19/06/2026
Musharrax Golaha Deegaanka Degmada Hobyo, Mudane Xasan Cabdi Dheere, iyo masuuliyiin kale ayaa si diirran loogu soo dhaweeyay xarunta Urur Siyaasadeedka Towfiiq ee gobolka Mudug.
Soo dhaweynta ayaa waxaa ka qeyb galay Guddoomiyaha iyo Guddoomiye Ku-xigeenka Ururka Towfiiq ee gobolka Mudug, masuuliyiinta ururka ee magaalada Gaalkacyo, garabka dhalinyarada, musharraxiin u tartamaya kuraasta Golaha Deegaanka, iyo marti sharaf kale.
Masuuliyiintii ka hadlay munaasabadda ayaa bogaadiyay doorka musharraxiinta iyo dadaallada ay ugu jiraan ka qeyb qaadashada geeddi-socodka dimuqraadiyeynta iyo horumarinta dowladnimada hoose. Waxay sidoo kale adkeeyeen muhiimadda ay leedahay in bulshada ay door muuqda ku yeelato doorashooyinka goleyaasha deegaanka.
Dhankiisa, Mudane Xasan Cabdi Dheere ayaa uga mahadceliyay madaxda iyo xubnaha Ururka Towfiiq soo dhaweynta diirran ee loo sameeyay, isaga oo sheegay inuu ka go’an yahay u adeegidda shacabka degmada Hobyo iyo ka shaqeynta horumarka deegaanka haddii loo doorto xubinnimada Golaha Deegaanka.
Kulankan ayaa qeyb ka ah dhaq-dhaqaaqyada siyaasadeed ee ka socda gobolka Mudug, iyadoo musharraxiinta iyo ururrada siyaasadeed ay sii xoojinayaan ololahooda ku aaddan doorashooyinka goleyaasha deegaanka.
