16/03/2024
Balaa tiraafikaa har'a ganama Aanaa Qarsaa naannoo Baddaa Bunaatti mudateen lubbuu namaafi qabeenyarra miidhaan qaqqabeera.
**********
Godina Jimmaa Aanaa Qarsaatti balaa tiraafikaa guyyaa har'aa Ganda Ankasoo iddoo addaa Baddaa Bunaa jedhamutti mudateen lubbuu namaafi qabeenyarra miidhaan qaqqabuu isaa Waajjirri Poolisii Aanaa Qarsaa beeksiseera.
Balaan tiraafikaa kun Bitootessa 07/2016 ganama keessaa tilmaamaan naannoo sa'aatii 1:30 yommuu ta'utti kan mudate yommuu tahu, lubbuun nama tokkoo battalumatti yommuu darbu namoota sadi irratti miidhaan qaamaa salphaafi qabeenyarras miidhaan qaqqabeera.
Balaan kun konkolaataa fe'umsaa FSR koodii (3) A.A lakkoofsa gabatee 71057 fi mootorri luka lamaa koodii (3) lakkoofsa gabatee 01416 ta'e kallattii Finfinnee irraa gara Magaalaa Jimmaa deemaa turan walitti bu'uun gara galuun kan mudateen tahuu Waajjirichi beeksiseera.
Waajjira Poolisii Aanaa Qarsaatti Ittigaafatamaan Divizyinii Qorannoo Yakkaafi Murtee Haqaa Kennisiisuu kan ta'an Gargaaraa Inispektaraa Balaayi Lammeessaa akka ibsanitti ka'umsi balichaa qoratamaa akka jiruufi namoonni miidhamanis hospitaala Jimmaatti yaalamaa akka jiran dubbataniiru.
Xumura irrattis balaa tiraafikaa miidhaa guddaa qaqqabsiisaa jiru kana hirrisuuf gaheen konkolaachiftootaa olaanaa waan taheef teeknika konkolaataa yeroo yeroon hordofuufi miira ittigaafatamummaatiin konkolaachisuun midhaa namaafi qabeenyarra gahu hanbisuuf hojjachuu qabu jechuun dhaamaniiru.
Waajjirri Kominikeeshinii Aanaa Qarsaas balaa mudate kanaan lubbuu badeef gadda itti dhagahame ibsaa, maatii, firaafi hiryoota maraaf jajjabina hawwa.
