13/08/2025
Safiirkii dalka Jamhuuriyadda Somaliland h**e ugu fadhiyey dalalka Imaaraadka Carabta iyo Kenya Ambassador Baashe Cawil Cumar, ayaa ka hadlay iskaashiga dhinacyada kala duwan leh ee dhexmari kara dalalka Somaliland iyo Maraykanka, isagoo rajo fiican ka muujiyey hadalkii ka soo baxay Madaxweynaha Maraykanka ee ahaa inuu eegi doono qaddiyadda Somaliland.
Ambassador Baashe Cawil Cumar oo maanta waraysi siiyey World Business Report ee BBC World Service, waxa uu yidhi; “Dalka Jamhuuriyadda Somaliland waxa uu aqoonsiga madaxbannaanidiisa raadinayey ilaa sannadkii 1991-kii, taasi oo ah muddo haatan laga joogo 34 sanno oo runtii ah muddo aad u dheer in dalku uu aqoonsi caalami ah sugo.
Hadalka ka soo baxay Madaxweynaha Maraykanka Donald Trump ee uu ku sheegay inuu eegi doono qaddiyadda Somaliland, taasina qiimo weyn ayey u leedahay reer Somaliland.”
Waxa kaloo uu intaasi ku daray in dalka Somaliland uu hodan ku yahay khayraad dabiici ah oo ay ka mid yihiin shidaal iyo macdano kala duwan oo ay ka faa’iidaysigooda iska kaashan karaan dalalka Somaliland iyo Maraykanku, isagoo xusay in ka hor burburkii Soomaaliya ay shirkado laga leeyahay Maraykanku shidaal soo saaris ka wadeen qaybo ka mid ah Somaliland.
“Waxa kaloo jira in daraasado la sameeyey lagu ogaaday in Somaliland ay leedahay macdano aad u badan oo ay ka mid tahay macdanta qaaliga ah ee Lithium, fursadahaasi badan oo dhamina waxay yihiin fursado soo jiidanaya inay dalka yimaadaan shirkadaha Maraykanka iyo kuwa kale ee caalamkuba oo ay maalgashi ku samayn karaan, maadaama oo uu dalka Somaliland yahay mid nabadgelyo ah, dimuqraadiya oo degen, waana fursadaha aannu Maraykanka ku soo jiidan karno, iyadoo ay Somaliland h**e u maalgashadeen dalal ay ka mid yihiin Imaaraadka Carabta oo lacag ka badan $442 milyan oo dollar ku maalgeliyey dekedda Berbera, waxaana doonaynaa in aannu helno dalal kale oo maalgashigaas oo kale ku samayn kara Somaliland.
Dalka Somaliland waxa uu bixinayaa oo uu diyaar u yahay maaha Maraykanka oo qudha, balse Beesha Caalamka in uu qayb ka noqdo xalalka mashaakilaadka jira oo dhan, taasina waa waxyaabaha aanu kula shaqayn karno Maraykanka, lagana wada-xaajoon karo. Waxa kaloo ay Somaliland leedahay xeeb dheer oo 850km, waanan ognahay inuu jiro tartan u dhexeeya Maraykanka, Shiinaha iyo Ruushka oo Afrika la xidhiidha, waxayna Somaliland u haysaa Maraykanka waa inuu joogitaan ammaan ah ka heli doono marin-ganacsiyeedka muhiimka ee xidhiidhsan Gacanka Caddan, Baabul-Mandab ilaa Badda Cas,” ayuu yidhi Ambassador Baashe Cawil Cumar.
