iTaukei Affairs Board

17/09/2025

Veivakararamataki e Raralevu, Tailevu na Matabose ni Qele Maroroi.

17/09/2025

Esa tekivutaki ena macawa oqo na nodra vuli na isausauvou mai na Yasana e 14 kei Rotuma ena ituvatuva ni Diploma in Traditional Leadership ka vakarautaka na koronivuli na Fiji National University kei na Bose Levu Vakaturaga.

Ena ituvatuva ni vuli oqo era a lako curuma kina na imatai ni macawa na veituberi mai na Mataivalu ena porokaramu ni Veiliutaki Framework ena kena vakatagedegede oya na "Lead Self" se na nodra na Liutaki ira vakataki ira.

Era a digitaki mai na lewe ni vuli ena Bose Vanua ni Yasana.E rua (2) na idabedabe dua na yasana bau kina o Rotuma.

Qo ena kena sagai me laveti cake na nodra kilaka kei na iwalewale ni veiliutaki ka salavata na gauna.

Namaki me sa tekivu me ratou na veituberi na qasenivuli mai na FNU ena macawa mai oqo.

17/09/2025

Tosoi tiko na sasaga ni vuli mai na veiyasana.

17/09/2025

16/09/2025

E ra vulagi dokai na mataka nikua na Turaga nai Vukevuke ni Minisita ni Veika Vaka Itaukei ena koro ko Tavuya kei Vunisinu ena loma ni yasana ko Rewa.
Oqo na kena vakavotukanataki tiko na tuvatuva ni veivakatoroicaketaki ka veisemati kei na tuvatuva ni IVDP se Intergrated Village Development Plan.

Na veivuke oqo e rawati ena porokaramu ni veivakatoroicaketaki ka tiko ena loma ni nomuni matabose ka kilai ena Village Improvement Scheme. Ena tomani tiko na porokaramu oqo ena loma ni yabaki vakailavo oqo ena kena vakacavari na veikerekere sa tiko oti tiko e valenivolavola liu.

13/09/2025

Era lesu tale kina nodra yavutu na nodra kawa ni dratabu na Turaga na Ratu mai Verata ka sa vakaitikotiko mai Bua, o Buatavatava.

Oqo ni oti na kena mai vakayacori na soqo ni cara sala mai na vanua vakaturaga o Bua kina koro o Ucunivanua ena vanua vakaturaga o Verata e Tailevu ena siga enanoa Vakaraubuka na I 12 ni vula o Seviteba, 2025.

E dau tukuni na kena italanoa nia a lesavi o Buatavatava mai vua na tamana o Rokomautu, ka qai biuta kina na koro o Ucunivanua ena baravi e Sovatabua ka nona iloloma na marama tubuna o Adi Leleasiga e dua na taba ni bua, ka me qai laki tea ni sa cabe bula.

Ia ena siga enanoa era a liutaka na ilakolako ni cara sala oqo na Turaga na Tui Bua, Ramakutu Nagagavoka na kawa ni ulumatua mai vei Buatavatava.

Ena vanua o Verata e veiwaraki yani kina na Turaga na Ratu, na Turagalewena o Ratu Ilaitia Dreuvuata ena vukuna na vanua o Verata.

Era a curu e liu ena loma ni nodra vale e Ucunivanua na Turaga Tui Bua ka vakatokai me o Vunivesi vei iratou na Mataqali Turagalewena ni bera ni tekivu na soqo.

E soli tu na kena draki kei na yalo ka tekivu na siga ena lotu ni bera na veiqaraqaravi vakavanua. Era a cabora na nodra isevusevu na Tui Bua ni bera ni a qai cabori e dua na kamunaga me nodra boka se ireguregu me baleti ira na wekadra era sa kacivi yani.

Ni oti oya sa qai vakayacori vei ira na veiqaraqaravi vakaturaga ka meketaki na medra yaqona na Tui Bua ka lagati na kena meke ka talanoataki kina na nodra lesu mai o Buatavatava ena gauna sa malumalumu tiko kina na nodrai itubutubu o Rokomautu.

Era a binia na iyau, na kamunaga, magiti kei na kena ibe duidui ka vaka kina na ibe kuta ka kilai tani kina na vanua o Cakaunitabua me nodra iyau ni cara sala.

E tiki ni cara sala oqo na nodra tubera e 1 na vulo na kamunaga na turaga naTui Bua me nodra matanigasau ki vua na Turaga Ratu ena vuku ni nona dau ulubaleta ka vorata na vakatulewa o Buatavatava ka vuna na nona lesavi mai na Ucuna o Verata.

Era a ciqoma na kamunaga na Turaga na Ratu ka ra vakadeitaka na veiwekani makawa oya ni se dei vinaka sara tu ga e Verata.
Ka ra kaya ni ra ciqomi tikoga na Tui Bua ni nodra dratabu ga Turaga na Ratu mai na Ucuna o Verata.

Ni sa oti na veiqaravi vakavanua sa qai dolava na mata meke nodra na Roko Tui Yasa e Kumi na veivakamarautaki vua na kawa ni Ulumatua.

Era osota na rara ni veiqaravi vakaturaga na turaga, marama cauravou goneyalewa kei na gone mai na loma ni Yasana o Bua ka ra sala muria yani na Tui Bua.

Esa totoka ni da sarava ni ratou tiko kece ka tiki ni soqo bibi oqo na Mataqali turaga e tolu mai Verata o Naisanokonoko, Turagalewena kei na Vunivalu.

E sa vakadeitaka tale na veiwekani makawa na vanua o Bua ni mai cava na soqo e nanoa ni ko Bua ga o Verata, se ko Verata ga o Bua.

E dreu na leba e Verata ni ra cabe na Ulumatua ki na nodra yavu.

03/09/2025

Ea mai sainitaka e dua na veidinadinati na iLiuliu ni Bose Levu Vakaturaga, Ratu Viliame Seruvakula kei na iLiuliu ni Mataivalu o Major General Ro Jone Kalouniwai ena vuku ni veivuke eso, me vaka na vuli kei na veitabana tale e rawa ni dau veivuke kina na Mataivalu ki na Bose Levu Vakaturaga.

E vakayacori na cakacaka oqo ena Strategic Headquarters ni Mataivalu e Suva ena siga enanoa, Vukelulu 2.09.25.

E vakaraitaka o Ro Kalouniwai na nona vakavinavinaka ni nanumi na Mataivalu ena kena vakacokotaki na Bose Levu Vakaturaga kei na veitabana e qarava.

E tiki talega ni veidinadinati oqo na nodra tuberi ka vuli na isausauvou ena vuku ni vei liutaki vinaka ena veisiga ni mataka.

Ea vakavinavinaka taka talega o Rt Viliame na veiciqomi ni Mataivalu ena kena cicivaki na vuli ena vuku ni sasaga ni kawa iTaukei.

E na qaravi na vuli oqo vei ira na sa digitaki mai na veiyasana ena koronivuli ni veivakarautaki e Nadave.

01/09/2025

Na iSevu ni soqo nodra na iTabagone ni Yasana o Tailevu ka vakayacori e Nausori ena i ka 28-30 ni vula o Okosita, 2025.

Era a dolava na soqo siga tolu oqo na iVukevuke ni Vunilewa ni Matabose ni Veikavakaitaukei, Josefa Toganivalu ka ra salamuria na gone ni Tailevu ka ra veiqaravi tiko ena Matabose.

Era a bolei na itabagone ni Yasana ena vuku ni nodra tutataka na nodra Koro, Tikina kei na Yasana ena vuku ni veivakatoroicaketaki ena gauna bolebole eda sa lako curuma tiko ena gauna oqo.

Era a vakananumi talega ena vuku ni wiliwili ni gone era vakacalai vaka lawa mai na loma ni yasana ka dua toka na uma ni wiliwili levu mai na Yasana o Tailevu.
E ra vakamasuti kina na itabagone ena nodra vakaogai ira ena so na ka e yaga ka vakavure bisinisi kei na tubu ena nodra dui tikotiko.

E vakaraitaki talega vei ira na itabagone na kena sa toso cake tale tikoga na iwiliwili ni nodra vakalolomataki na marama kei na gone ka dodonu me dua na tiki ni nodra dau veitalanoa na veiulutaga oqo.

Ea bolei talega na isoqosoqo ni tabagone ni Yasana o Tailevu me i matai ni soqosoqo e tutaka na kena qaravi na iYaubula ena loma ni yasana me ivurevure ni bisinisi ka vaka kina na kena maroroi me baleti ira na noda kawa mai muri.

24/08/2025

Na Lotu ni Tabacakacaka iTaukei ena kena kidavaki na yabaki vakailavo vou oqo 2025-2026. Ea sevutaki talega kina na sere ni Tabacakacaka iTaukei kina lagalaga sere ni Koniferedi ena yabaki oqo, 2025.

21/08/2025

Vakavinavinaka taki na yalo ni gu ena vuli kei na vasaqara na kilaka vei ira na gone vuli mai na Wainimala Secondary School, e Naitasiri.

Ena iotioti ni macawa ni vuli oqo era bau nanuma mera mai sikova na gonevuli na Tabacakacaka iTaukei kei na Matabose ni Veikavakaitaukei e Draiba.

Era mai vakararamataki ena veiqaravi e vakayacori tiko ena valenivolavola liu kei na veitabana e qarava tiko me baleta na kawa iTaukei.

Era laki raica talega na valenivolavola ni Veitarogivanua kei na Wai ni qoliqoli ka vaka kina na nodra laki sarasara ena loma ni valenibose levu Vakaturaga.

18/08/2025

Veivuke na kabani na Tower Insurance ena nodra vakacokotaki na gone era vakarautaki e Nadave ena kena vakarautaki na bula raraba ena vei gauna sa tu e matadra.