12/05/2026
May ayının 10-da Bolnisi bələdiyyəsinin Darvaz dərəsində, Darvaz kəndində 6 kəndin nümayəndələrinin iştirakı ilə iclas keçirilib. Yerli əhali artıq bir aydan çoxdur ki, dağlıq ərazidə aparılan qazıntı və araşdırma işlərindən narahatdır.
Qeyd etmək lazımdır ki, işlər başlamazdan əvvəl yerli əhaliyə heç bir məlumat verilməyib. Nə yerli özünüidarəetmə orqanı, nə nazirlik, nə də müvafiq agentlik tərəfindən qanuni prosedurlar aparılıb. Beynəlxalq konvensiyanın qaydaları da pozulub. Rəsmi dövlət resurslarında və veb-saytlarında Darvaz və ətraf kəndlərlə bağlı heç bir icazə sənədi tapılmayıb. Bu gizli fəaliyyət bölgənin ekoloji gələcəyi ilə bağlı ciddi şübhələr doğurur.
Darvaz dərəsinin əhalisi iclasda hazırlanan müraciəti imzalayaraq dövlət qurumlarına müraciət edir. Yerli sakinlər Darvaz dərəsindəki qanunsuz işlərə və meşələrin qırılmasına son qoyulmasını tələb edirlər. Əgər hər hansı lisenziya və ya icazə verilibsə, həmin koordinatlar ləğv edilməli və elə dəyişiklik edilməlidir ki, heç bir şirkətin Darvaz dərəsində mədən və ya qazma-tədqiqat işləri aparmaq hüququ olmasın. Həmçinin, gələcəkdə Darvaz dərəsi ərazisində və dağlarında heç bir şirkətə lisenziya və icazə verilməməsi tələb olunur.
