30/08/2025
Godina Jimmaatti daldaltoota seeraan ala gatii dabaluun gabaa hammeessan 810 irratti tarkaanfiin fudhatame.
**********
Godinichatti daballii mindaa hojjettoota mootummaa tibbana ni taasifama jedhamee labsamee fi ayyaanota uummataa fuulduratti kabajaman sababeeffachuun daldaltoota seeraan ala gatii dabalan irratti tarkaanfii fudhachaa jiraachuu Waajjirri Daldalaa Godina Jimmaa beeksiseera.
Ittigaafatamaan Waajjira Daldalaa Godina Jimmaa Obbo Xaahir Abduu, daballii mindaa hojjettoota mootummaa taasifamee fi ayyaanota uummataa fuldura keenyatti kabajaman sababeeffachuun daldaltoota seeraan ala gatii dabaluun qaala'iinsa jireenyaa hammeessan irratti tarkaanfii sirreeffamaa fudhatamaa jira jedhan.
Waajjirichi qaala'insa jireenyaa tasgabbeessuu, daldala seeraan alaa too'achuu, tajaajilli akka fooyya'u taasisuufi galiin mootummaa akka dabalu taasisuuf xiyyeeffannoon hojjechaa jiraachuu kan himan Obbo Xaahir, daldaltoota karaa qaxxaamuraa duroomuuf jecha sirna gabaa jeeqan adda baasuun jalqaba hubannoo kennuufi kan seerarraa maqe irratti tarkaanfii fudhachaa jiraachuus ibsaniiru.
Haaluma kanaan akka godinichaatti daldaaltota kuma 26 oliif hubannoon kan kannameef yemmuu ta’u, daldaltoota ulaagaa ka'ameen alatti seera cabsan 810 irratti tarkaanfiin bulchiinsaa fi seeraa fudhatamuu ibsanii, daldala seeraan alaa irraayis qarshiin kuma 849,600, mootummaaf galii ta'uus Obbo Xaahir himaniiru.
Godinichatti qaala'insa jireenyaa tasgabbeessuuf qindoomina qaamolee nageenyaa, caasaa siyaasaa, Waajjira Daldalaa fi taaksifoorsii daldala seeraan alaatiin hojiileen adda addaa hojjetamuun bu'aan galmaa'aa kan jiru yemmuu ta'u, sochii olaantummaa seeraa kabachiisuuf taasifamu milkeessuufis qaamoleen hawaasaa tumsa barbaachisu akka taasisus dhaamameera.
