08/06/2025
Tujaara badhaadhaa addunyaa kanaa Eelen Maaskii fi nama siyaasaa biyya guddoo addunyaa Doonaaldi Tiraampi ji’oota shanan darbaniif michummaa keessa ba’anii wal masaraa turan maaltuu isaan xuqnaan, tibba kana arrabni isaanii wal jala darbe laata?
Waxabajjii 01, 2017 Biliyeenarri USA fi Doonaaldi Tiraamp i michummaa jabaa kan ijaarratan erga dhiyootii ta’us, durumaanuu quba akka wal qaban ni odeeffama.
Filannoon Ameerikaa dhiyeenya filatameen ammoo inummaayyu michuu waliin malee laga hin ceene isaan taasise.
Doonaaldi Tiraampi, Rippaabilikaanota bakka bu’uun dorgome akka injifatuu shoora olaanaa kan taphate Eelon Maaskidha.
Harki dabaree wal dhiqa akkuma jedhamu, Tiraampis yeroo gara aangootti dhufu oolmaa sana kaffaluuf aangoo olaanaa bajeta mootummaa hirrisuu jedhu irratti muude.
Hojii guyyoota 100 pirezidaantichaanis raawwii olaanaa kan galmeessaa Eelen Maask ture.
Tiraampi Murteewwan garaa garaa yeroo fudhachaa turettiis dureessa kana mariisisee raawwachaa ture.
Michummaa isaan waliin qabanis daran jabaa akka ture irraa beeksisa.
Tiraampis dureessa gara aangootti isa fide kana fayyaduuf Mootummaa waliin dhaabbileen isaa akka hojii konkiraataa mallatteessan godheera.
Kunis galiin isaa akka dabalu godhe;
Michuuwwan ija mararteen wal ilaalan kun tibbana garuu jechoota arrabsoo walitti daddarbachaa jiru.
Dubbiin garaa wal dhabuu jaraa kan eegale murtee Tiraampi Seera gibiraafi baasii biyya keessaa irratti baase irratti mullate.
Fajoon kun daran hammaachuun Kamisa waaree booda waajira pirezidantii [Oval Office] keessatti guutummaatti dhohe.
Kanumarraa ka’uun Tiraampi waliigaltee hojii Maaski, mootummaa Federaalaa waliin qabu, waliigaltee daldalaa SpaceX'f hidda dhiigaa ta'e addaan kutuuf dhaadateera.
Baajata keenya keessatti dolaara biliyoonotaan lakkaa'aman qusachuudhaaf karaan salphaan diggomaa Elon Maaskiif kenninuufi waliigalteewwan addaan kutuudha," jechuun miidiyaa hawaasaa isaarratti barreesse Tiraamp.
Mootummaan Tiraampi, Maaski irratti dugda galagalfannaan biliyeenariin kun baayyee miidhamuu danda'a.
Kamisa yeroo Maaskfi Tiraampi jecha afaaniin walirratti duulaa jiranitti gaheen Tesla [warshaa konkolaataa Maaski] harka 14'n bu'eera.
Dirreen taphaa kun garuu Tiraampi qofaaf miti banaa kan ture. Maaskis humna qabuun ofirraa ittisuuf carraaqeera.
Tiraamp waliigaltee Ameerikaan meeshaalee gara garaafi astiroonoomeroota gara wiirtuu hawwaatti erguuf SpaceX waliin qabdu akka addaan kutan yeroo dhaadatu, Maaski ammoo aangoorraa bu'uu qaba jechuun dubbate.
Maaski duula jechaan waliif bahan kana keessatti kan inni fayyadamu filannoo bara dhufu raawwatsmuu keessatti morkattoota Tiraampi deeggaruudhaaf qabeenyasaa akka itti dhangalaasudha.
Maaski, mootummaa Tiraampi qabsaa'ee mo'achuu dadhabuu mala. Haata'uti, Tiraampiinis ta'e paartii warra Rippabilikaanii gatii guddaa baasisuu danda'a.
Maaski fuula 'X' isaarratti, ''pirezidaantummaan Tiraampi, waggaa 3.5 isa hafeera, ani garuu waggoota dabalataa 40 ol nan jiradha," jechuun barreesseera.
Atakaaroon gameessota kana lamaan gidduutti deemu hanga eessatti laata? Bullee ilaalla.
BBC fi CNN wabeeffachuun OBN qindeesseera.
