CNI URDU

20/08/2025

پاکستان پریس کلب یوکے مڈلینڈز کی جانب سے بشارت عباسی اور رمضان چغتائی کے اعزاز میں استقبالیہ

برمنگھم (سی این آئی اردو) پاکستان پریس کلب یوکے مڈلینڈز برانچ کے زیراہتمام روزنامہ اوصاف کے چیف ایڈیٹر بشارت عباسی اور روزنامہ آوازہ کے چیف ایڈیٹر محمد رمضان چغتائی کے اعزاز میں ایک پرتکلف استقبالیہ تقریب کا انعقاد کیا گیا۔ پروگرام کی صدارت پاکستان پریس کلب مڈلینڈز کے صدر راجہ ناصر محمود نے کی، جبکہ قونصل جنرل پاکستان برمنگھم فہد امجد، سابق رکن پارلیمنٹ خالد محمود مرزا، صدر چکسواری پریس کلب مرزا نذیر احمد، مرکزی سیکریٹری جنرل پاکستان پریس کلب برطانیہ ساجد یوسف، مرکزی مجلس عاملہ کے اراکین سرفراز موسیٰ اور امجد بیگ سمیت کمیونٹی کی ممتاز شخصیات نے شرکت کی۔

تقریب کا آغاز تلاوت کلام پاک سے ہوا جس کی سعادت صاحبزادہ فاروق القادری نے حاصل کی۔ افتتاحی خطاب پاکستان پریس کلب مڈلینڈز کے سابق صدر اور ایگزیکٹو ممبر سید عابد کاظمی نے کیا جنہوں نے پاکستانی صحافیوں کے کردار اور کمیونٹی میں ان کے مثبت اثرات کو اجاگر کیا۔

قونصل جنرل فہد امجد اور دیگر مقررین نے کہا کہ صحافت ریاست کا چوتھا ستون ہے اور برطانیہ میں خصوصاً پاکستان پریس کلب یوکے سے وابستہ صحافی کمیونٹی کو جوڑے رکھنے اور پاکستان کے مثبت تشخص کو اجاگر کرنے میں نمایاں کردار ادا کر رہے ہیں۔

اس موقع پر مرکزی سیکریٹری جنرل ساجد یوسف نے ممبر مجلس عاملہ پاکستان پریس کلب مڈلینڈز برانچ آصف محمود براہٹلوی کو مرکز کی منظوری سے پاکستان پریس کلب برطانیہ کے سیکریٹری جنرل لٹریری اینڈ کلچرل فورم نامزد کرنے کا اعلان کیا، جس پر ہال تالیوں سے گونج اٹھا۔ تقریب کی نظامت سیکریٹری جنرل عادل اعظم نے کی۔

پروگرام میں مڈلینڈز برانچ کے سینئر نائب صدر ابرار مغل، نائب صدر عبدالماجد، فنانس سیکریٹری نائلہ عظمت، سیکریٹری انفارمیشن معین احمد، اور اراکین مجلس عاملہ سمیت کمیونٹی رہنماؤں کی بڑی تعداد موجود تھی۔ شرکاء میں راجہ فہیم کیانی، پروفیسر محمود رضا، راجہ فضل الرحمن، انجم جرال، کونسلرز ثاقب خان، عامر خان، راشد خان اور دیگر شامل تھے۔

تقریب کے دوران پاکستان پریس کلب یوکے مڈلینڈز برانچ نے پیکا ایکٹ کے تحت نیشنل پریس کلب کی سیکریٹری جنرل نئیر علی، جوائنٹ سیکریٹری سحرش قریشی، ماہرہ عمران اور شکیلہ جلیل کے خلاف قائم مقدمات پر مذمتی قرارداد بھی منظور کی۔

اختتام پر اسلامک سنٹر آف گریٹ بریٹن کے چیئرمین پیر محمد طیب الرحمن قادری نے پاکستان پریس کلب کے کردار کو خراج تحسین پیش کیا اور حالیہ بارشوں سے جاں بحق افراد کے لیے خصوصی دعا کرائی۔

19/08/2025

https://youtu.be/BiHaOPFh65c?si=AhBSwj-qBhnZcPaE

Travel agents exploiting innocent people with false promises of sending them abroad | Watch CNI News special report ...

19/08/2025

https://youtu.be/d38UQNXOuwA?si=YzJdhLciybu-Wbjs

CNI News Bulletin Headlines & Top Stories – 19/08/2025 | Latest UK Urdu News & Reports | CNI News ...

19/08/2025

والسال میں پاکستان پریس کلب مڈلینڈز کے عہدیداران کے اعزاز میں پروقار عشائیہ——
پاکستان پریس کلب مڈلینڈز کا کردار قابلِ تحسین، برمنگھم کا جشنِ آزادی یورپ کا سب سے بڑا پروگرام قرار

والسال (رپورٹ: سی این آئی نیوز)والسال کے ریسٹورنٹ محفل میں سماجی، سیاسی اور کاروباری شخصیت راجہ فاروق خان کی جانب سے پاکستان پریس کلب مڈلینڈز کے نو منتخب عہدیداران کے اعزاز میں پرتکلف ڈنر دیا گیا۔ اس تقریب میں آزاد کشمیر پولیس آفیسر راجہ آصف سمیت کمیونٹی کی ممتاز شخصیات اور پریس کلب کے عہدیداران نے بڑی تعداد میں شرکت کی۔

تقریب کے دوران پریس کلب مڈلینڈز کے صدر راجہ ناصر محمود، سیکرٹری جنرل عادل اعظم، ایگزیکٹو ممبران سید عابد کاظمی، آصف محمود براہٹلوی، سینئر نائب صدر ابرار مغل، مرکزی ایگزیکٹو ممبران سرفراز موسیٰ اور امجد بیگ، نائب صدر ماجد حسین، اور ممبران محمد بشارت و عمران بشیر کا پرجوش استقبال کیا گیا۔

عشائیے کے دوران برطانیہ کی سیاسی صورتحال اور مقامی کمیونٹی کو درپیش مسائل پر کھل کر تبادلہ خیال کیا گیا۔ شرکاء نے اس بات پر زور دیا کہ کمیونٹی کے اندر پائے جانے والے مسائل کے حل کے لیے اجتماعی حکمت عملی اپنانا ضروری ہے۔ اس حوالے سے مختلف تجاویز بھی سامنے آئیں تاکہ مسائل کو خوش اسلوبی سے حل کیا جا سکے۔

شرکاء نے 14 اگست 2025 کو برمنگھم میں پاکستان پریس کلب مڈلینڈز اور سی این آئی نیوز نیٹ ورک کے زیر اہتمام ہونے والی یوم آزادی کی تقریب کو یوکے اور یورپ کی سب سے بڑی تقریب قرار دیا۔ اس موقع پر اتحاد و یکجہتی کا پیغام دینے اور پاکستان کے مثبت امیج کو اجاگر کرنے میں پریس کلب کے کردار کو زبردست الفاظ میں خراج تحسین پیش کیا گیا۔

تقریب کے میزبان راجہ فاروق خان نے پریس کلب مڈلینڈز کی کاوشوں کو سراہتے ہوئے کہا کہ میڈیا کمیونٹی کا اصل چہرہ دنیا کے سامنے لانے میں اہم کردار ادا کر رہا ہے۔ انہوں نے خصوصی طور پر چودہ اگست کے پروگرام کے آرگنائزر سید عابد کاظمی اور سی این آئی نیوز نیٹ ورک کو کامیاب پروگرام منعقد کرنے پر مبارکباد پیش کی۔

تقریب میں سی این آئی اردو کی جانب سے خصوصی کوریج کی گئی جبکہ شرکاء نے تصاویر اور سیلفیوں کے ذریعے اس پروقار تقریب کو یادگار بنا دیا۔

19/08/2025

18/08/2025

ماربل آرچ لندن میں 47واں سالانہ جلوسِ چہلم امام حسینؑ، برطانیہ بھر سے ہزاروں عزاداروں کی شرکت

لندن (سی این آئی نیوز)وسطی لندن کے معروف علاقے ماربل آرچ اور ہائیڈ پارک سے ملحقہ شاہراہوں پر چہلم امام حسینؑ کے موقع پر ہزاروں عزادارانِ امام حسینؑ کی شرکت کے ساتھ لبیک یا حسینؑ کی صداوں نے دن بھر فضا کو معطر کیے رکھا۔ برطانیہ بھر سے مرد و خواتین اور کم سن بچے قافلوں کی صورت میں شریک ہوئے اور شہدائے کربلا کی یاد میں اشکبار ہو کر درود و سلام کا نذرانہ پیش کیا۔

یہ چہلم امام حسینؑ کا 47واں سالانہ جلوس اور مجالس حسینی اسلامک ٹرسٹ یوکے کے زیر اہتمام منعقد ہوا۔ جلوس میں شبیہ ذوالجناح، شبیہ تابوت اور شبیہ روضہ امام حسینؑ برآمد کیے گئے، جبکہ لندن اور گردونواح کی مختلف اسلامی تنظیموں کی جانب سے کھانے پینے، اسلامی کتب اور دیگر اسٹالز لگائے گئے، جہاں عزاداران کے لیے تمام اشیاء مفت تقسیم کی گئیں۔

شرکاء نے اس موقع پر کہا کہ وہ ہر سال اپنے بچوں کے ساتھ اس جلوس میں اس لیے شرکت کرتے ہیں تاکہ نئی نسل تک درسِ کربلا منتقل ہو، اور اسلامی شعائر و تعلیمات سے جڑے رہنے کے ساتھ ساتھ شہدائے کربلا کی عظیم قربانیوں کی یاد کو تازہ رکھا جا سکے۔

علمائے کرام نے مجالس کے دوران اخوت، بھائی چارے اور انسانیت کے پیغام کو اجاگر کرتے ہوئے موجودہ حالات میں فلسطین اور جموں و کشمیر کے مظلوم مسلمانوں کے لیے خصوصی دعائیں کیں۔ علما نے مرد و خواتین کو سیرتِ امام حسینؑ اور جناب زینبؑ پر عمل پیرا ہونے کی تلقین کی۔

اس بار گزشتہ برسوں کی نسبت عزاداران کی تعداد میں نمایاں اضافہ دیکھنے میں آیا۔ نمازِ ظہرین کے بعد مجلس اور جلوس کا آغاز ہوا جو ہائیڈ پارک کے اطراف سے گزرتا ہوا شام سات بجے دوبارہ ماربل آرچ پر اختتام پذیر ہوا۔

لندن میں برپا یہ قدیمی جلوس نہ صرف شہدائے کربلا کی یاد کو زندہ کرنے کا ذریعہ بنا بلکہ برطانیہ بھر کی کمیونٹی کے لیے اتحاد، قربانی اور ایثار کے پیغام کی تجدید بھی کرتا رہا۔

17/08/2025

صدر پیپلز پارٹی آزاد کشمیر چوہدری محمد یٰسین کے نواسے شہریار فاروق کی دعوتِ ولیمہ برمنگھم میں منعقد،—-مہمان چوہدری محمد یٰسین اور عامر یٰسین کے ساتھ تصاویر بنواتے رہے، دلہا کا تعارف پس منظر میں رہا۔

برمنگھم (رپورٹ: سی این آئی نیوز)پاکستان پیپلز پارٹی آزاد کشمیر کے صدر چوہدری محمد یٰسین کے نواسے، وزیر حکومت آزاد کشمیر عامر یٰسین چوہدری اور ممبر ضلع کونسل شاہنواز یٰسین کے بھانجے شہریار فاروق کی دعوتِ ولیمہ برمنگھم کے کرسٹل میرج ہال میں نہایت شاندار انداز میں منعقد ہوئی۔

تقریب میں عزیز و اقارب، قریبی دوستوں اور معزز مہمانوں نے فیملیز سمیت بڑی تعداد میں شرکت کی۔ ہال مہمانوں سے کچھا کچھ بھرا رہا اور جگہ کی کمی کے باعث مزید نشستیں لگانی پڑیں۔

اس موقع پر آزاد کشمیر میرپور سے بطور خاص معروف سیاسی و سماجی شخصیت چوہدری اشرف اور معروف سنگر نعیم ہزاروی نے بھی شرکت کی، جن کی آمد نے تقریب کو مزید وقار بخشا۔

شرکاء تقریب کے دوران چوہدری محمد یٰسین اور عامر یٰسین کے ساتھ تصاویر بنواتے رہے، جس کی وجہ سے کئی مواقع پر دلہا شہریار فاروق کا تعارف پس منظر میں رہا۔ تاہم محفل کی جان چوہدری محمد یٰسین بنے رہے جنہوں نے انتہائی خوش اسلوبی سے میزبانی کے فرائض سرانجام دیے اور کھانے کے دوران ہر میز پر جا کر مہمانوں سے فرداً فرداً ملاقات کی، جسے حاضرین نے بے حد سراہا۔

شرکاء نے تقریب کو ایک یادگار اور خوبصورت اجتماعی لمحہ قرار دیا، جس نے برمنگھم میں کشمیری و پاکستانی کمیونٹی کو ایک ساتھ جوڑنے میں اہم کردار ادا کیا۔

16/08/2025

برطانیہ میں ڈپٹی وزیراعظم و وزیر خارجہ سینیٹر اسحاق ڈار کا سرکاری دورہ شروع

لندن (سی این آئی نیوز) ڈپٹی وزیراعظم و وزیر خارجہ سینیٹر محمد اسحاق ڈار اپنے تین روزہ سرکاری دورے (17 تا 19 اگست 2025) پر برطانیہ پہنچ گئے، جہاں ہائی کمشنر پاکستان برطانیہ ڈاکٹر محمد فیصل نے ان کا پرتپاک استقبال کیا۔

سرکاری ذرائع کے مطابق اپنے قیام کے دوران ڈپٹی وزیراعظم / وزیر خارجہ برطانیہ کی ڈپٹی وزیراعظم اینجلا رینر، پاکستان کے لیے پارلیمانی انڈر سیکرٹری آف اسٹیٹ ہیمش فالکنر، لارڈ واجد خان اور دولتِ مشترکہ کی سیکرٹری جنرل شیئرلی ایوکر بوچوے سے ملاقاتیں کریں گے۔ ان ملاقاتوں میں دو طرفہ تعلقات، علاقائی اور عالمی امور پر تبادلۂ خیال ہوگا۔

ترجمان کے مطابق اس دورے کا بنیادی مقصد پاکستان اور برطانیہ کے درمیان تعلقات کو مزید مضبوط بنانا، ڈیجیٹل ٹیکنالوجی، مصنوعی ذہانت اور انٹرپرینیورشپ میں تعاون کو فروغ دینا اور دولتِ مشترکہ کے ساتھ روابط کو مزید وسعت دینا ہے۔

دورے کے دوران برطانوی ارکان پارلیمان، کشمیری رہنما اور پاکستانی نژاد کمیونٹی کے نمائندے بھی ڈپٹی وزیراعظم / وزیر خارجہ سے ملاقات کریں گے تاکہ باہمی دلچسپی کے امور اور کمیونٹی کے مسائل پر گفتگو کی جا سکے۔

علاوہ ازیں ڈپٹی وزیراعظم / وزیر خارجہ پاکستان ہائی کمیشن لندن میں پنجاب لینڈ ریکارڈ اتھارٹی کے پائلٹ پراجیکٹ اور آئی ایم پاس کے ون ونڈو آپریشن کا افتتاح بھی کریں گے، جس سے اوورسیز پاکستانیوں کو براہِ راست سہولت میسر آئے گی۔

15/08/2025

چیف جسٹس آزاد کشمیر راجہ سعید اکرم کے اعزاز میں لندن میں ظہرانہ، برطانیہ کی قانونی برادری سے ملاقاتیں

لندن (سی این آئی نیوز)چیف جسٹس آزاد جموں و کشمیر راجہ سعید اکرم کے اعزاز میں ممتاز قانون دان ڈاکٹر بیرسٹر طارق محمود کی جانب سے لندن میں ایک پروقار ظہرانے کا اہتمام کیا گیا۔ اس موقع پر چیف جسٹس نے لنکنز اِن، لا سوسائٹی آف انگلینڈ اینڈ ویلز اور رائل کورٹس آف جسٹس کا خصوصی دورہ بھی کیا۔

تقریب میں برطانیہ کی ممتاز قانونی شخصیات شریک ہوئیں جن میں بیرسٹر طارق کھوکھر، بیرسٹر اظہرچوہان، ایڈیشنل چیف سیکرٹری راجہ امجد پرویز، بیرسٹر اَرمَان عالم، سولیسٹر محمد موسیٰ، بیرسٹر قمر بلال، بیرسٹر محمد احمد، چوہدری نوشیروان، چوہدری ذوالقرنین اور راجہ افتخار علی خان شامل تھے۔

تقریب سے خطاب کرتے ہوئے چیف جسٹس راجہ سعید اکرم نے برطانیہ کی قانونی برادری، بالخصوص پاکستانی اور کشمیری نژاد وکلاء کی قانون کے میدان میں کامیابیوں کو سراہا۔ انہوں نے کہا کہ یہ امر خوش آئند ہے کہ ہمارے نوجوان قانون کے شعبے میں نہ صرف برطانیہ بلکہ بین الاقوامی سطح پر بھی نمایاں خدمات انجام دے رہے ہیں۔

چیف جسٹس نے مسئلہ کشمیر پر بھی تفصیلی گفتگو کی اور اس کے حل کے لیے بین الاقوامی فورمز پر مؤثر آواز بلند کرنے کی ضرورت پر زور دیا۔ انہوں نے بتایا کہ آئندہ سال ایک بین الاقوامی کانفرنس منعقد کرنے کا منصوبہ ہے جس کی صدارت وہ خود کریں گے۔اس دوران سی این آئی اردو کی جانب سے لی گئیں تصاویر ۔

15/08/2025

برطانیہ بھر میں تحریک کشمیر برطانیہ کے زیرِ اہتمام یومِ سیاہ کے احتجاجی مظاہرے

برمنگھم (سی این آئی نیوز)تحریک کشمیر برطانیہ کی کال پر برطانیہ کے مختلف شہروں میں بھارت کے یومِ آزادی کو یومِ سیاہ کے طور پر مناتے ہوئے احتجاجی مظاہرے اور اجتماعات منعقد کیے گئے۔ مظاہروں میں شرکاء نے کشمیر پر بھارتی فوجی قبضے کے خلاف بینرز اور پلے کارڈز اٹھا رکھے تھے اور آزادی، حقِ خود ارادیت اور بھارتی مظالم کے خاتمے کے حق میں نعرے بلند کیے۔

برمنگھم میں ہونے والے احتجاج کی قیادت راجہ قمر عباس اور چوہدری اکرام الحق نے کی۔ لوٹن سنٹرل میں احتجاجی مظاہرے کی قیادت چوہدری محمد شفاعیت پوٹھی اور چوہدری محمد قربان نے کی، جبکہ لوٹن اوک روڈ میں نکالی گئی ریلی کی قیادت فرخ مراد قریشی اور ساجد ملک نے کی۔

احتجاجی مظاہروں میں صدر تحریک کشمیر یورپ محمد غالب، سابق میئر لوٹن ریاض بٹ، پروفیسر ممتاز بٹ، چوہدری محمد شریف، ڈاکٹر پروفیسر افتخار بٹ، مولانا ظفر اللہ شاہ، اقدس مغل، حافظ محمد ادریس، چوہدری اللہ دتہ، جاوید اعوان ملک، طلعت بصیر، محمد عتیق اور اشتیاق چوہدری سمیت اہم سیاسی، سماجی اور مذہبی شخصیات نے خصوصی شرکت کی۔

مقررین نے خطاب کرتے ہوئے کہا کہ جب تک بھارت کشمیری عوام کو ان کا پیدائشی حقِ خود ارادیت فراہم نہیں کرتا اور اپنی فوجیں مقبوضہ کشمیر سے نہیں ہٹاتا، تب تک دنیا بھر کے کشمیری بھارت کے یومِ آزادی کو یومِ سیاہ کے طور پر مناتے رہیں گے۔ انہوں نے عالمی برادری، بالخصوص اقوام متحدہ سے مطالبہ کیا کہ وہ اپنی قراردادوں کے مطابق مسئلہ کشمیر کا فوری اور منصفانہ حل نکلوائے۔

دوسری جانب جمعہ کے خطبات میں مفتی فضل احمد قادری، مفتی عبدالمجید ندیم اور دیگر علما کرام نے بھارتی مظالم کی سخت الفاظ میں مذمت کی اور اقوام متحدہ سے مسئلہ کشمیر کے حل کے لیے سنجیدہ اقدامات اٹھانے کا مطالبہ کیا۔ علما نے کشمیر اور فلسطین کے شہدا کے لیے خصوصی دعائیں بھی کرائیں۔