12/09/2025
"فلان عندو الزهر"، "أنا ماعنديش الزهر"
شحال من مرة سمعنا هاد الهضرة؟ شحال من مرة قلناها لراسنا فاش كتحس ان البيبان تسدو؟
اليوم غانهضروا على نيفوات ديال زهر فالكاريير
النيڤو 1
هادا هو الزهر ديال الصدفة. بحال شي واحد تصادف مع مدير ديال شركة فقهوة، هضرو، و خدمو. او لا جداه فالعرس و معرفة ولا شي واحد لقا بوسط محطوط فدقيقة 90 و هو اللول لي دفع ليه. هاد الزهر زوين، ولكن ما كيتعاودش دائما
بحالوا بحال تقميرة د لوطو
كايدير ليك دفيعة لكن نتا و شطارتك من بعد
النيڤو 2: الزهر ديال تمارة و السعي
هادا هو بنادم لي ماكيجلسش. كيقلب فكل بلاصة، كيدفع لمية بوسط، كيدوي مع كلشي، كيحضر لأي إيڤينمون... كيدير بزاف ديال الروينة و الصداع. وسط ديك الروينة، ضروري ما كتخرج شي هوتة. ماكيكونش كيقلب على فرصة معينة، ولكن من كثرة ما كيتحرك، كيخلق فرص من والو. هو كيصيد بشبكة كبيرة، ضروري ما غاتشد شي حاجة
كون من هاد نوع و مهما تزيرات القضية عرف ان
السعي غايجيب النتيجة فالتوقيت المناسب ماشي التوقيت لي كتشوف نتا مناسب
النيڤو 3: الزهر ديال لي موجّد راسو
هادا هو النيڤو لي كيبدا فيه اللعب ديال بصح. هادا هو داك خونا لي حفر سنين فواحد الدومين حتى ولا واعر فيه. ولا ديك ختنا لي تعلمات واحد المهارة نادرة بزاف. فاش كتجي واحد الشركة كتقلب بالضبط على داك البروفيل، الناس كتقول "شوف تبارك الله على زهر عندو!". هوما ما شافوش ديك السنين ديال السهير و تمارة و التعلم. هادا ماشي زهر، هادا حصاد. هو ما بقاش كيصيد بشبكة، ولا قنّاص كيتسنى اللحظة المناسبة لي موجّد ليها سنين هادي. هو كيولي كيشم ريحة الفرصة قبل ما تبان للناس
و كايولي تكون عندو رؤية اكتر و قدرة انه ايتلاح لموجة جديدة قبل ماتجي الموجة و تجمعوا
النيڤو 4: الزهر ديال الشخصية ديالك
هادا هو أعلى نيڤو، و أصعبهم.
كيفاش؟ فاش كتخدم على راسك لدرجة كتصنع واحد "الماركة" فريدة ديالك. واحد السمعة نقية، واحد الأسلوب فالخدمة ماكينش بحالو، واحد المصداقية ما كتشراش. الناس ما كيبقاوش يقلبو على "واحد بحالك"، كيوليو يقلبو عليك نتا بالسمية. الفرص كتجي تدق عليك فالباب حيت نتا هو نتا. هنا، نتا ماصنعتيش غير فرصة، نتا صنعتي راسك كفرصة
هادشي كتشوفوا فداك المعلم لي عليه رواج و معروف بالمعقول
ولكن سمعني مزيان... هاد الطريق ماشي ساهلة
غاتدوز من مراحل ديال "التلفة". غاتجيك أوقات غاتقول فيها "هادشي كامل لي كندير والو". غاتشوف صحاب "الزهر ديال الصدفة" سبقوك و نتا باقي كتحفر. هاديك هي أصعب مرحلة. تما فين كيبان الصبر
فديك اللحظة ديال التلفة، ماتحطش يديك. عرف بلي راك غير كتدوز من نيڤو لنيڤو. كل تمارة ضربتيها، كل كتاب قريتيه، كل مهارة تعلمتيها غايجي نهار لي غاتكافؤ فيه
نوض تكتب زهرك بيدك
و لكل مجتهد نصيب
و السلام
