MNNNEWS, Manchester (2025)

29/11/2025

فیفا عرب کپ قطر 2025: عرب دنیا کا سب سے بڑا فٹبال ایونٹ پیر سے شروع-16 ٹیمیں ٹائٹل کی دوڑ میں شامل

اسپورٹس ڈیسک (ایم این این) – عرب دنیا کا سب سے بڑا فٹبال ٹورنامنٹ فیفا عرب کپ 2025 آج پیر سے قطر میں شروع ہو رہا ہے، جس میں ایشیا اور افریقہ کی 16 ٹیمیں حصہ لے رہی ہیں۔ افتتاحی میچ میں تیونیسیا اور شام کی ٹیمیں آمنے سامنے ہوں گی۔ یہ ایونٹ ہر چار سال بعد منعقد ہوتا ہے اور مجموعی طور پر 32 میچز کھیلے جائیں گے، جبکہ فائنل 18 دسمبر کو لوسیل اسٹیڈیم میں شیڈول ہے۔

مرحلہ وار شیڈول اس طرح ہے:
گروپ اسٹیج: یکم سے 9 دسمبر
کوارٹر فائنلز: 11 اور 12 دسمبر
سیمی فائنلز: 15 دسمبر
تیسری پوزیشن کا میچ: 18 دسمبر
فائنل: 18 دسمبر

قطر اس سے قبل 1998 اور 2021 میں بھی عرب کپ کی میزبانی کر چکا ہے، جبکہ یہ حالیہ ختم ہونے والے انڈر 17 ورلڈ کپ کے بعد ملک میں ہونے والا دوسرا بڑا فیفا ایونٹ ہے۔ ٹورنامنٹ کے لیے چھ ورلڈ کپ استعمال شدہ اسٹیڈیم منتخب کیے گئے ہیں، جن میں سے ال بایت اسٹیڈیم میں افتتاحی اور لوسیل اسٹیڈیم میں فائنل ہوگا۔

منتخب اسٹیڈیم اور شہروں کی فہرست
لوسیل سٹی: لوسیل اسٹیڈیم (گنجائش 88966)
الریان: احمد بن علی اسٹیڈیم (گنجائش 45032)
الخَور: ال بایت اسٹیڈیم (گنجائش 68895)
دوحہ: اسٹیڈیم 974 (گنجائش 44089)
ایجوکیشن سٹی: ایجوکیشن سٹی اسٹیڈیم (گنجائش 44667)
دوحہ: خلیفہ انٹرنیشنل اسٹیڈیم (گنجائش 45857)

ٹورنامنٹ میں شرکت کرنے والی ٹیمیں چار گروپس میں تقسیم ہیں
گروپ اے: تیونیسیا، شام، قطر، فلسطین
گروپ بی: مراکش، کوموروس، سعودی عرب، عمان
گروپ سی: مصر، کویت، اردن، متحدہ عرب امارات
گروپ ڈی: الجزائر، سوڈان، عراق، بحرین

فلسطین نے کوالیفائی کیسے کیا؟
فلسطین نے دوحہ میں کھیلے گئے پلے آف میں لیبیا کو پنالٹی پر 3-4 سے شکست دے کر ٹورنامنٹ میں جگہ بنائی۔ میچ مقررہ وقت میں 0-0 سے برابر رہا جس کے بعد شوٹ آؤٹ میں فلسطین نے کامیابی حاصل کی۔ کوچ ایہاب ابو جزر نے کہا کہ یہ سخت ترین پلے آف تھا، لیکن فلسطینی عوام کے لیے یہ فتح خوشی کا ذریعہ بنی۔

انہوں نے کہا کہ ہمارا مقصد صرف مقابلہ نہیں بلکہ اپنی قوم کے لیے خوشی اور پیغام پہنچانا ہے۔ ٹیم اب ایشیا میں بڑی شناخت رکھتی ہے اور ورلڈ کپ پلے آف تک پہنچنے کے قریب رہی تھی۔

ٹورنامنٹ کا انعامی بجٹ
فیفا عرب کپ 2025 کی انعامی رقم 36.5 ملین ڈالر سے زائد رکھی گئی ہے جو کہ گزشتہ 2021 ایڈیشن کے 25.5 ملین ڈالر سے کہیں زیادہ ہے۔

ناک آؤٹ مرحلے میں گروپ کی دو بہترین ٹیمیں کوارٹر فائنلز میں جگہ بنائیں گی۔ برابر میچ کی صورت میں 30 منٹ کا اضافی وقت دیا جائے گا اور پھر فیصلہ پنالٹی شوٹ آؤٹ سے ہوگا۔

ٹائٹلز کی دوڑ
عراق چار مرتبہ عرب کپ جیت کر سب سے کامیاب ٹیم ہے، جبکہ سعودی عرب دو ٹائٹلز کے ساتھ دوسرے نمبر پر ہے۔ تیونیسیا، مصر، مراکش اور الجزائر ایک ایک بار فاتح رہ چکے ہیں۔ دفاعی چیمپئن الجزائر 2021 میں تیونیسیا کو اضافی وقت میں 0-2 سے ہرا کر ٹائٹل جیتا تھا۔

فیفا ورلڈ کپ 2026 سے قبل یہ عرب کپ ٹیموں کی صلاحیت دکھانے کا بہترین موقع ہوگا۔ سات ٹیمیں یعنی قطر، تیونیسیا، مراکش، سعودی عرب، مصر، اردن اور الجزائر آئندہ ورلڈ کپ میں بھی شرکت کریں گی۔

ایونٹ کے اہم کھلاڑی
اردن کے علی اولوان جنہوں نے ورلڈ کپ کوالیفائرز میں نو گول کیے، توجہ کا مرکز ہوں گے۔ عراق کے ایمن حسین آٹھ گول کے ساتھ خطرناک فارورڈ ثابت ہو سکتے ہیں۔ تیونیسیا کے گول کیپر ایمان دہمن سات کلین شیٹس کے ساتھ مضبوط دفاع کی علامت ہیں۔ قطر کے اکرام عفیف اور سعودی کپتان سالم الدوسری بھی بڑے ناموں میں شامل ہیں۔

ٹکٹس اور نشریات
ٹورنامنٹ کے ٹکٹس ستمبر کے آخر میں فروخت کے لیے پیش کیے گئے جن کی کم از کم قیمت 7 ڈالر رکھی گئی۔ ٹیم پیکجز 20 ڈالر سے شروع تھے، تاہم اب فروخت ختم ہو چکی ہے جبکہ فائنل کے ٹکٹس 14 ڈالر سے شروع ہوئے اور مکمل طور پر سولڈ آؤٹ ہو چکے ہیں۔

مشرق وسطیٰ اور شمالی افریقہ میں عرب کپ 1 سے 18 دسمبر تک بی اِن اسپورٹس پی پی وی پر براہ راست دیکھا جا سکے گا۔

29/11/2025

سیلاب اور طوفان- انڈونیشیا میں ہلاکتیں 303 , سری لنکا 132 ہلاک , تھائی لینڈ میں 162 افراد جاں بحق

ویب ڈیسک (MNN) – سری لنکا میں طوفان ڈٹوہ نے شدید تباہی مچادی۔ ملک بھر میں ہولناک سیلاب اور بارشوں کے باعث کم از کم 132 افراد جان کی بازی ہار گئے جبکہ متعدد اب بھی لاپتہ ہیں۔ حکام نے آئندہ بارہ گھنٹوں میں مزید سیلاب کا خدشہ ظاہر کیا ہے۔

حکام کے مطابق مشرقی اور وسطی علاقوں میں 300 ملی میٹر سے زائد بارش کے نتیجے میں لینڈ سلائیڈنگ نے زیادہ جانی نقصان کیا۔ ڈیزاسٹر مینجمنٹ سینٹر کا کہنا ہے کہ ملک بھر میں تقریباً 44 ہزار افراد متاثر ہوئے جبکہ کئی شہری اسکولوں اور سرکاری پناہ گاہوں میں رہائش پذیر ہیں۔

آبپاشی کے محکمے نے خبردار کیا ہے کہ جنوبی اور مشرقی علاقوں میں سیلاب مزید پھیل سکتا ہے، جبکہ سری لنکا کے دارالحکومت کولمبو کے مختلف حصے پہلے ہی زیرِ آب ہیں۔ کولمبو اسٹاک ایکسچینج میں کاروبار قبل از وقت معطل کردیا گیا۔ اسکول اور ریلوے سروسز بھی بند رہیں۔ فوج اور پولیس نے بڑے پیمانے پر انخلا کارروائیاں کیں، جن میں پولونارووا کے پل پر پھنسے 13 افراد کو ہیلی کاپٹر کے ذریعے نکالا گیا۔

میڈیا کو جاری کی گئی ویڈیوز میں متاثرہ خاندانوں کو چھتوں سے اور ایک شخص کو ناریل کے درخت سے لفٹ کرتے ہوئے دکھایا گیا۔ شدید بارشوں کے باعث کولمبو کے بندرانائیک انٹرنیشنل ایئرپورٹ کی پروازیں متاثر ہوئیں اور 15 فلائٹس کو بھارت کے تریوانڈرم اور کوچین ایئرپورٹس پر موڑ دیا گیا۔

سری لنکا کی امداد کے لیے بھارت نے 6.5 میٹرک ٹن خوراک فراہم کی ہے جبکہ ملک میں 20 ہزار سے زائد فوجی اور پولیس اہلکار امدادی سرگرمیوں میں مصروف ہیں۔ کولمبو کے نواحی علاقوں میں بڑھتے ہوئے پانی کے باعث مزید انخلا جاری ہے۔

دوسری جانب انڈونیشیا میں صورتحال زیادہ سنگین ہے، جہاں سیلاب اور لینڈ سلائیڈنگ کے باعث ہلاکتوں کی تعداد بڑھ کر 303 ہو گئی ہے، جبکہ 279 افراد لاپتہ ہیں۔ ملائیشیا اور تھائی لینڈ بھی گزشتہ ایک ہفتے سے طوفانی بارشوں اور نایاب مالاکا سمندر طوفان کی زد میں ہیں۔ انڈونیشیا کے جزیرہ سماٹرا میں 80 ہزار سے زائد افراد بے گھر ہوگئے۔

شمالی سماٹرا میں راستے اور رابطے منقطع ہونے سے امدادی کام شدید متاثر ہے، ہیلی کاپٹر کے ذریعے سامان پہنچایا جا رہا ہے جبکہ سب سے زیادہ متاثرہ علاقوں تک رسائی بحال کرنے کی کوششیں جاری ہیں۔ کچھ مقامات پر شہریوں کی جانب سے امدادی سامان لوٹنے کی اطلاعات بھی سامنے آئی ہیں۔

دریں اثناء تھائی لینڈ کے جنوبی علاقوں میں سیلاب سے اموات کی تعداد 162 ہو گئی ہے۔

29/11/2025

سکردو میں شدید سردی، ہائی لینڈز میں درجہ حرارت منفی 14 ڈگری سینٹی گریڈ تک

سکردو، گلگت بلتستان (MNN) – سکردو کی خوبصورت وادی شدید سردی کی لپیٹ میں ہے، جہاں آبادی والے علاقوں میں درجہ حرارت منفی 11 ڈگری سینٹی گریڈ تک گر گیا ہے اور آس پاس کے پہاڑی علاقوں میں یہ منفی 14 ڈگری تک پہنچ گیا، ذرائع نے ہفتہ کو بتایا۔

صاف اور دھوپ والے دنوں کے باوجود شدید سردی میں کوئی کمی نہیں آئی، جس کی وجہ سے مشہور سیاحتی وادی شدید سردی کی لپیٹ میں ہے۔ بہت سے رہائشی گھروں میں محصور ہو گئے ہیں اور صبح کے وقت گھنے دھند کی وجہ سے مرکزی راستوں پر ٹریفک کی روانی متاثر ہو رہی ہے۔ سردی کے اثرات کی وجہ سے سیاحتی سرگرمیوں میں واضح کمی دیکھی گئی ہے۔

گرتے ہوئے درجہ حرارت کے سبب لکڑی اور ایل پی جی کی طلب میں اضافہ ہو گیا ہے، جبکہ بجلی کی بار بار بندش نے مقامی لوگوں کی مشکلات میں اضافہ کر دیا ہے۔ محکمہ موسمیات نے خبردار کیا ہے کہ آنے والے دنوں میں سردی مزید شدید ہونے کا امکان ہے اور موسم خشک اور سخت سرد رہے گا۔

دریں اثنا، ناران وادی کے مشہور مقام بابوسر ٹاپ پر شدید برفباری کی وجہ سے بٹاکنڈی سے چوٹی تک سڑک مکمل طور پر بند کر دی گئی ہے۔ حکام نے سیاحوں کو صرف 11 بجے سے 2 بجے تک لیک سیف الملوک اور بٹاکنڈی تک محدود سفر کی اجازت دی ہے تاکہ برفیلے راستوں پر حادثات کے خطرات کم ہوں۔

محکمہ موسمیات نے یہ بھی پیش گوئی کی ہے کہ دسمبر کے پہلے ہفتے میں کاغان، ناران اور بابوسر ٹاپ میں مزید برفباری کا امکان ہے جو تقریباً چار دن تک جاری رہ سکتی ہے۔

29/11/2025

غیر قانونی آن لائن جوا کیس میں شریک ملزم سبحان کی بریت کی درخواست مسترد

لاہور (MNN) – لاہور کی مقامی عدالت نے ہفتہ کو آن لائن جوئے کی ایپس کی مبینہ غیر قانونی تشہیر سے متعلق کیس میں شریک ملزم سبحان کی بریت کی درخواست مسترد کر دی۔ عدالت نے یوٹیوبر سعد الرحمٰن المعروف ڈکی بھائی اور دیگر ملزمان کے خلاف کارروائی 17 دسمبر تک ملتوی کر دی۔

عدالتی کارروائی کے دوران جوڈیشنل مجسٹریٹ نعیم وٹو نے تمام ملزمان کو آئندہ سماعت پر فردِ جرم عائد کرنے کیلئے طلب کر لیا۔ سماعت میں ڈکی بھائی اور شریک ملزمہ عروب جٹائی عدالت میں پیش ہوئیں۔

دفاع کی جانب سے بتایا گیا کہ سبحان نے بریت کی درخواست دائر کر رکھی تھی۔ ڈکی بھائی نے عدالت کو بتایا کہ سبحان نے گرفتاری سے صرف تین ماہ قبل ان کی ٹیم جوائن کی تھی اور اسے ایک لاکھ روپے تنخواہ پر رکھا گیا تھا، جبکہ اس کا کیس سے کوئی تعلق نہیں۔

جج نے عروب جٹائی کی قبل از گرفتاری ضمانت سے متعلق پوچھا تو ڈکی بھائی کے وکیل نے بتایا کہ ان کی ضمانت پہلے ہی منظور ہو چکی ہے۔ عدالت نے دیگر زیر التواء درخواستوں کے بارے میں بھی استفسار کیا۔

وکیل دفاع نے بتایا کہ ضبط شدہ موبائل فونز اور الیکٹرانک ڈیوائسز کی واپسی کے لیے درخواست دائر کی گئی ہے جو اس وقت نیشنل سائبر کرائم انویسٹی گیشن ایجنسی (NCCIA) کے پاس موجود ہیں، جبکہ چار کریڈٹ کارڈز اور نقدی کی واپسی کی بھی گزارش کی گئی ہے۔

سائبر کرائم ایجنسی نے ڈکی بھائی اور دیگر ملزمان کے خلاف جوئے کی ایپس کی مبینہ غیر قانونی تشہیر پر مقدمہ درج کر رکھا ہے۔ کیس کی سماعت 17 دسمبر تک مؤخر کر دی گئی۔

29/11/2025

پنجاب میں دو روز میں 1,005 زمینوں کے تنازعات نمٹا دیے گئے، ریکارڈ پیشرفت

لاہور (MNN) – پنجاب حکومت نے غیر قانونی قبضوں کے خاتمے کی مہم کے تحت صرف دو دن میں 1,005 زمینوں کے تنازعات حل کر لیے، جسے حکام نے ایک نمایاں سنگ میل قرار دیا ہے۔

ہفتے کو وزیراعلیٰ مریم نواز کی زیر صدارت اعلیٰ سطح اجلاس میں ان مقدمات کے فوری فیصلوں سے متعلق تفصیلی رپورٹ پیش کی گئی۔ اجلاس میں نئے پراپرٹی آرڈیننس پر عملدرآمد کا جائزہ لیا گیا، جس کا مقصد فیصلہ سازی میں تیزی اور جائز مالکان کو فوری قبضہ دلانا ہے۔

وزیراعلیٰ مریم نواز نے ہدایت کی کہ زمین سے متعلق معاملات میں کسی قسم کی تاخیر، سفارش یا غفلت برداشت نہیں کی جائے گی۔ انہوں نے کہا کہ خواتین سے متعلق کیسز کو ترجیح دی جائے اور ہر حکم کے ساتھ فوری قبضے کا عمل یقینی بنایا جائے۔

مریم نواز کا کہنا تھا کہ فیصلہ اس وقت تک نامکمل رہتا ہے جب تک حق دار کو عملی طور پر زمین کا قبضہ نہ مل جائے۔ رپورٹ کے مطابق کئی خاندان جو برسوں عدالتوں میں مقدمے لڑتے رہے، انہیں 48 گھنٹوں کے اندر ان کی زمین واپس دلوا دی گئی۔

وزیراعلیٰ نے کہا کہ صوبے کی زمین صرف اس کے جائز مالک کی ہے خواہ وہ ایک مرلہ ہو، ایک کنال یا ایک ایکڑ۔ انہوں نے شہریوں سے کہا کہ قبضہ مافیا کے خلاف شکایات براہ راست ڈپٹی کمشنر کو دیں، جس پر اب چند دنوں میں فیصلہ ممکن ہوگا۔ مریم نواز نے آرڈیننس پر سخت عملدرآمد اور پنجاب میں املاک کے حقوق کے تحفظ کے عزم کا اعادہ کیا۔

29/11/2025

فن لینڈ کا پاکستان، افغانستان اور میانمار میں سفارتخانے بند کرنے کا اعلان

ویب ڈیسک (ایم این این) – فن لینڈ نے اعلان کیا ہے کہ وہ 2026 تک پاکستان، افغانستان اور میانمار میں اپنے سفارتخانے بند کر دے گا۔ وزارت خارجہ کی جانب سے جاری بیان میں کہا گیا کہ یہ فیصلہ انتظامی اور اسٹریٹجک وجوہات کی بنیاد پر کیا گیا ہے، جو متعلقہ ممالک کی سیاسی صورتحال اور فن لینڈ کے ساتھ محدود معاشی و تجارتی تعلقات سے جڑا ہے۔

بیان کے مطابق اسلام آباد، کابل اور یانگون میں موجود سفارتی مشنز کو بند کرنے کی تیاریاں پہلے ہی شروع ہو چکی ہیں۔ یہ اقدام فن لینڈ کے سفارتی نیٹ ورک کی ازسرنو تشکیل اور مشنز کی تعداد کم کر کے وسائل ان ممالک میں استعمال کرنے کی پالیسی کا حصہ ہے جہاں اسے اپنے خارجہ و تجارتی مفادات زیادہ نظر آتے ہیں۔

وزارت نے مزید کہا کہ سفارتخانوں کی بندش سے متعلق فیصلے صدر مملکت کے حکم نامے کے تحت کیے جاتے ہیں۔ فن لینڈ کی وزیر خارجہ ایلینا والوٹونن نے کہا کہ عالمی ماحول تیزی سے بدل رہا ہے اور نئے حالات میں زیادہ مؤثر اور مقابلے کے قابل سفارتی ڈھانچہ قائم کرنے کی ضرورت ہے۔

حکام کا کہنا ہے کہ مقصد ان ممالک پر توجہ مرکوز کرنا ہے جو مستقبل میں فن لینڈ کی اقتصادی، سلامتی اور خارجہ ترجیحات کے لیے زیادہ اہمیت رکھتے ہیں۔ یاد رہے کہ فن لینڈ نے 2012 میں بھی مالی مشکلات کے باعث اسلام آباد مشن بند کیا تھا جسے 2022 میں دوبارہ فعال کیا گیا۔ 2023 میں سویڈن نے بھی سیکیورٹی وجوہات کی بنیاد پر اسلام آباد میں اپنا سفارتخانہ غیر معینہ مدت کے لیے بند کر دیا تھا۔

29/11/2025

افغان چیک پوسٹوں سے فائرنگ دہشت گردوں کی دراندازی کیلئے ہوتی ہے، ڈی جی آئی ایس پی آر

راولپنڈی (ایم این این) – ڈی جی آئی ایس پی آر لیفٹیننٹ جنرل احمد شریف چوہدری نے انکشاف کیا ہے کہ افغان سکیورٹی فورسز سرحدی چیک پوسٹوں پر فائرنگ کر کے پاکستان میں دہشت گردوں کی دراندازی کا راستہ بناتی ہیں۔ 25 نومبر کو میڈیا بریفنگ میں، انہوں نے بتایا کہ سرحد دونوں ملکوں کی مشترکہ ذمہ داری ہے مگر افغانستان کی جانب سے پہلے فائرنگ اور پھر دہشت گردوں کو راستہ دیا جاتا ہے۔

انہوں نے کہا کہ تیرہ اور خیبر جیسے علاقوں میں نہ عدالتی نظام ہے نہ ریاستی عمل داری، جس سے سرحدی نگرانی مشکل ہو جاتی ہے۔

29 قبائل سرحد کے دونوں جانب رہتے ہیں، اسی لیے آمد و رفت کو مکمل طور پر روکنا مشکل ہے۔ انہوں نے بتایا کہ باروائر یا فینس اکیلی کافی نہیں جب تک اس کی نگرانی اور فائر کور نہ ہو۔ سرحد ہر دو کلومیٹر پر پوسٹ بنانا اور ڈرون مانیٹرنگ جیسے اقدامات بھاری لاگت کا تقاضا کرتے ہیں۔

لیفٹیننٹ جنرل احمد شریف نے کہا کہ ٹی ٹی پی کے سیل پاکستان کے اندر موجود ہیں جو اسمگلروں اور کارروائیوں میں مدد دیتے ہیں۔ نان کسٹم پیڈ گاڑیاں، جن کی تعداد تقریباً 4 سے 4.5 لاکھ بتائی گئی، دہشت گردی میں استعمال ہوتی ہیں اور انہیں روکنے کی ذمہ داری صوبائی سطح پر نظر نہیں آتی۔

افغانستان سے مذاکرات کے حوالے سے انہوں نے کہا کہ پاکستان نے ثبوت دیے اور افغان فریق انہیں جھٹلا نہیں سکا۔ پاکستان تیسرے فریق کے ذریعے تصدیقی میکنزم پر بھی آمادہ ہے۔ انہوں نے امریکی رپورٹ کا حوالہ دیا جس کے مطابق 2021 میں 7.2 ارب ڈالر کا عسکری سامان افغانستان میں رہ گیا۔ طالبان ریاست میں خود کو منتقل کرنے میں ناکام رہے اور متعدد تنظیموں کو جگہ مل گئی۔

انہوں نے کہا کہ ہمارا مسئلہ افغان عوام نہیں بلکہ طالبان انتظامیہ سے ہے، اسی لیے تجارتی روابط بھی سکیورٹی کی بنیاد پر محدود کیے گئے ہیں۔ پاکستان پر فضائی حملوں کے افغان الزامات بھی مسترد کیے گئے۔ انہوں نے کہا کہ پاکستان کے لیے "اچھا دہشت گرد" کوئی نہیں۔

انہوں نے بتایا کہ اس سال 9 لاکھ 71 ہزار سے زائد غیر قانونی افراد واپس بھیجے گئے، جن میں 2 لاکھ 39 ہزار صرف نومبر میں۔

بھارت کے حوالے سے انہوں نے کہا کہ نئی دہلی حقیقت کے برعکس شکست کو فتح بنا کر پیش کر رہا ہے۔ انہوں نے کہا کہ کوئی بھی ملک جو طالبان کو اسلحہ دے گا، دراصل دہشت گردوں کو دے رہا ہے۔ انہوں نے سوشل میڈیا اکاؤنٹس کے ذریعے پاکستان مخالف بیانیہ پھیلانے کی کوششوں کی نشاندہی بھی کی۔

خیبر پختونخوا میں نان کائنیٹک حکمت عملی اور عوامی رابطے میں کمی بتائی گئی۔ انہوں نے کہا کہ مقامی حکومتی سطح پر اقدامات بڑھانا ضروری ہے۔ ڈی جی کے مطابق 35 اضلاع میں 949 ترقیاتی منصوبے جاری ہیں جبکہ ایرانی ڈیزل کی اسمگلنگ 20.5 ملین لیٹر یومیہ سے کم ہو کر 2.7 ملین پر آگئی ہے۔

آپریشنز کی تفصیل میں بتایا گیا کہ 4 نومبر سے اب تک 4,910 آئی بی اوز کیے گئے، اور جنوری سے 67,023 آپریشنز میں 206 دہشت گرد مارے گئے۔ رواں برس ملک میں 4,729 دہشت گرد حملے ہوئے، جن میں اکثریت خیبر پختونخوا میں ریکارڈ کی گئی۔

29/11/2025

مصر کا غزہ ISF کا مینڈیٹ جنگ بندی کی نگرانی تک محدود رکھنے پر زور؛ پاکستان سے تعمیرِ نو میں وسیع تر کردار کی توقع

اسلام آباد (MNN) – مصری وزیرِ خارجہ بدر عبدالاطی نے کہا ہے کہ غزہ کے لیے مجوزہ انٹرنیشنل اسٹیبلائزیشن فورس (ISF) کا اصل مقصد جنگ بندی کی نگرانی اور سرحدوں کا تحفظ ہونا چاہیے، جبکہ انہوں نے پاکستان سے غزہ کی تعمیرِ نو اور بحالی میں زیادہ فعال کردار ادا کرنے کی خواہش ظاہر کی۔

اسلام آباد پہنچنے کے بعد میڈیا سے گفتگو کرتے ہوئے انہوں نے کہا کہ فورس کا مینڈیٹ امن کے قیام تک محدود ہو، نہ کہ طاقت کے ذریعے امن منوانے تک۔ انہوں نے بتایا کہ فورس کے طریقہ کار، حصہ لینے والے ممالک اور سیکیورٹی ضمانتوں پر اب بھی بات چیت جاری ہے۔ ان کا بیان ایسے وقت سامنے آیا ہے جب چند روز قبل وزیر خارجہ اسحاق ڈار نے پہلی بار اعلان کیا تھا کہ پاکستان ISF کے لیے فوجی دستے فراہم کرنے پر آمادہ ہے۔

بدر عبدالاطی نے بتایا کہ مصر غزہ کی تعمیر نو کے لیے ایک کانفرنس کی میزبانی کر رہا ہے اور پاکستان سے توقع ہے کہ وہ صرف مالی امداد نہیں بلکہ نجی شعبے کی شمولیت، ٹیکنیکل تعاون اور طبی امداد کے ذریعے بڑا کردار ادا کرے۔ انہوں نے کہا کہ غزہ میں تقریباً پچاس ہزار مریض فوری توجہ کے منتظر ہیں۔

انہوں نے کہا کہ مصر اور پاکستان اس نکتے پر متفق ہیں کہ پائیدار امن کا واحد راستہ ایک خودمختار فلسطینی ریاست کا قیام ہے۔

غزہ کے علاوہ انہوں نے کہا کہ دونوں ممالک کے مذاکرات میں سوڈان میں بگڑتی صورتحال، ایران کے جوہری تنازع اور علاقائی کشیدگی میں کمی بھی زیر بحث آئے گی۔ انہوں نے زور دیا کہ تمام تنازعات کا حل سیاسی اور سفارتی ہونا چاہیے۔

دو طرفہ شعبوں پر بات کرتے ہوئے انہوں نے تجارت میں اضافہ، سرمایہ کاری میں وسعت اور ساؤتھ-ساؤتھ تعاون کو مزید آگے بڑھانے پر زور دیا۔ انہوں نے بتایا کہ پاکستان-مصر بزنس کونسل کی بحالی اور کراچی یا قاہرہ میں مشترکہ بزنس فورم کے انعقاد پر غور جاری ہے۔ علاوہ ازیں توانائی، زراعت، ٹیکسٹائل، آئی ٹی، مصنوعی ذہانت، فوڈ پراسیسنگ، پیٹروکیمیکلز، دفاعی پیداوار، انسدادِ دہشت گردی اور غیر قانونی ہجرت کے خلاف تعاون بڑھانے کی ضرورت پر بھی اتفاق کیا گیا۔

29/11/2025

پاکستان نے سری لنکا کو چھ وکٹوں سے شکست دے کر ٹرائی سیریز کا ٹائٹل اپنے نام کر لیا

اسلام آباد – راولپنڈی کرکٹ اسٹیڈیم میں ہفتہ کو کھیلے گئے فائنل میں پاکستان نے سری لنکا کو آسانی سے چھ وکٹوں سے شکست دے کر ٹرائی نیشن سیریز جیت لی۔ میزبان ٹیم نے 115 رنز کا ہدف 18.4 اوورز میں حاصل کر لیا، جس کا کریڈٹ عمدہ بولنگ اور بعد ازاں سائم ایوب اور بابراعظم کی ذمہ دارانہ بیٹنگ کو دیا گیا۔

سائم ایوب نے 36 رنز (33 گیندیں) بنا کر اننگز کو مستحکم بنیاد فراہم کی جبکہ بابر اعظم 37 رنز (34 گیندیں) بنا کر ناٹ آؤٹ رہے اور آخری لمحے میں دشمنتھا چمیرا پر پوائنٹ کے ذریعے خوبصورت چوکا لگا کر فتح مکمل کی۔

محمد نواز شاندار کارکردگی پر میچ اور سیریز کے بہترین کھلاڑی قرار پائے۔ انہوں نے کہا کہ بطور اسپنر سادگی اور حالات کے مطابق بولنگ کرنا ہی کامیابی کی کنجی ہے۔

کپتان سلمان آغا نے ٹیم کی کارکردگی پر اطمینان کا اظہار کیا اور کہا کہ گزشتہ دو ماہ میں جنوبی افریقہ اور سری لنکا کے خلاف نتائج حوصلہ افزا رہے ہیں۔ انہوں نے کہا کہ ورلڈ کپ سے قبل ٹیم کمبی نیشن کے لیے تمام کھلاڑیوں کو مواقع دیے جا رہے ہیں، جبکہ پندرہ رکنی اسکواڈ تقریباً طے ہو چکا ہے۔

سری لنکن کپتان داسن شاناکا نے اعتراف کیا کہ ان کی ٹیم بہتر کھیل پیش نہیں کر سکی اور آئندہ سیریز سے پہلے کئی پہلوؤں پر کام کرنا ہوگا۔ تاہم انہوں نے مشارا، نسانکا، مینڈس، چمیرا، تھکشنا اور ہسرنگا کی کارکردگی کو مثبت قرار دیا۔

اس سے قبل سری لنکا نے 10 اوورز میں 81 رنز بنا کر مضبوط آغاز کیا تھا مگر نواز (3-17)، ابرار احمد (2-18) اور سائم ایوب (1-17) نے اسکور روک کر میچ بدل دیا، جس کے بعد شاہین شاہ آفریدی (3-18) اور سلمان مرزا نے باقی بیٹسمینوں کو پویلین بھیج دیا اور پوری ٹیم 19.1 اوورز میں 114 پر آؤٹ ہو گئی۔

29/11/2025

پاکستان کا غزہ امن فورس میں دستے بھیجنے پر آمادگی، مگر حماس کے غیر مسلح کرنے سے لاتعلقی; قطر نے ممکنہ افغان کارروائی رکوا دی، اسحاق ڈار

ویب ڈیسک (MNN) – نائب وزیر اعظم و وزیر خارجہ اسحاق ڈار نے کہا ہے کہ پاکستان غزہ میں مجوزہ بین الاقوامی استحکام فورس (ISF) میں اپنی افواج بھیجنے کے لیے تیار ہے، تاہم پاکستان کسی ایسی کاروائی کا حصہ نہیں بنے گا جس کا مقصد حماس یا کسی بھی فلسطینی مزاحمتی گروہ کو غیر مسلح کرنا ہو۔

وزارت خارجہ میں پریس بریفنگ سے خطاب کرتے ہوئے وزیر خارجہ نے واضح کیا کہ پاکستان کا کردار امن قائم رکھنے تک محدود ہوگا، نہ کہ امن نافذ کرنے تک۔ ان کا کہنا تھا کہ کسی بھی عسکری گروہ کو غیر مسلح کرنے کی ذمہ داری فلسطینی اداروں پر ہی عائد ہوتی ہے اور پاکستان اس سلسلے میں حصہ نہیں لے گا۔ پاکستان کی شرکت ISF کے مینڈیٹ اور قواعد و ضوابط طے ہونے کے بعد ہی حتمی شکل اختیار کرے گی۔

اقوام متحدہ کی سلامتی کونسل نے حال ہی میں امریکہ کی تیار کردہ قرار داد منظور کی ہے جس میں سابق امریکی صدر ڈونلڈ ٹرمپ کا 20 نکاتی امن منصوبہ بھی منسلک ہے۔ قرارداد کے مطابق غزہ میں استحکام کے لیے زیادہ تر مسلم ممالک پر مشتمل عالمی فورس تشکیل دی جائے گی۔ پاکستان سمیت 13 ممالک نے قرارداد کے حق میں ووٹ دیا جبکہ روس اور چین نے غیر جانبداری اختیار کی۔ دوسری جانب حماس نے قرارداد کو مسترد کرتے ہوئے کہا کہ غیر ملکی فورس کی تعیناتی اور غیر مسلح کرنے کا مقصد قابل قبول نہیں۔

ڈار کے مطابق انڈونیشیا 20 ہزار فوجی فراہم کرنے کی پیشکش کر چکا ہے جبکہ پاکستان بھی اصولی طور پر آمادہ ہے۔ یاد رہے کہ گزشتہ ماہ وزیر دفاع خواجہ آصف نے سرکاری ترجمان دانیال چوہدری کے اس بیان کی سخت تردید کی تھی جس میں دعویٰ کیا گیا تھا کہ پاکستان حماس کے اسلحہ چھوڑوانے میں کردار ادا کرے گا۔

غزہ میں وسیع تباہی کے بعد تعمیر نو، اقتصادی بحالی اور عبوری حکمرانی کی تجاویز بھی قرارداد کا حصہ ہیں، مگر اسرائیل نے فلسطینی ریاست کی راہ کھلنے کے امکان کو پہلے ہی رد کر دیا ہے۔

افغانستان سے متعلق گفتگو میں وزیر خارجہ نے انکشاف کیا کہ پاکستان افغانستان میں دہشت گرد عناصر کے خلاف فوجی کارروائی کے انتہائی قریب تھا، لیکن قطر نے مداخلت کرکے فوری طور پر کشیدگی بڑھنے سے روک دیا۔ انہوں نے بتایا کہ قطر کی وزارت خارجہ مسلسل رابطے میں رہی اور پاکستان سے kinetic کارروائی مؤخر کرنے کی درخواست کی، جس پر وزیر اعظم اور عسکری قیادت نے اتفاق کیا۔ تاہم قطر اور ترکی کی ثالثی کے باوجود مذاکرات سے کوئی خاطر خواہ نتیجہ نہ نکل سکا۔

ڈار نے افغان طالبان حکومت کو انتباہ کیا کہ عدم تعاون اور دہشت گردی کے تسلسل کی صورت میں ایسا وقت بھی آسکتا ہے جب مسلمان اور غیر مسلم ممالک مل کر دہشت گرد نیٹ ورکس کے خلاف یکجا ہو جائیں۔ انہوں نے کہا کہ طالبان کے اندر بھی دو سوچیں پائی جاتی ہیں، ایک مفاہمت چاہتی ہے جبکہ دوسری جارحانہ رویے کی حامی ہے۔ انہوں نے بتایا کہ اقوام متحدہ کی درخواست پر پاکستان انسانی امداد کی بحالی پر سنجیدگی سے غور کر رہا ہے اور وزیر اعظم کی منظوری باقی ہے۔

یورپی یونین کے جی ایس پی پلس جائزے پر بات کرتے ہوئے ڈار نے کہا کہ پاکستان نے تقریباً تمام شرائط پر خاطر خواہ پیش رفت کر لی ہے جبکہ چند قانونی نکات موجودہ پارلیمانی اجلاس میں طے ہونے کی امید ہے۔ انہوں نے کہا کہ یورپی مبصرین پاکستان کا مثبت جائزہ رپورٹ کر کے واپس جائیں گے۔

اماراتی ویزوں کے معاملے پر وزیر خارجہ نے بتایا کہ یو اے ای حکام نے بارہا جرائم میں ملوث پاکستانیوں پر تشویش ظاہر کی ہے، یہاں تک کہ ایک وقت ایسا بھی آیا جب سرکاری افسران کے ویزے بھی مسترد ہوئے۔ انہوں نے کہا کہ بیرون ملک منظم بھیک مانگنے کے گروہوں سمیت مجرمانہ سرگرمیاں اس مسئلے کی بنیادی وجہ ہیں۔ مسافروں کی آف لوڈنگ کی رپورٹس وزیر داخلہ محسن نقوی کو بھجوا دی گئی ہیں، مگر مسائل کے خاتمے کے لیے ان جرائم کا سدباب ناگزیر ہے۔

29/11/2025

اسلام آباد: نومبر میں ایف بی آر ٹیکس ہدف حاصل نہ کر سکا، 156 ارب روپے کا شارٹ فال

فیڈرل بورڈ آف ریونیو (ایف بی آر) نومبر 2025 میں بھی مقررہ ٹیکس ہدف پورا کرنے میں ناکام رہا۔ ایف بی آر ذرائع کے مطابق نومبر میں ٹیکس وصولی 1 ہزار 34 ارب روپے کے ہدف کے مقابلے میں 878 ارب روپے رہی، جس کے نتیجے میں 156 ارب روپے کا شارٹ فال سامنے آیا۔

ذرائع کا کہنا ہے کہ ماہِ نومبر کے شارٹ فال میں ایک دن میں تقریباً 5 ارب روپے تک کمی کی توقع کی جا رہی ہے، جبکہ دسمبر 2025 کے لیے 1406 ارب روپے کا ٹیکس ہدف مقرر کیا گیا ہے۔

رواں مالی سال کے پہلے پانچ ماہ کی کارکردگی بھی ہدف سے پیچھے رہی۔ اس عرصے میں 5083 ارب روپے کے ہدف کے مقابلے میں ٹیکس وصولی 4715 ارب روپے رہی، یوں مجموعی طور پر 413 ارب روپے کا شارٹ فال ریکارڈ کیا گیا۔

ذرائع کے مطابق ٹیکس وصولی کو بہتر بنانے اور ہدف کے قریب پہنچنے کے لیے ایف بی آر دفاتر آج بھی کھلے رہیں گے۔

28/11/2025

نہال ہاشمی ممکنہ طور پر سندھ کے نئے گورنر، کامران ٹیسوری کی جگہ لینے کی تیاریاں

ویب ڈیسک (MNN) – میڈیا رپورٹس کے مطابق وفاقی حکومت نے سندھ کے گورنر کامران ٹیسوری کو عہدے سے ہٹانے کا فیصلہ کر لیا ہے جبکہ مسلم لیگ (ن) کے سینئر رہنما نہال ہاشمی کو نیا گورنر مقرر کیے جانے کا امکان ہے۔

ذرائع کا کہنا ہے کہ وزیر اعظم شہباز شریف نے گورنر سندھ کی تبدیلی کی سمری ایوان صدر کو بھجوا دی ہے، جہاں اسے آج موصول بھی کر لیا گیا۔ صدرِ مملکت کی منظوری کے بعد نہال ہاشمی پیر یا منگل کو عہدے کا حلف اٹھا سکتے ہیں۔

یہ پیش رفت اسلام آباد میں کئی ہفتوں سے جاری سیاسی مشاورتوں کے بعد سامنے آئی ہے۔

اطلاعات کے مطابق نئی تقرری اتحادی جماعتوں کے درمیان پاور شیئرنگ فارمولا کا حصہ ہے، جس کے تحت دو صوبوں کی گورنری پاکستان پیپلز پارٹی جبکہ دو مسلم لیگ (ن) کو دی جائے گی۔

کامران ٹیسوری — جو 2022 سے گورنر کے عہدے پر فائز ہیں — سے اس تبدیلی کے عمل کے تحت عہدہ چھوڑنے کی درخواست کی گئی ہے۔

MNNNEWS

29/11/2025

29/11/2025

29/11/2025

29/11/2025

29/11/2025

29/11/2025

29/11/2025

29/11/2025

29/11/2025

29/11/2025

29/11/2025

28/11/2025

Address

Telephone

Website

Alerts

Contact The Business

Shortcuts

Share

Category