02/05/2025
Guddiga Maamulka Jaamacadda Jigjiga oo Kormeeray Warbixinta Waxqabadka 9-Bilood ee Jaamacadda
Guddiga Maamulka Jaamacadda Jigjiga ayaa qabtay kulan qiimeyn ah oo joogto ah si loo eego warbixinta waxqabadka sagaalka bilood ee jaamacadda. Kulanka waxaa goobjoog ka ahaa Guddoomiyaha Guddiga, Mudane Dr. Tesfaye Beljige Dara, oo ah Wakiilka Guud ee Dowladda Federaalka ee Baarlamaanka, waxaana la wehliyay xubno kale oo guddiga ah iyo masuuliyiinta sare ee jaamacadda.
Intii kulanka lagu jiray, guddigu waxay booqdeen qaybo ka mid ah adeegyada taageerada waxbarashada iyo mashaariicda horumarineed ee salka u ah horumarka jaamacadda. Ujeedadu waxay ahayd in si toos ah loo qiimeeyo heerka waxqabadka iyo koboca adeegyada waxbarasho iyo maamulka.
Madaxweynaha Jaamacadda, Dr. Beshir Abdulahi, ayaa soo bandhigay warbixin faahfaahsan oo ka hadleysay guulaha la gaaray, mashaariicda socda, iyo caqabadaha u baahan xal. Ka dib dood furan iyo falanqeyn qoto dheer, guddigu waxay bogaadiyeen meelaha laga muujiyay horumar xooggan, waxayna ku dhiirrigeliyeen in la sii xoojiyo. Sidoo kale, waxay bixiyeen talooyin wax-ku-ool ah si looga gudbo caqabadaha jira oo loo dardar-geliyo hawlaha mustaqbalka.
Gebagebadii, Dr. Tesfaye ayaa bogaadiyay guulaha iyo wax qabadka maamulka jaamacada isagoo sidoo kale carrabka ku adkeeyay in la sameeyo hagitaan istiraatiijiyadeysan, iyo iskaashi joogto ah si kor loogu qaado adeega jaamacadda ee dhammaan laamaha muhiimka ah.
________________CSSH
