24/08/2026
DHINAWDA WAA QAYB KA MID AH GALMUDUG.
Anigoo ah Wasiir Dowlaha wasaarada waxbarashada Galmudug, kana mid ah siyaasiyiinta matala deegaanka Dhinawda, waxaan si cad u muujinayaa mowqifkayga ku aaddan xogta wararka ku saabsan booqashada Madaxweynaha Puntland uu ku tagayo Dhinawda iyo Degaano Katirsan Galmudug.
Dhinawda iyo deegaanada hoosyimaada waa deegaano ka tirsan Dowlad-goboleedka Galmudug, waxaana aaminsanahay in arrimaha maamulka, siyaasadda iyo masiirka deegaankaas lagu saleeyay rabitaanka iyo go'aanka dadka deegaanka iyo hay'adaha dastuuriga ah ee Galmudug.
Booqasho kasta oo loo yimaado shacabka Soomaaliyeed waa arrin aan si guud u soo dhaweyn karno, balse booqasho siyaasadeed oo maamul ama Mas'uul puntland ah ka sameeyo deegaan ka tirsan Galmudug, iyadoo aan la helin is-afgarad iyo isku-duwid ay ku lug leeyihiin hay'adaha Galmudug, waxay dhalin kartaa walaac iyo faham ah in faragelin lagu sameynayo arrimaha gudaha ee Galmudug.
Waxaan si gaar ah ugu baaqayaa dhammaan dhinacyada ay khusayso Madax iyo shacaba inay ilaaliyaan xuduudaha maamul, madax-bannaanida go'aannada deegaanada iyo nabadda walaaltinimo ee shacabka Labada Maamul.
Puntland iyo Galmudug waa laba maamul oo deris ah, shacabka labada dhinacna waxaa ka dhexeeya xigto, dhaqan, ganacsi iyo taariikh wadaag. Sidaas darteed, ma doonayno in khilaaf siyaasadeed ama booqasho colaad hurin ah ay dhaawacdo xiriirka maamulada.
Mowqifkaygu ma aha inaan ka hor imaado walaaltinimada iyo isu-socodka shacabka labada Maamul, balse waxa aan difaacayaa waa xaqa deegaanka aan kamid ahay masuuliyiinta ku metala Galmudug.
Waxaan ugu baaqayaa Maamulka Puntland inuu ixtiraamo maamulka iyo hay'adaha Galmudug, isla markaana haddii booqashadu tahay mid rasmi ah, lagu saleeyo wada-tashi, is-afgarad iyo ixtiraam labada maamul ah.
Deegaanka Dhinawda wuxuu leeyahay maamul si Dastuuri ah uga tirsan Galmudug, waana dad leh rabitaan siyaasadeed, iyo masuuliyiin u taagan ilaalinta danihiisa.
Dhinawda waa hoygeena, degmo ahaan waa qayb ka mid ah Galmudug.
Waxaan u taaganahay waajibna ah inaan si nabad ah, sharci ah oo mas'uuliyad leh u difaaco danaha iyo karaamada dadka aan matalo.
Wasiiru Dowlaha Waxbarashada Galmudug
Inside Galmudug
