10/06/2026
「雖說男人應該有事業心，但自從成為爸爸，工作的困身某程度上增添左我不少苦惱。工作表現唔錯，老闆畀機會你，卻代表出差機會增加，就算喺香港，OT都好嚴重，返到屋企經常都只係見到老婆同孩子已經睡覺嘅模樣。
有時覺得自己係機器多過一個人。所以喺阿仔三歲嗰年，我決定轉工。
慶幸搵到一份時間彈性嘅新工作，唔單止每晚都可以同小朋友一齊食飯，仲可以等小朋友瞓晒先做野，自己安排時間。當然收入大不如前，但有失，應該有得？我都以為咁就可以享受到孩子最珍貴嘅童年時光。
直到有一次，睇返阿仔小時候嘅相，同老婆一齊懷念下佢仲可以單手抱嘅時候，我發現自己其實唔係好記得相入面嗰個時期嘅事。嗰陣我係咪真係有留心阿仔嘅一切？
猛然發現，自己當時根本無好好享受嗰個時光，抱住阿仔，心思卻仍在工作。
更恐怖嘅係，原來轉工後嘅自己，一路都無變。
口講轉工後要多啲時間陪小朋友，但始終工作上心，返到屋企都係會諗下公司嘢，仲有大大小小嘅家事私務，有時同小朋友食緊飯，個腦就諗緊陣間佢地瞓咗，我嗰張長長嘅to do list，聽日個會嘅agenda、幾時攝到時間交電費、暑假接送點安排……即使閂埋手機，唔接電話，個腦都係停唔到。
諗到十幾二十年後嘅自己，回想今日，應該又會懊悔自己今日無好好認真同孩子相處，我就決心要更加珍惜以後每一個時刻。
當然，要學習活在當下，一啲都唔易。
我開始左每日meditate，有人譯做冥想，簡單講可以話係提醒自己活在當下嘅練習。我嘗試喺察覺自己靈魂出走時提自己要靜觀呼吸，又會睇相關嘅書，但我發現最有效將自己帶回當下的，是一個我自創嘅心法：
就係只要意識到自己個思緒漂走，我就幻想自己係喺十幾二十年後穿梭時空返到黎，提醒自己要喺呢個本來無法重來嘅一刻，專注眼前「只有」八歲嘅孩子，還有太太嘅一切……
當我真正注專當下，個經歷係好奇妙，連眼前的景象都會發生微妙變化，感覺有啲似平時生活嘅事物只係一幕又一幕嘅電影、走馬燈，但真正活在當下嘅話，我直情係身處於大銀幕入面咁，一切都好活靈活現，對「當下」這回事，有一個前所未有嘅感受。
更重要嘅係，當我能夠活在當下，我更能夠感恩依家擁有嘅野，包括家人、同佢地嘅關係、同佢地相處嘅時空。其他的一切馬上變得毫不重要了。」
POPAim投稿者No.128：Harold
＝＝＝＝＝
只要你是為人父母、子女、兄弟姐妹，還是其他身份；只要是有關家庭、有關育兒、有關成長的都歡迎你投稿，讓你的故事被聽見，讓其他人可以從你的故事，觀照自身，共同成長。
