay ku shideen dabay
Ka xoogeen dalkii dhamaan
Waxay ka dhisteen dal wayn
Carro ay dulmi kaga rareen
Degaanka ninkii lahaa
Oo intay ka daaduumiyeen
Daryeel xumo wada il daran
Masjidka darajaysaniyo
Qudus bay rabbow doonayan
Inay duligaa yuhuud
Dhexdiisa dameera iyo
Doofaaro ku gawracdaan
Rabbow dumi baadikoo
Xaqay garba duubayaan
Rabbow dabarada ka go'
rabbow hooji daalimkoo
Dadkaa falaastiin rabbow
Doorkan ugu hiili guul
Munaafaqa doobyaye
Kibirsan rabbiyow dulee
Diciifkana xoojiyooo
Rabbow darajee quwee
Dariiqaad jidaysay iyo
Rabbow diintaadii bay
Dafireen gaalo Eebe oo
Dawgii jahligay mareen
Intay diideen cilmiga
Iftiinkiina way dadeen
Oo mugdibay door bideen
Dulmigaa xoogaystayoo
Waxaa batay duudsigoo
Beenta darartoo fidee
Runtii ka diciiftay iyo
Rabbow dunidaada bilan
Cadaalad kusoo dabaal
Islaam dilan baan nahoo
Dulooboo naaqusee
Daciifnimadiyo dhibkiyo
Cabsida rabbow naga dul-qaad
Damiirkaa naga dhintee
iimaan rabbow noogu deeq
dubaaqaan mayd ka nee
Rabbow nagu beer dadnimo
Qalbiga noo daji yaqiin
Omar Abdullahi
