iTaukei Affairs Board

24/12/2025

Nodra vosa ni vakanuinui vinaka na Minisita ni Veika Vakaitaukei

23/12/2025

Na Vakanuinui Vinaka ni Siga ni Sucu kei na Tawase ni Yabaki mai vei ira na nomuni liga ni veiqaravi ena Matabose ni Veika Vaka Itaukei.

23/12/2025

Ni sa Bula Vinaka Vinaka

22/12/2025

Na iVakananumi e Narocivo,Nayau Lau.

Ea laki cereki e dua na i vakananumi ni nodra sa cabeta na tutu vaka Tui Nayau, Tui Lau ka Sau ni Vanua o Lau o Ratu Tevita Uluilakeba Lutunauga Kapaiwai Mara ena delana o Maumi e Nayau.

Na yavu ka toka ena delana oqo e tukuni na ke na itukutuku ni ra dau laki vakatikori kina na Tui Nayau e na gauna eliu.

Era dau cabe cake ena delana oqo, ka via 15 na miniti mai na Koro o Narocivo me dau laki buli mai kina na Tui Nayau, ni bera ni ra dau qai laveti sobu mai ena tavata vakarautaki ki na lomanikoro.

E I otioti ni kena qaravi ena delana oqo na veibuli ea vakayacori vua na Turaga Tui Nayau sa bale o Ratu Kamisese Kapaiwai Tuimacilai Mara ka nodra itubutubu o Ratu Tevita.

Ia e nanuma na Turaga na Tui Nayau, Tui Lau ka Sau ni vanua o Lau o Ratu Tevita me sa laki biu kina e dua na I vakananumi ni kena dau vakayacori eke eliu na cakacaka bibi oqo.

Ea qaravi e liu e dua na lotu mai vua na Qase o Lau bera ni cegai na i vakananumi ka sa duri tiko kina ena gauna oqo e dua na kauveilatai me ivakadinadina ni kena ciqomi tiko na Lotu mai na Yatu Lau.

Ni cava mai na itavi ena yavu oqo o Maumi sa qai mai qaravi na soqo ni vakasenuqanuqa ka ra marautaka kina na lewei Nayau na nodra a buli o Ratu Tevita me Tui Nayau.

Na yanuyanu o Nayau e umani vata kina na Koro o Salia, Narocivo kei Liku.

21/12/2025

Era lagalagasere ni Siganisucu wavoki ena loma ni Koro o Tubou e Lakeba na lewe ni Matawilivola ni Sigatabu kei ira na Mataveitokani e Tubou.

21/12/2025

20/12/2025

Vakasenuqanuqa e Tubou, Lakeba.

Era a qarava e dua na soqo ni vakasenuqanuqa vua na Turaga na Tui Nayau, Tui Lau ka Sau ni Vanua o Lau o Ratu Tevita Uluilakeba Lutunauga Mara ena siga edaidai Vakarauwai 20.12 25 na lewe ni Tikina o Lakeba.

E vakayacori na soqo lagilagi oqo ena loma ni rara e Tubou ka ra vakadinadinataka na lewe ni walu na Koro ena yanuyanu o Lakeba.

Na veiqaravi e qaravi e daidai e dau vakayacori ga vua na Turaga na Tui Nayau, Tui Lau na Sau ni vanua o Lau. Ea tekivu vaka lotu ka veiqaravi kina na Qase o Lau.

Ea qasivaki na tabakau ka rau a vakaitavi kina na gone mai Atapu kei Vatuligiligi. A ciqoma na tabakau o Mataki Cicia, Niumaia Gucake ni bera ni qai lobika ka biuta vakatikitiki.

Ea nodratou itavi na iVono mai Narewadamu ka ratou Mataki Bau.
Ni oti o ya esa qai mai cabora na iqaloqalovi e dua vei iratou na gone mai Matailakeba.

Ni sa qalovi oti na Turaga sa ra yatuni mai e loma ni rara na marama kei na goneyalewa ni tokatoka Vatuwaqa ka ra kauta yani na ivakamamaca, oqo na ibe, waliwali kei na sasa. E totoka na noda saravi ira na luveda gonevuli ni ra sa vakarautaki tiko mera dau tiki ni veiqaravi vaka vanua vaka oqo.

Ni oti oya sa qai curumaki mai eloma ni rara e dua na vuniyaqona levu me isevusevu ka ratou vakaitavi kina na gone mai Taqalevu.

Na yaqona vakaturaga eratou vakaitavi kina na Yavusa Delaikorolevu ena Koro o Levuka e Lakeba.

Na wase ni yaqona eratou vakaitavi kina na turaga kei na cauravou ena Koro o Yadrana e Drekeivuci.

Ea qai nodra na vosa vakaturagase vakatatabu na Turaga Tui Nayau ena nodra vakananumi na lewei Lakeba ena kena maroroi ka taqomaki too na vanua ka vaka bibi o Ira na luveda ka ra na veisosomitaki ena veisiga ni mataka.
E sa qai uliva na nodra vosa na Tui Waciwaci.

Ena sega ni taucoko edua na soqo vakaviti ke sega na kena meke kei na kana magiti.
Ea qai sogota e dua na mata lakalaka bula ka ratou vakaitavi kina na turaga kei marama ni Tubou.

Na magiti vakarautaki vaka Tonga ka kilai tu ena yaca na"kana pola" era dui vakarautaka na vei tokatoka e Tubou kei na vei Koro kece e Lakeba.
Era biu tu e loma ni tepeli vakarautaki na veimataqali sasalu ni waitui, na kena ilava na dalo, uvi kei na kumala ka davo tu ena vuqa na veiteveli oqo na vuaka ka tavu vakamatau kei na kena wai ni bu kei na veimataqali vakalomavinaka me vaka na vakalolo.
Eda qoroqoro ka da matalau ni da sarava na lagilagi ni nodra veqaravi na wekada mai na yanuyanu o Lakeba.

E nanumi me ratou na qarava na nodratou vakasenuqanuqa na yanuyanu o Nayau ena siga Moniti mai oqo 22.12.25.

20/12/2025

Ratou tutaka na medra yaqona na Tui Nayau na yavusa Delaikorolevu ena Koro o Levuka e Lakeba.

19/12/2025

Na Va Pogipogi

Era vakaraitaka na nodra veivakaturagataki, veivakamenemenei kei na sauvaki ni tikotiko Vakaturaga na lewe ni Koro o Tubou e na yanuyanu o Lakeba. Oqo ni oti na kena mai qaravi edua na ivakarau ka tiki ni bula ena loma ni Koro sau.

E lalata na loma ni tikotiko vakaturaga e Vatuwaqalevu na domodra na lewe ni matasere ni valenilotu na sere ni lotu ena kena laki qaravi na Va pogipogi vua na Turaga na Tui Nayau,Tui Lau ka Sau ni vanua o Lau, Ratu Tevita Uluilakeba Lutunauga Mara.

Na va pogipogi e dua na ivakarau vaka Tonga ka dau qaravi kina na medra yaqona na Tui ena mataka c**a me nodra ivakayadra na lewe ni vanua ki vua na Turaga.

E qaravi na ivakarau bibi oqo ena rara ena lomanibai e Vatuwaqalevu ena va na kaloko ena mataka lailai edai,Vakarauwai 20.12.25.

Ea tekivu ena dua na lotu ka qai tarava na nodratou vakarautaka na yaqona na gone e Valelevu.

Era dabe ena nodra idabedabe ena loma ni yalofi na nodra liga iMatau na Turaga na Tui Nayau ena loma ni koro o Tubou ni bera ni vakaraitaki vei Mataki Cicia, Niumaia Gucake ni sa vakarau tu na medra yaqona na Turaga na Tui Nayau.

Ea tu yaqona o Ratu Isikeli Mara kei Ratu Tevita Vakacereivalu ka tutaka na kena wai ni bera ni rabe o Mataki Cicia.
Oti era sa qai gunu na vo ni Turaga ka ra dabe ena loma ni yalofi.

Na ivakarau ni veivakaturagataki oqo ea qai tini tale ena sere totoka ni Siga ni Sucu ka tini vaka lotu.
Namaki tiko na kena vakayacori na vakasenuqanuqa vua na Tui Nayau ena siga e daidai.

19/12/2025

Vakaciriloloma tu ko Lakeba.
Oqo ena kena vakayagoyago vinaka taki tiko na vakavakarau ena yanuyanu o Lakeba ena Lomanikoro sau o Tubou. Na soqo ni vakasenuqanuqa vua na Turaga na Tui Nayau, Tui Lau ka Sau ni vanua o Lau, Ratu Tevita Uluilakeba Lutunauga Mara.
E namaki na soqo me vakayacori ena siga ni mataka, Vakarauwai 20.12.25.