30/08/2025
ፖለቲካ ቅነ አሸንዳ!!
ኣብ ቅነ ኣሸንዳ ደቡብ ትግራይ ናብ ንቡር ክምለስ ዕንደራ ጠጠው ክብል ተገቢሩ እዩ፡፡ ኣያም በል!! እዩ ቲ ጉዳይ፡፡ ኣሸንዳ ዕቑርን ውቁብን ሃፍቲ ጥራሕ ዘይኮነስ ሓባሪ ሓድሽን እንትስፈወላ ትግራይ ኣንቃዕሪርና እንሪአሉ ዕድል ዝፈጠረ እዩ፡፡ ባህላዊ ሃፍትና መሰረት ህዝባዊ ዲፕሎማሲ soft power ምኻኑ ባዕሉ ኣዘኻኺሩና እዩ፡፡ ህዝቢ ትግራይ አጀንዳ ዘለዎ ህዝቢ እዩ፡፡ ኣጀንዳና ክዓ ብቅደም ተከተል ብምስራዕ ብወፈራ ክነወፍረሎም ይግባእ፡፡ ትግረዋይ ዝኽበር ኣብ ህዝባዊ ኣጀንዳ እንክውዕል እዩ፡፡ ቀዳማይ ኣጀንዳና ክዓ ተመዛበልቲ ህዝብና ናብ መረበቶም ምምላስን፤ ሉኡላዊነት ትግራይን ምውሓስ እዩ፡፡ እዚ ኣጀንዳ ፈላሊኻ ዝርአ ኣይኮነን፡፡ ክፈላልይዎ ዝደልዩ ከሓድቲ እንተበልናዮም ገይጋ የብሉን፡፡ ምምዕርራይ ዞባ ደቡብውን ኣካል አጀንዳ ትግራይ ኮይኑ ተዛዚሙ ኣሎ፡፡
ኣብ ትግራይ ሃንጊ ተብሂሉ ዝፍለጥ ተግባር ሸፋቱ ከተማ ከም ዘሎ ይፍለጥ እዩ፡፡ ሃንጊ ናብ መዳይ ፖለቲካውን ተዛሚቱ እዩ፡፡ ስለዚ ሃንጊ ፖለቲካ ዝበሃል ሓድሽ ፅንሰ ሃሳብ ገይርና ካብ ብሐዚ ክንጥቀመሉ ይግባእ፡፡ ሃንጊ ፖለቲካ ማለት ህዝባዊ ፖለቲካ ምጭዋይ ማለት እዩ፡፡ ፖለቲካ ትግራይ ከይቃናዕ ከይመዓራረ ኣጀንዳ ምውላድውን ኣካል ሃንጊ ፖለቲካ እዩ፡፡
ኣብረሃም በላይ ኣካል ሃንጊ እነተይኮነስ ዝለዓለ ጄኖሳይድ ዝፈፀመ ሰብ እዩ፡፡ ኣብ ዕለት አሸንዳ ዘሕለፎ መልእኽቲ መሕፈሪ እዩ፡፡ ኣብ ዝቅፅል ዓመት ትግራይ ንምውራር መደብ ከም ዘሎ እዩ ኣፍሊጡና፡፡ መግለፂ ክፋእ ኣብረሃም ንጎኒ ገዲፍና ብውቅብ ባህሊ ትግራይ ተወራዝየን ዝወዓላ ወኪላት ፌዴራል፤ ሕማቕ እንከይተዛረባ ምምላሰን ክምስገና ይግባእ፡፡
ኣብ ዕለት ኣሸንዳ ባንዴራ ትግራይ ሃንጊ ‘ዶ ተገይራ? እያ ዝብሉ ሕቶታት ይስምዑ ኣለው፡፡ ኣብ ኣደባባይ ዘይትፍለየና ዝነበረት ባንዴራ ትግራይ ንምንታይ ከም ዝተፈለየትና ክፍለጥን ክግለፅን እዩ ዝግባእ፡፡ ባንዴራ ትግራይ ኣብ ደስታናን ሓዘንናን ክትፍለየና ኣይንደልን፡፡ እዚ ሓደ መግለፂ ሃንጊ ፖለቲካ እዩ፡፡ ኣፀንቲኻ ሃንጊ ምግባር ንዕዘብ ኣለና፡፡ ጠጠው ይበል፡፡ መስርሕ እናኾነ ይመፅእ ኣሎ፡፡
ብካሊእ መዳይ ዘርኡ ገብረሊባኖስ ዘሕለፎ ማዕዳ ዘይምድናቅ ኣይከኣልን፡፡ ቄሰ ገበዝ እንተዝኾውን ‘ጥዑመ ልሳን’ ዝብል ማእርግ መወሰኽክሉ ይመስለኒ፡፡ ብዝኾነ ጥዑም ንዝተዛረበ ጥዑም ምምላስ ግድን እዩ፡፡ ዘርኡ “ኣጀንዳ ኣይተዋልዱ” ዝብል መልእኽቲ ምሕላፉ ኣገንዕ ክበሃል እዩ ዝግባእ፡፡ ቀንዲ አጀንዳ ህዝቢ ትግራይ ብዝርዝር ኣቅሪቡ እዩ፡፡ ሃንጊታት ፖለቲካ እናበዝሑ ይኸዱ ምህላዎም ዝተረድኦ ይመስል፡፡ ግዝኣታዊ ሓድነት ትግራይን ተመዛበልቲ ምስ ሙሉእ ሉኡላዊነቶም ናብ መረበቶም ምምላስን ዝመሰሉ ቀንዲ ኣጀንዳ ትግራይ ዘርዚሩ ነጊሩና ኣሎ፡፡ እዚ ምኽሪ ነግ ፈረግ ንዝብሉ መራሕትና’ውን እዩ፡፡ “ነገር ኣይተዋልዱ” ማለቱ እዩ፡፡
መፃጉዓት ፖለቲከኛታት ትግራይ ብሄራዊ ዕርቂ ዝብል ኣጀንዳ ምውዛዖም ንኹላትና ኣግሪሙልና ኣሎ፡፡ ብሄራዊ ዕርቂ ዝበሃል ኣመር ናይ ፃድቃን ኣጀንዳ እዩ ዝመስል፡፡ ተቐይመ ኣለኹ ስለዝበለ፡፡ ኣጀንዳ ብሄራዊ ዕርቂ “ስራሕ ‘ያ ዝሰኣነ ፈላሲስ ቆቢዑ ቀዲዱ ይሰፊ” ከም ዝበሃል እዩ፡፡ ገለ ገለ ኣሕዋትና ቅድመ ሕዚ ንዘጥፍእዎ ትም እንተበልናዮምስ ወግሐ ፀብሐ ቅሳነትና ይፍትንዎ ኣለው፡፡ ገል ገሊኦም ብግልጺ ንሸዋ እንተዝሃድሙ እዩ ዝምረፅ፡፡ ህዝቢ ትግራይ ትም ብምባሉ መፃጉዓት በብእዋኑ ኣጀንዳ እናዋለዱ ክወራዘይሉ ኣይግባእን፡፡
ኣብ ምምላስ ተመዛበልቲ ዘሎ ዛዕባ ክንረዳደአሉ እዩ ዝግባእ፡፡ ፈለማ እቲ ጉዳይ ምስ ሕድ ሕድ ተመዛባላይ ደህንነት እዩ ዝተሓሓዝ፡፡ ክወፁ ዝግቦኦም ኣብ ምዕራብ ትግራይ ዝርከቡ ስጋ ትግራዋይ ጠቢሶም ዝበልዑ እናሃለው ተመሊስካ ብዘይ ዋሕስ ተመለስ ዝብል ነገር ናይ ኣጀንዳ ፀላእቲ እዩ፡፡ሉኡላዊነት ትግራይ ምስ ዝኽበር እዩ እዚ ዝማላእ፡፡ሉዑላዊነት ትግራይ ብህገ መንግስት ኢትዮጵያን ብውዕል ፕሪቶርያን ተፈሊጡ ዝሓደረ እዩ፡፡ ሓደ ሓደ እዋን ምስ ምሕደርኡ ይመለስ እንክበሃል “ህወሓት ክትምለስ ደልያ” ብዝብል መናውራ ቀንዲ ኣጀንዳ ትግራይ ንሃልኪ ፖለቲካ ምጥቃም ኣይግባእን፡፡ ሃንጊ ፖለቲካ ግደፉ!!
ፅምዶ ዛላምበሳ ዝገርም እዩ፡፡ ህዝቢ እንክሕጎስ ዘይምሕጓስ ኣይከኣልን፡፡ ኩሉ ትግረዋይ ክድግፎ እዩ ዝግባእ፡፡ ነዚ ዘይድግፉ መፃጉዓት እዮም፡፡ ስርዓት አዲስ ኣበባ ኣይምልከተኒን ኢሉ ዝሓደጎ ኣጀንዳ እዩ፡፡ ፖለቲካ ሸዋ ህዝቢ ትግራይን ኤርትራን እናባላዕኻ ስልጣን ምውሓስ እዩ ነይሩ፡፡ ፅምዶ ጂኦፖለቲካ ቀርኒ ኣፍሪካ ዝቀየረ ስርሒት እዩ፡፡ እንተነኣሰ ወራር ኣኽሺፍ እዩ፡፡ ሰላም ኣብ ፅንዕ መሰረት ክህነፅ ዝሕገዝ እዩ፡፡
መስከርም እንክብሕት ኣብይ ኣህመድ ሓድሽ ኣጀንዳ ሒዙ ከም ዝመፅእ ክንፅበ ኣለና፡፡ ህገ መንግስቲ ክቅይር ከም ዝኽእል እዩ ዝግመት፡፡ ፈለማ ዓንዲ ሕቆ ህገ መንግስቲ መሰል ብሄር ብሄረሰባት ዝብሀላ ክስረዝ እዩ፡፡ ፓርላማኔታሪ ስርዓትውን ናብ ፕሬዝዳንታዊ ስርዓት ክቅየር እዩ፡፡ እቲ ነገር ‘መርዓስ ይቅረይኽን ዋ ዓድኽን ክረማ ‘ዘብል እዩ፡፡ እንታይ ከምዝፅበዮ ኣይፈልጥን፡፡ ብዝኾነ ትግራይ ኣካል እዚ ከይዲ ከምዘይኮነት ክተፍልጥ እዩ ዝግባእ፡፡ ነገራት እንተይተበላሸው ማለት እዩ፡፡
ብዝኾነ ፖለቲካ አዲስ አበባ ትቃለሶ እምበር ኣይትጥብሮን፡፡ ኣፍዑት እዩ፡፡ የግዳስ ከምታ ክረምቲ እንተይመፀ ጎጃኣ ዝሰርሐት ዑፍ ደመና እንተይኣንጎድጎደ ምስጥጣም የድሊ እዩ፡፡ ዲያስፖራ ይኹን ኣብ ዓዲ ዘሎ እንተነኣሰ ኣብ ቀንዲ ሓደጋ ህዝብና ሓቢርና ክንቃለስ ይግባእ፡፡
