大數據預測中心

大數據預測中心 大數據預測中心以龐大、持續更新的數據庫為基礎，捕捉國際足球、NBA籃球、F1賽車等大型運動的比賽趨勢，並配合隊伍、運動員的近況與焦點話題作進一步技術分析，助你提升欣賞體育賽事的樂趣。

19/10/2025 拜仁慕尼黑 vs 多蒙特直播資訊: Now 643, NowE, beIN Sports排名: 德甲(1) vs 德甲(2)主勝:77.3% 客勝:9.6%國際賽檔期完後德甲即上演國家打比：拜仁慕尼黑、多蒙特今場喺安聯...
15/10/2025

19/10/2025 拜仁慕尼黑 vs 多蒙特
直播資訊: Now 643, NowE, beIN Sports
排名: 德甲(1) vs 德甲(2)
主勝:77.3% 客勝:9.6%

國際賽檔期完後德甲即上演國家打比：拜仁慕尼黑、多蒙特今場喺安聯球場嘅會戰可以話係近年牌面最接近嘅一場Der Klassiker，兩隊狀態、人腳都已係處於近嚟較為好嘅一期，戰情有望唔再係咁一面倒。

拜仁上場德甲作客3:0輕取法蘭克福，拜仁一開波即搶得先機並且喺全場比賽之中保持控制權同高效率，今場番到主場固之然有更強嘅心理優勢。多蒙特上場則係同RB萊比錫踢成1:1驟眼睇一定係冇拜仁咁威，但考慮到呢隊RB已唔係開季俾拜仁狂轟六球嗰陣咁頹，所以更值得留意嘅係「蜜蜂兵團」表現穩健踢得出教練尼高高華嘅風格，嚟緊則會係多仔聯賽經歷跨季12場不敗以嚟嘅最大一次考驗。而咁橋去季不敗走勢嘅起點，正正係作客安聯嘅一場2:2。

拜仁前線開季時一次過冇晒梅斯亞拉與及湯馬士梅拿，一度令人擔憂表現會唔會大打折扣，好彩原有嘅奧利斯（Michael Olise）及時補上空缺，另一邊翼新收購嘅迪亞斯（Luis Díaz）又表現對辦，加上教練甘賓尼訓練時強調要執靚啲傳球角度，亦都好肯作出適量調動同輪換幫班波保持狀態。拜仁開季即做到入球增加同時失球減少，國際賽前六戰全勝之餘，得失球差已經上到+22先至係最令人始料不及。

多蒙特方面，開季之所以能夠克服傷病潮取得四勝二和繼續保持不敗，功臣就不得不提翼鋒艾迪耶美（Karim Adeyemi）。喺尼高高華今季全面改踢3-4-2-1之下，艾迪耶美有較好發揮之餘亦多咗參與回防，成為「多仔」攻守兩端嘅重要樞紐。配合首席中鋒古拉斯（Serhou Guirassy）走在最前，尼高高華帶領嘅多蒙特每場平均跑動距離與前任任教練紐尼沙軒時代相比高出三公里有多，所以就算作客都應該俾到拜仁一定嘅壓力。加上中堅舒洛達碧克（Nico Schlotterbeck）傷癒復出以嚟持續有好表現，佢代表多特、德國嘅三場聯賽再加埋兩場世界盃外圍賽夾埋只出現一個失球，呢支多蒙特作客安聯相信仍可以keep得到良好嘅精神面貌。而就算今期又爆出拜仁睇中咗舒洛達碧克，畢竟有排至知會唔會成真，喺呢一刻對賽事走向嘅影響可謂微乎其微。

預計兩隊正選陣容：
【拜仁慕尼黑】
Neuer - Boey, Upamecano, Tah, Laimer - Kimmich, Pavlovic - Olise, Gnabry, Luis Diaz - Kane
【多蒙特】
Kobel - Anton, Schlotterbeck, Bensebaini - Ryerson, Sabitzer, F.Nmecha, Svensson - Adeyemi, Beier - Guirassy

#德甲 #拜仁慕尼黑 #多蒙特

05/10/2025 紐卡素 vs 諾定咸森林直播資訊: Now 621, NowE排名: 英超(15) vs 英超(17)主勝:63.8% 客勝:15.4%近日，拜仁名宿兼董事路明尼加高調發表「葡萄言論」，直指紐卡素天價搶走拜仁目標禾達美...
04/10/2025

05/10/2025 紐卡素 vs 諾定咸森林
直播資訊: Now 621, NowE
排名: 英超(15) vs 英超(17)
主勝:63.8% 客勝:15.4%

近日，拜仁名宿兼董事路明尼加高調發表「葡萄言論」，直指紐卡素天價搶走拜仁目標禾達美迪（Nick Woltemade）係做咗傻仔。平心而論，禾達美迪加盟紐卡素以來嘅日子仍然有限，至今只參與過三場英超、兩場歐聯、一場聯賽盃，表現雖未講得上係搶鏡，但總算已取得兩個入球、一個助攻，算係有交待。樂觀啲去睇，禾達美迪仍然喺度適應緊英超嘅節奏與及球隊戰術體系，整體影響力尚未充分展現，而佢本身有一定速度與技術底子，亦有唔錯嘅頭鎚能力，依然值得大家期待。與此同時，紐卡素上一場英超主場迎戰阿仙奴，雖然翼鋒哥頓（Anthony Gordon）復出都未能扭轉敗績，但佢嘅歸隊已成功為前場帶嚟更大活力。而喺緊接落嚟嘅星期三，紐卡素歐聯作客聖基萊斯聯更係以4:0大勝對手，為番到英超追分增加咗唔少信心。

諾定咸森林方面，換帥後嘅表現則係令人哭笑不得。繼上星期六英超主場輸俾新特蘭，去到星期四歐霸盃踢主場，迎戰丹麥球隊米特蘭以為食硬，點知最終亦係2:3輸波搞到主場兩連敗，隊中士氣可想而知會有幾低落。搞笑嘅係，森林班主Evangelos Marinakis同巴甲保地花高班主John Textor搭晒膊頭稱兄道弟，開季更係先後從保地花高引入前鋒伊高捷西斯（Igor Jesus）等共四名球員，但呢班球員嚟到之後擺多過踢，當中就只係得捷西斯可以keep到有上陣機會，睇嚟不論紐奴以至普斯迪高古兩任主帥都唔係好識得欣賞老細塞到手嘅「禮物」，亦難怪普斯迪高古如今明明全隊冇乜傷患但實情卻無人可用，上任至今都未能取得首勝。考慮到打埋今場就已進入國際賽假期，換句話講對紐卡素如果仍未見到起色，普斯迪高古恐怕都要即刻讓路俾球會搵繼任人。（紐卡素X圖片）

#英超 #紐卡素 #諾定咸森林

05/10/2025 車路士 vs 利物浦直播資訊: Now621, Now611, NowE排名: 英超( 8 ) vs 英超( 1 )主勝: 33.3% 客勝: 41.3%排聯賽榜第八嘅車路士，今個星期會喺主場迎戰榜首利物浦。利物浦作客...
03/10/2025

05/10/2025 車路士 vs 利物浦
直播資訊: Now621, Now611, NowE
排名: 英超( 8 ) vs 英超( 1 )
主勝: 33.3% 客勝: 41.3%

排聯賽榜第八嘅車路士，今個星期會喺主場迎戰榜首利物浦。利物浦作客水晶宮喺補時階段被絕殺，同阿仙奴差距縮窄到兩分，周中歐聯又以一球敗於加拉塔沙雷。車路士聯賽兩連敗，歐聯對賓菲加贏番一場。兩隊近期球員場上紀律都令領隊頭痛，利物浦嘅伊基迪基，聯賽盃入波後除衫兩黃一紅，以致對水晶宮缺陣，埋下輸波嘅伏線。車路士就更加近四場三張紅牌，直接影響兩場聯賽賽果。馬利斯卡未試過聯賽三連敗，而史諾未曾兩連敗，兩位領隊呢場有任何閃失，就真係壓力山大。

近期紅牌同車路士，就好似熱戀中嘅情侶咁形影不離。繼門將羅拔山齊士(Robert Sánchez)領紅後，上場中堅查禾查路巴(Trevoh Chalobah)又有紅牌。隊中已經有三個中堅傷兵大衞科芬拿(Wesley Fofana)，艾達拉比奧約(Tosin Adarabioyo)同利維高維爾(Levi Colwill)，球隊瞬即出現中堅荒。後防隊友古古列拿(Marc Cucurella)認為球隊應該從中汲取教訓，事實上喺對白禮頓，踢少一個前車路士贏緊1:0形勢大好，之後就崩盤倒輸1:3。賽後車路士五個高層入咗更衣室，馬利斯卡面對壓力，就話檢討過後，承認人少打人多嘅情況下，自己嘅戰術調動係有進步空間。車路士彭馬(Cole Palmer)因腹股溝傷患仍要休戰，冇佢發板車路士攻力大減，要入波就靠聯賽已經有6個入球，4個助攻嘅安素費蘭迪斯(Enzo Fernández)。值得一提嘅係，今季車路士聯賽嘅11個入波，有6球係黎自死球，而防守死球正係今場對手利物浦嘅弱點。

利物浦對水晶宮冇咗伊基迪基(Hugo Ekitiké)嘅靈活走位，同中前場串連，正中鋒伊蕯(Alexander Isak)未能撕破水晶宮嘅緊密防線。不過就算歐聯一仗佢復出，利物浦亦攻唔入。新球員未融入，舊球員又未適應新踢法，兩場作客硬仗，球隊嘅問題就即刻浮現。左右新閘同前場球員欠默契，中場獲斯(Florian Wirtz)喺比賽節奏，身體對抗性方面，有待適應影響發揮。兩邊冇速度，中間又欠組織，史諾試將獲斯放到左翼，歐聯甚至將沙拿(Mohamed Salah)放喺後備席。加上個別球員例如麥卡里士打(Alexis MacAllister)，干拿迪(Ibrahima Konaté)狀態起伏，以致強度欠奉。史諾上季沿用高普舊將作出戰術微調，球員落場就自動波，今季大換班先係正式考牌。周中利物浦歐聯輸波兼損兵折將，艾利臣(Alisson)要十一月國際賽期後先復出，伊基迪基上陣成疑。

利物浦聯賽近四場作客史丹福橋未嘗一勝(三和一負)，但近十一次對碰，車路士只係贏過一次。雖然利物浦新舊球員仍然係磨合中，個別球員嘅質素毋庸置疑，車路士喺主力傷病停賽嘅情況下，實力大大削弱，利物浦有望全取三分。

#英超 #車路士 #利物浦

02/10/2025 巴塞隆拿 vs 巴黎聖日耳門直播資訊: Now 643, NowE, beIN Sports排名: 西甲(1) vs 法甲(1)主勝:39.7% 客勝:38.2%巴塞隆拿仍要留喺容量較細嘅奧林匹克球場擺下擂台迎戰巴黎聖...
30/09/2025

02/10/2025 巴塞隆拿 vs 巴黎聖日耳門
直播資訊: Now 643, NowE, beIN Sports
排名: 西甲(1) vs 法甲(1)
主勝:39.7% 客勝:38.2%

巴塞隆拿仍要留喺容量較細嘅奧林匹克球場擺下擂台迎戰巴黎聖日耳門，喺開波前巴塞趁住皇馬俾馬體會炒鑊甘重奪西甲榜首席位，如今係名副其實嘅西甲首名大戰法甲首名，場上卻因為雙方都出現唔少傷兵而令到場波增添唔少變數。

巴塞上場西甲2:1小勝皇家蘇斯達，既有耶馬（Lamine Yamal）傷癒復出即貢獻助攻，再有中鋒利雲杜夫斯基（Robert Lewandowski）嘅入球奠定勝局。耶馬呢場後備上場但可見狀態已經回復得八八九九，嚟緊對大巴黎有望重返正選，再配合另一翼華舒福（Marcus Rashford）組成三叉戟，整體火力強大。喺歐聯首個比賽日，以曼聯借將身分重返英格蘭作客紐卡素嘅華舒福包辦兩個入球，西甲方面則係近四場都有助攻，表現極具威脅。

巴塞前線一致被看好，但傷患潮同時已經影響晒前中後三線。中場加維半月板重傷要養傷到2026，進攻線方面拉芬拿以及費明盧比斯亦都肯定缺陣。就連門將位置亦都成為重災區，今季新收購頂替十字軍達史迪根嘅祖安加西亞最近都傷埋，最後一關要改由今季啱啱只落過一次場嘅35歲老將施捷斯尼（Wojciech Szczesny）守住。萬一左閘巴迪（Alejandro Balde）未能按本來計劃今場傷癒復出，巴塞嘅防務就會變得更為艱鉅。

巴黎聖日耳門方面，西班牙籍主帥安歷基則要面對破壞力更大的傷兵潮。上場歐聯冇咗迪比利、杜爾尚且可以大炒阿特蘭大四球，但如今隊長中堅馬昆奴斯亦因傷缺席、中場祖奧尼維斯（Joao Neves）復出機會渺茫。上場法甲對歐塞爾期間，中場域天拿（Vitinha）、同翼鋒基化史基尼亞亦同告因傷提前換出。雖然域天拿與及祖奧尼維斯最終都有跟隊上機前往巴塞隆拿，不過到時一旦出現險情，佢哋嘅狀態能唔能夠救火則成疑問。

PSG話就話同巴塞一樣擁有一枝強大嘅三叉戟，實情卻係開季至今，迪比利、杜爾、基化史基尼三人從未試過一齊正選上陣，而後備力量干卡路拉莫斯（Goncalo Ramos）、李康仁又明顯低咗半個檔次，火力上嘅缺口結果由後衛幫手跑數，就例如贏歐塞爾呢場法甲波，兩個入球就係由一對中堅比拿度（Lucas Beraldo）與及沙班尼（Ilya Zabarnyi）包辦，而PSG今季自歐洲超級盃後取得嘅18個入球之中，就更有一半來自中後場球員，呢一個現象實在不容忽視。（巴黎聖日耳門X圖片）

#歐聯 #巴塞隆拿 #巴黎聖日耳門

01/10/2025 馬德里體育會 vs 法蘭克福直播資訊: beIN Sports排名: 西甲(7) vs 德甲(4)主勝:68.2% 客勝:14.3%歐聯分組賽第二個比賽日嘅首晚比賽，電視台直播冇揀馬德里體育會鬥法蘭克福，對於喜歡睇入波...
29/09/2025

01/10/2025 馬德里體育會 vs 法蘭克福
直播資訊: beIN Sports
排名: 西甲(7) vs 德甲(4)
主勝:68.2% 客勝:14.3%

歐聯分組賽第二個比賽日嘅首晚比賽，電視台直播冇揀馬德里體育會鬥法蘭克福，對於喜歡睇入波嘅球迷嚟講可能會係一次損失。

雙方上星期都出現大手筆交易，馬體會喺馬德里打比中以5:2大勝皇家馬德里，聯賽排名亦逐步回升番上第七位。一度連續四場冇波入嘅前鋒艾華利斯（Julian Alvarez）終於走出低潮期，兩場夾埋轟入五球，今次回勇唔單止提升番個人信心，亦有助重新提升番馬體會嘅前場把握能力。上場歐聯作客利物浦，馬體會就算艾華利斯因傷未有隨隊都只係僅輸2:3，成隊波嘅硬淨程度不容忽視。

法蘭克福喺星期六德甲尾場則疑似係半場收油，當下半場一開波已經射穿慕遜加柏大門六次之後，就俾慕遜加柏陰啲陰啲追番四球咁多。但參考番歐聯上一個比賽日落後一球之後大勝加拉塔沙雷5:1嘅一幕，你就不得不相信法蘭克福可以有幾大嘅火力。成條年輕鋒線包括貝卡特（Jonathan Burkardt）、卡拿夫（Ansgar Knauff）、巴奧耶（Jean-Matteo Bahoya），以至最新冒起嘅攻中奧遜（Can Uzun），都喺快速推進同反擊行動中扮演住關鍵嘅角色。考慮到雙方開季至今都只係各得一場clean sheet，今場再出現對攻以至多入球都唔會係咩奇事。（法蘭克福X圖片）

預計兩隊正選陣容：
【馬德里體育會】
Oblak - Llorente, Le Normand, Lenglet, Hancko - Barrios, Koke - Simeone, Gonzalez - Sörloth, Alvarez
【法蘭克福】
Kaua Santos - Collins, Koch, Theate, Brown - Chaibi, Skhiri, Uzun - Doan, Knauff - Burkardt

#歐聯 #馬德里體育會 #法蘭克福

28/09/2025 紐卡素 vs 阿仙奴直播資訊: Now621, Now611, NowE排名: 英超(13) vs 英超(2)主勝: 31.7% 客勝: 40.6%紐卡素今個星期將迎戰氣勢強勁嘅阿仙奴。今季面對多線作戰同陣容調整，紐卡...
27/09/2025

28/09/2025 紐卡素 vs 阿仙奴
直播資訊: Now621, Now611, NowE
排名: 英超(13) vs 英超(2)
主勝: 31.7% 客勝: 40.6%

紐卡素今個星期將迎戰氣勢強勁嘅阿仙奴。今季面對多線作戰同陣容調整，紐卡素表現差過預期，現時排聯賽榜第十三位，開季五場只係贏過狼隊。對手阿仙奴季初已經硬仗連場，敗於利物浦後又賽和曼城。賽前阿迪達盛讚聖占士公園主場氣氛熾熱，事實上，利物浦作客呢個英超地獄球場，要火力全開先能夠喺補時階段奠定勝局。阿仙奴近三場作客紐卡素全敗而且零入球，呢場客隊會面對極大考驗。

紐卡素今季兩個射手先後離隊，頂替嘅韋沙(Yoane Wissa)未落場已經受傷，禾達美迪(Nick Woltemade)首場聯賽頂入頭槌後，未再有進帳，紐卡素聯賽只係入咗三球。上場對般尼茅夫賽和0:0，賀維認為球隊未有對禾達美迪製造足夠機會。今仗哥頓(Anthony Gordon)停賽三場後復出，將會提升球隊攻擊力。聯賽輪休嘅古馬雷斯(Bruno Guimarães)同祖亞靈頓(Joelinton)，周中聯賽盃對巴拉福特都有好表現，祖亞靈頓更射入兩球，協助紐卡素4:1晉級。出名硬淨嘅中場三子祖亞靈頓、東拿利(Sandro Tonali)，古馬雷斯嘅壓迫性，足以抗衡對手。防守方面舒亞(Fabian Schär)對巴塞一仗腦震盪休戰，賀維仍然可以排出三中堅，般恩(Dan Burn)，馬歷泰奥(Malick Thiaw)及保治文(Sven Botman)，後兩者更係聯賽盃已經踢出默契，亦係紐卡素今季失求咁少嘅功臣。

阿仙奴上星期同曼城上演激戰，早段先失一球後，撳住曼城嚟攻，到補時階段終於馬天尼利(Gabriel Martinelli)入波，賽後阿迪達形容呢場賽事令佢好自豪。能夠逼到傳控之王哥迪奧拿泊大巴，成為佢執教生涯控球比率最低嘅一場賽事，絕對係震驚球壇。大戰時又再排陣保守，面對外界批評佢又用三個防守中場，佢回應球隊整體攻擊力仍然強勁，當中包括蘇比文迪(Martín Zubimendi)同上季踢偽九撐起球隊嘅馬連奴(Mikel Merino)。今季有幾位具質素嘅攻擊球員加盟，例如因為膝傷將會缺陣嘅馬度基(Noni Madueke)喺右邊用速度突破帶嚟威脅，具創造力嘅艾斯(Eberechi Eze)喺聯賽盃對維爾港踢攻中，射入加盟以嚟嘅開齋波。縱使被認為唔夠進取，相信阿迪達亦唔會改變踢法，尤其係將要面對紐卡素體力化嘅中場，預計仍然會以防守為主導。

兩隊係今季聯賽防守最穩健嘅球隊，紐卡素攻弱守強，要攻破阿仙奴大門有啲難度。阿仙奴今季增兵質量俱全，除咗球隊戰術運用上更靈活，亦有足以改寫戰局嘅後備殺手，可以睇高一線。

#英超 #紐卡素 #阿仙奴

26/09/2025

曼聯上場對車路士多得對手自爆終於贏番一場，前場Cunha、Mount復出後亦會預期攻力會得到補償。

27/09/2025 聖保利 vs 利華古遜直播資訊: Now 639, NowE, beIN Sports排名: 德甲(5) vs 德甲(11)主勝:13.3 客勝:65.9%上星期介紹過升班奇兵科隆，今場輪到講升咗班一季、嚟到第二季更進...
25/09/2025

27/09/2025 聖保利 vs 利華古遜
直播資訊: Now 639, NowE, beIN Sports
排名: 德甲(5) vs 德甲(11)
主勝:13.3 客勝:65.9%

上星期介紹過升班奇兵科隆，今場輪到講升咗班一季、嚟到第二季更進一步嘅聖保利。聖保利暫時排到上德甲第五，主因在於整體進攻實力大幅提升。翻查上季數據，聖保利本來係全德甲攻力最弱嘅一隊，就連平均每場一球都做唔到，佢哋得以留級，好大原因係靠後方死守、再有最後一關嘅門將華斯積（Nikola Vasilj）左撲右撲，造出僅差過拜仁嘅第二少失球佳績。

聖保利嚟到今季經過買人同埋調整，增添咗好幾位兼具速度同突破能力嘅球員，包括買入日本中場藤田讓瑠、借用貝寧前鋒安東治（Andreas Hountondji）等等，令成隊波速度節奏升呢，進攻核心施蘭尼（Danel Sinani）亦當堂如魚得水，頭四場已有兩個入球、一個助攻。但有得自然有失，聖保利都玩到進攻，代價就係做唔番上季嗰種鐵桶防守，上場作客史特加就終於要輸番場0:2，睇得出係防守集中度不足。後防老將侯基華爾（Hauke Wahl）賽後直言目前嘅防守水平未達水準，球隊需要更高嘅專注力同體能輸出。

利華古遜方面，自從前丹麥國家隊教練曉文接過爛攤子後，球隊仍處於摸索階段。利華高層當日「鬼揞眼」搵嚟坦夏接替沙比阿朗素，坦夏轉個頭就已經露出狐狸尾巴，要球會買入自己間經理人公司旗下嘅球員。如今坦夏清得走，佢主政期間買落嘅大堆球員就留番晒喺度，曉文亦好坦白講話未tune掂。好彩今期有左閘基莫度（Alejandro Grimaldo）挺身而出，佢已先後喺德甲、歐聯總共射入三個自由球，就連歐聯對手哥本哈根教練都大讚，甚至講到基莫度已係當今最佳罰球射手咁話，加上隊長安特列治（Robert Andrich）今場作客聖保利坐完波監復出，中場防守將俾到前後場更大信心。呢隊利華幾時走得出今輪嘅動蕩時期，就好睇呢班留下來嘅奪冠班底喇。（利華古遜X圖片）

預計兩隊正選陣容：
【聖保利】
Vasilj - Wahl, Smith, Dzwigala - Saliakas, Sands, Fujita, Oppie - Sinani - Kaars, Pereira Lage
【利華古遜】
Flekken - Quansah, Bade, Tapsoba - Vazquez, Andrich, Aleix Garcia, Grimaldo - Tillman, Ben Seghir - Schick

#德甲 #聖保利 #利華古遜

Address

Hong Kong

Website

Alerts

Be the first to know and let us send you an email when 大數據預測中心 posts news and promotions. Your email address will not be used for any other purpose, and you can unsubscribe at any time.

Shortcuts

Share

Category