19/11/2025
唔係香港隊需要香港人支持，而係香港人需要支持香港隊🇭🇰
其實，香港隊從來唔單止係足球。佢係我哋對呢座城市，剩低為數不多嘅精神寄託，一個可以聚集45,000人，一齊嗌同一句口號；入波搭膊頭跳，輸波就攬住喊嘅地方。
啟德主場、香港隊，其實係一個舞台，俾我哋從容自然咁表達對呢個城市嘅愛。
入唔到亞洲盃，梗係失落。但最令我擔心嘅，唔係成績，而係我哋會因為一場失敗，失去咗呢個屬於我哋香港人的舞台。
十年前，2015年11月17號，我哋一齊見證咗一場爭氣嘅比賽。十年後，2025年11月18號，我哋同樣盡力咗力，但係結果令人心碎。
但呢十年教識我：睇香港隊最大嘅娛樂，唔係贏波，而係不離不棄。正正因為一齊經歷過輸波嘅痛，下一次贏波先至會開心得更徹底。
我哋保唔住亞洲盃資格，但我哋一定要保住香港隊；
保住啟德主場，保住呢個可以凝聚45,000個香港人、
為同一個夢想，嗌同一個口號嘅地方。
人生就係咁，總會有得意，亦都會有失落。順境嘅時候，所有人都識慶祝，但真正分辨你係咪一個 Winner 嘅指標，就係你點樣面對逆境。而繼續入場，繼續支持，就係我哋球迷面對逆境嘅唯一方法。
應承我，無論贏定輸，我哋一齊繼續入場撐香港隊，好唔好？
