جنان زفيرا

جنان زفيرا Informations de contact, plan et itinéraire, formulaire de contact, heures d'ouverture, services, évaluations, photos, vidéos et annonces de جنان زفيرا, Digital creator, Algiers Plage.

21/08/2026

#رسائلكــــــــم 🌙🌠
​مرت خويا راهي غضبانة، على جال كي تزوجت عندنا هي الكنة اللولا، وحنا ثلاثة خواتات متزوجات الحمد لله.
​ايا انا خويا خدام بعيد يجي غير مرة في سيمانتين. هي تنوض الصباح تخمل وتسيق وطيب فطور مع عشا، وكي يفطرو تغسل مواعين وصاااااي، من تم ميزيدوش يشوفوها! لا بغا يجي ضيف ولا نجو حنا متخرجش من شومبرتها، حتى لليل وتخرج تحط العشا (ولا تقلي بطاطا وتوجد السلاطة) وتغسل مواعين وتروح تغبر في شومبرتها تاني 🚪.
​ايا هاد المرة ختي الكبيرة قلعتلها، قاتلها: «الدار تبغي المقابلة، نتي غي خازنة في داك الغار!».
​قاتلها: «راني نقي ونسيق وندير قاع شغالاتي وندخل».
​قالتلها: «بصح كاين الرجال فدار راكي تعرفي، يدخلوا بصحابهم، بطيبهم، يجبدو ماعين يديرو سوندويش ولا قهوة، ولا يدخلوا تواليت ولا يدوشو... خاصك تقابلي هاد الصوالح! ماما ماراهيش عندها الصحة تاع تجري وراهم».
​ايا تعرفو طرطقت فيها غير طريقة معرفناهاش 💥!
​قاتلها: «امك ولدتهم وانا نجري مورهم؟! لي دخل دوش يلم موراه قشه ماشي يخلي حوايجو انا نرفدهم ملرض، ولي دخل تواليت ينقيه منقعدش نقيله موراه! وايلا هوما معفنون يدخلوا بصبابيطهم للدار انا مغديش نقعد ندور مورهم مجيتش فام دوميناج! ومغديش نسكن فكوزينة لي يحط كاس نغسله، امك ما علمتهمش النظام مغديش نعلمهم انا ضروك.. وكي نطيب فطور وعشا ونخلي العشا لوقته ونجي نلقاهم كلاوه مغديش نزيد نطيب الله يسهل عليهم! راني ندير شغلي على حسابي ومنيش مقصرة مدخليش روحك.. نتوما كل وحدة تجي تطلق روحها كي الضيفة وانا باغيني نقرض ضهري على صغري، نتي تاني هادي دار بوك شمري على يديك وشوفي ايلا تقدي عليهم!» 🔥
​ايا ختي حكمتها خبشتها من وجهها وتشادو مالشعر وطيحتها!
​ايا مرت خويا كانت حاميلة (اونسانت)، وراحت دارت شهادة طبية (سرتافيكا) وراهم شادينها في لاكلينيك باغي يطيح البيبي 💔🏥، وخويا اليوم يوصل فليل.
​راحتلها ماما قاتلها: «الله يخليك ما تشكيش بختك».
​ايا ضروك معرفناش واش نديرو، خفنا على ختي كي تشكي بيها واش يصرالها، وماما راهي طالعثلها لاطونسيون، وزيد خويا منعرف قاع واش غادي يدير 😭!
​ادعو معانا تسلك ختي مسكينة مكانش قصدها طيحلها البيبي 🥺💭

18/08/2026

#رسائلكــــــــم 🌙🌠
سلام عليكم اخوتي نسقسيكم، أنا عروسة جديدة ياربي 20 يوم 💍. مهم يمات راجلي غابت يومين ع دار، كي جات فريجيدار تعها يخسر خضرة وأنا من قبل شريت معها وشرات غير فاسدة.
دخلت تعيط وتسب فيا: «مسخة، معفونة، والوسخ والدود في داري!»، وتخبط طبسي وتعيط وتكسر 💥. مهم أنا مهدرتش معها.
لغدوة مينداك زادت دارت مشكل وقالت عليا: «رخيسة، خانزة، منسواش، كلبة جبتك من زنقة» (وأنا حمدالله عندي دارنا!)، وتعاير فيا: «مكيش بنت أصل ووالديك مش متربيين» 💔.
وتحرش في راجلي عليا قاتلو: «دخل عليك رجال!»، وقالتلي: «سحارة!»، وقالت لراجلي طلقها.
مع العلم انها من قبل كانت كاذبة على بابا بلي هدر عليا، ومام قالتلي اخت راجلي بنتها هادرة فيك... دارت فتنة! المهم انا فوتلها بصح بقات تطيحلي هدرة وترخس فيا 😔.
ومن بعدها ضربتني وقالتلو: «خرجها عليا!» وتكفر على ربي سبحانه، ومن بعدها طردتني برا الدار 🚪. وحتى تخيلو من قبل هاد المشكل رفدت دوبياس تاعي ووراتو لسلفي (خو راجلي) قالتلو: «شوف وش تخلي ف التوالت!» تخيلوووو 😳!
وأنا حلفت منوليش لديك الدار بيسك مشكل تافه بلا سبب، ودك راهي تقول: «حسبي الله ونعم الوكيل فيكم» وتدعي علينا 🤲.
اسكو حنا غالطين؟ واسكو أنا لازم نولي؟؟ وزعما على خضرة صح دير ڨاع هاكا؟؟ 🤔💭

15/08/2026

#رسائلكــــــــم 🌙🌠
لبنات نسقسيكم في حاجة 🤔 انا دوك عندي 6 شهر متزوجة زواج تقليدي علاقتي برأجلي الحمد الله مليحة، بصح لدوك مزال مداصرناش بعضانا بزاف، مزال كاين شوية حدود بيناتنا ونحشم منو في بزاف صوالح.
ايا لبارح كنا ساهرين ونحكيو خدينا راحتنا شوية فلهدرة، قلتلو: «نتا عجبك زواج؟ اسكو كيما كنت متخيلو في راسك واش عجبك واش ماعجبكش...» على اساس باش نطورو علاقتنا كثر 💬✨.
ايا قالي: «لحق انا كون جاو عندي دراهم مانديكش نتي، اصلا ندي وحدة شابة وعندها لاطاي، كي ندخل لدار ونشوفها ننسى كامل واش كاين برا.. الله غالب دراهم جابولي نتي، وحدة كيما حابها انا في خاطري تحتاج دراهم بزاف!» 💔💥
انا مابينتلوش بصح غاضتني بزاف وبغيت نطلق، ماحملتش نزيد نبقى معاه في نفس الدار 😭.
هذا سبب يستاهل طلاق ولا راني نزيد عليها؟ والله تلفتلي كامل وماحبيتش نحير دارنا 😔💭

15/08/2026

#رسائلكــــــــم 🌙🌠
أنا شوفور تاع كاميو، عندي كثر من 12 سنة وأنا ناكل فالطريق 🚛، رايح جاي وعمري ما خفت من والو. بصح ديك الليلة بدلتلي حياتي كامل 💔.
كنت جاي من ولاية ورايح لولاية، محمل السلعة والرموك معمر مليح. الطريق كانت خاوية ومظلمة كي القبر 🌌، غير الضواو تاع الكاميو تاعي هوما لي يشقو فالظلام، والراديو طافي خاطر السيكتور تمام ما يشدش الريزو 📵.
مع الزوج ونص تاع الليل، فبلاصة مقطوعة وخلاء مقفر، بانولي من بعيد السينيالات تاع الديباناج شاعلين فكاميو صغير واقف على جنب الطريق 🚨.
كي قربت، بانتلي وحدة واقفة حدا باب الكاميو وتشير بيديها باغية المعاونة. حنا ولاد الدومان نعرفو بلي طريق الجنوب صعيبة، وإذا لقيت واحد حابس فالليل عيب وحرام تخليه وتروح، خصوصاً إذا كانت مرا 🙋‍♀️.
ضربت الفران تاع الريح، وحبست الرموك قدامها بشوية، وهبطت وخليت الموتور يمشي. الجو كان بارد بزاف والبرد يصفر فالخلاء 🥶.
قربتلها وهي لابسة جلابة كحلة ومتغطية بالنقاب، وجهها ما يبانش مليح. قلتلها: «السلام عليكم ختي، كاين مشكل؟ واقفلكم الكاميو؟»
هي ما جاوبتش، غير واقفة وراسها هابط للأرض. قربت كثر، قلت يمكن مصدومة ولا خايفة.
ضرك ربي حط فيا الفضول، هبطت عيني لتحت باش نشوف إذا كاين الزيت يسيل ولا واش صاري... وتماك تجمد الدم فعروقي ووقفلي شعري كامل 😨!
جلابة تاعها كانت مرفودة شوية على الأرض من البرد، بصح تحت... ما كاين والو! لفراغ برك! ما كاين لا رجلين، لا صبابط، لا والو... كانت معلقة فالهواء ومثبتة غير فالفراغ! 🚨
قبل ما نستوعب الكارثة لي راني واقف قدامها، هزت راسها وتخزر فيا مباشرة. وجهها كان مشوه وعينيها كبار يبرقو كي القطط فالظلام 👁️👁️.
وفجأة، حلت فمها وبدات تضحك بضحكة هستيرية قوية بزاف، ضحكة مبحوحة تزلزل الودنين كي الرعد 👹! الصوت تاعها كان يولي الصدى تاعو فالخلاء كامل.
نا تماك ركابي فشلو وما قدرتش نتحرك، السخانة طلعتلي وقلبي نحسو راح يخرج من صدري 💔.
ربي هو لي عطاني القوة فديك اللحظة، درت وجهي وجريت للرموك كي المهبول 🏃‍♂️، طلعت وكسيريت بكل قوتي مع ان الرموك كان ثقيل بالسلعة وما يحبش يمشي بسرعة.
كي تخزرت فالمراية تاع الجنب وأنا هارب، الكاميو لي كان واقف اختفى ما بقا حتى أثر 💨! وبانتلي هي تمشي وتطير فالهواء مورايا، وضحكتها القوية باقية نسمع فيها فودني مع اني ساد الزجاج كامل ونكسيري بـ 100 🏎️.
وبقيت نمشي طاير فالطريق ونرعش ونبكي كي طفل صغير 😭، حتى وصلت لباراج تاع الجندارم. حبست تماك وخرجت نجري كي المهبول. لقاوني فحالة هستيرية والسخانة طالعة، وما بقيتش قادر حتى نهضر كي الناس.
من ديك الليلة، خليت السياقة والرموك 🛑، وما بقيتش نقدر نخرج من الدار كي يطيح الظلام...
خاطر ديك الضحكة وديك الخزرة تاعها وهي بلا رجلين باقية محفورة فدماغي وتخرجلي فالكوابيس كل ليلة 😱💭

13/08/2026

#رسائلكــــــــم 🌙🌠
اليوم عيطت لخويا قتلو: «والله غير راني مريضة نهار كامل ما نضتش ملفراش (نافس) وراجلي في الخارج، جيب مرتك وباتو معايا حتى يومين نهز روحي» 💔.
واحد الساعة سمعت طوموبيل تاعو حبست، دق دق فتحتلو الباب قتلوا: «وين هي مرتك؟»، قالي: «ديتها عند أمها». خزر فيا لقا عيني منفوخين قالي: «علاه كنتي تبكي؟»، قتلو: «غاضتني صحتي ما قدرتش نخدم، وحبة قاطو ما قدرتش نديرها نفرح بيها ولادي» 😭.
دخل للكوزينة شاف لماعن محطوطين، طلع على ذراعتيه انا نحلف وهو يحلف! غسلي لماعن ومساحلي البوتاجي، وراح لدوش وتوالات سيقهم 🧹🧼، وخرج قالي: «شوية ونولي».
راح شرالي كرتونة تاع قاطو فيها اشكال وانواع 🍩🍪، وشرالي عشاء واجد 🍽️ وقالي: «ليلة نبات عندكم» (أنا قتلو لبارح بايتة خايفة) 🥺.
بكيت بكيت! عرفت بلي بابا وميمتي الله يرحمهم كي ماتوا ما خلاونيش وحدي، خلاو خويا يحن عليا هذاك ما عندي 💞✨

12/08/2026

#رسائلكــــــــم 🌙🌠
سلام عليكم ، كي قرب العرس نتاع خويا بابا قرر يقسم بيناتنا وحد المكتوب كان مخبيه، كنت انا البنت الوحيدة وعندي 3 خاوتي... طاحتلي 120 مليون في حقي، وبابا زادلي 60 مليون من عندو، وخاوتي لخرين قلتلهم حابة نشري الذهب زادو مدولي 3 بيناتهم 💰.
يما قاتلي: «اشري الذهب وجيبيه نخبيه عندي، وبلاك يسمع راجلك!»، كي كنت خارجة جاني خويا الكبير قالي: «راجلك انسان زوالي عاونيه يخدم بيهم مديريش على يماك...»، وبابا تاني قالي: «هذا رزقك وبلاك تخسريهم، تتعاوني مع راجلك يرفد روحو والذهب مع الوقت يجي» ✨.
رحت للدار وفي الطريق قاعدة نخمم: نخبرو منخبروش، قلت كي نلحق ربي يعمل تاويل... حطني خويا وراح.
ايا جا من المرشي هو كان يخدم الخضر، يعيطلي مريومة، قالي: «واش مريومة داركم ليكداوك اليوم مبيتيش عندهم؟»، قتلو: «جيت ندي من عندك دراهم باه نوجد للعرستاع خويا...»، بدا يتمسحر بيا قالي: «تحبيهم دينار ولا أورو 🤣»، قتلو: «مهم مدلي برك». قالي: «والله مازدة راها اونبان والعرس مزال شهر، متعرفيش بلاك غدوي يفتح ربي ونمدلك تشري واش حابة...»
بعد العشاء، هذاك الميزان يتشارجا وقعد يحسب في الصرف باه غدوي يتسوق، قتلو: «كامل هذو الدراهم وحارمني!»، قالي: «دراهم الناس، اصبري كاش منصور نمدلك...»، قتلو: «كن متصورش؟»، قالي: «ندي نكسيك من عند المزابي» (كان عندنا واحد مزابي يبيع الشيفون 🤣). قتلو: «راك تتمسحر بيا»، قالي: «خليني نرقد ومن بعد يرحمها ربي».
انا قررت منقولوش... غدوي من ذاك كي جا، قلت نشري من دراهمي ونخبرو بلي سلفت علي مرت خويا دراهم. تغدينا حتي قتلو: «راني سلفت علي مرت خويا دراهم باه نشري»، خزر فيا وقالي: «متجيبيهمش انا نمدلك...»، قتلو: «ياخي مازدة اونبان؟»، قالي: «انت واش دخلك!»، جبدلي 2 ملايين دايرهم وحدهم قالي: «اليوم كي كملت السوق درتهم علي جالك»، وهذاك نهار صور 300 الف معناها مدلي من راس المال 🥹❤️.
قالي: «مهم مريومة تفوت العرس وتكون لالة النساء!»، قتلو: «انت متشري والو؟»، قالي: «معندي منشري، دوك نزيد كاش منخبي نمد لخوك مليون في عرسو»، وقالي: «والله راني نصرف فوق طاقتي... باه انت متحسيش بالنقص ولا تقول فوت عرس خويا بلا لبسة ومرحتش للحفافة».
صلي الظهر وراح يرقد وانا قعدت نخمم، قالي: «كاش بابور نتاع سلعة غرقلك 🤣»، بلا منعبى قتلو: «حابة نعاونك...»، قالي: «جامي شفت وحدة فقيرة كل يوم تسرقلي في الصرف تعاوني 😅»، قتلو: «نوض نحكيلك»، ايا صارحتو قتلو: «نمدهلمك وبيع مازدة واشري حاجة مليحة تخدم بيها». قالي: «هذا رزقك وداركم واش يقولو...»، قتلو: «هذا حقي وواحد ميدخل روحو فيه»، قالي: «بعد العرس نحكي».
حضر للعرس فوتناه فرحنا وشحال وقف مع دارنا 👏، بعد العرس قرر يبيع المازدة ويروح للسوق يشرى حاجة مليحة... دار حادث مرور بيها وتقاس في رجلو ورقبتو 💔.
دوك مراهش يقدر يخدم، صح واقفة معاه ومنخليش وحدو بصح كي نشوف وجهو علبالي غايضاتو نتخوتي يجيبو القضيان وهو مراه قادر يدير والو... شحال من خطرة يقولي: «ادعيلي نرتاح ونرجع نخدم والله مني حاب واحد يعاوني».
ادعولي ربي يشفيه ويرزقنا بالذرية الصالحة ان شاء الله 🤲❤️ وشكرا هذا واش عندى حكاية.

منقول من تطبيق كلارا ❌
09/08/2026

منقول من تطبيق كلارا ❌

04/08/2026

#رسائلكــــــــم 🌙🌠
لبنات جيت نشاوركم... كان خاطبني واحد وبطلت معاه بسبب الخيانة والتحلاب في فيسبوك، وبقى يحاول فيا، فرجعت معاه بالتخبية على دارهم ودارنا. 💔
تلاقيت بيه وفركتت تليفونو، لقيتو يحكي مع البنات! كي سقسيتو على طفلة لقيتو حاكي معاها ساعة، فكلي التليفون وضربني على عيني... كان لابس خاتم، عينيا زراقت وحنكي تاني زراق وقريب تعميت منها وطيّحلي! 🤕💥
رحت من ثما وما زدتِش هدرت معاه، والحكاية عندها شهرين. بقى يحاول يعيط ويطلب السماح بصح أنا شغل حكمني شوك، وين نتفكر كي ضربني نزيد نحقد عليه.
دُك بعثلي ميساج قالي: "حاولت معاك، صايي نخليك وما نزيدش نحوس عليك".
وانا تقلقت وندمت وحكمني تأنيب الضمير كي ما لديتش عليه في هادو الشهرين... بانتلي أنا لي غلطت كي ما لديتش، كون لديت ما يروحش! 🤦‍♀️🥺

03/08/2026

#رسائلكــــــــم 🌙🌠
اليوم أخت راجلي نجحت وخذات الديبلوم تاعها. قلت بيني وبين روحي نديرلها مفاجأة صغيرة على قد حالي، خاطر والله ما عنديش بزاف، بصح حبيت نفرحها. 🎓✨
خرجت قضيت، حضرت كيكة بسيطة فالدار، طيبت الدجاج، خبزت الخبز، وشريت ديسير والمشروبات، ودرت كل واش قدرت عليه. 🎂🍗تك عيطتلهم وعرضت عليهم الغدا، وحماتي قالتلي: "إنشاء الله راح نجو."
من بعد جا راجلي، وكنا متخاصمين من البارح. أصلاً كنت قلتلو بلي عازمة ختو باش نديرلها مفاجأة، وما قال حتى كلمة. دخل دوش، لبس، وقاللي: "لبسي الولد." لبست ولدي وقلتلو: "وين راك رايح؟ ما راكش راح تبقى؟ راه راح يجو، عيب ما يلقاوكش فالدار." خرج غلق الباب وما جاوبني حتى بكلمة! 🚪🤦‍♂️
بقيت نستنى من الثلاثة، ونعيطلهم وما كان حتى واحد يرد. بقيت حتى للخمسة، ومن بعد فهمت بلي ما راحش يجي حتى واحد... بصح والله ما تخيلتش يديروها معايا هكا! 📱❌
وزيد من بعد كي دخلت للستوريات، شفت كامل العائلة فالاحتفال، دارين حفلة كبيرة كراو فيلا وراهم يحتافلو بنجاح أخت راجلي، وأنا حتى واحد ما قالي، حتى واحد ما خبرني، وخلاوني نحضر ونطيب ونستنى بالساعات! 📸💔
والله حسيت بالحقرة والذل، ماشي على خاطر الحفلة، بصح على خاطر الطريقة اللي تصرفو بيها. عمري ما غلطت معاهم، لا بكلمة ماشي مليحه ولا بتصرف يجرحهم، وديما نحاول نكون مليحة معاهم. بصح اليوم حسيت روحي ما عندي حتى قيمة عندهم، وربي وحده يعلم شحال وجعني هاد الموقف. 🥺💔
واش رايكم في هاذ التصرف؟ وكيفاه تتصرف لوكان صراتلك حادثة كيما هذي؟ 💬👇

28/07/2026

#رسائلكــــــــم 🌙🌠
سلام بنات انصخوني وش ندير انا و راجلي متفتهمين معندناش مشاكل بصح حياة زوجية عايشين كيما الخاوة درك راهو في 8 شهر مقــ .ربليش راني مع رقية لقيت روحي موخــ .ذة كفاه ندير مع راجلي. 😔💔
لبنات خفت نخــ .سرو و بيناتنا زوج ولاد والله يا لبنات جامي حكمت عليه خيــ .انة ولا تليفونو فيه حاجة بالعكس من لخدمة لدار المسجد هادي هي حياتو. 🕌🏠
و انا زينة و مطهليا في روحي و في داري و في ولادي خدامة معندو ما خصني انصخوني وش ندير انا ااختكم 😢🤲

Adresse

Algiers Plage

Site Web

Notifications

Soyez le premier à savoir et laissez-nous vous envoyer un courriel lorsque جنان زفيرا publie des nouvelles et des promotions. Votre adresse e-mail ne sera pas utilisée à d'autres fins, et vous pouvez vous désabonner à tout moment.

Raccourcis

Partager

Type