WeCar

05/04/2025

26/03/2025

18/03/2025

17/03/2025

[當我記得你，「你」已不在]

人生有好多時候，當你終於記起某人某事，先發現一切都已經唔再一樣。

記得上年喺一個車聚，見到架幾靚仔嘅藍綠色MX-5。其實重點係車主keep得好靚仔，三十年車好似新車咁款。雖然同車主有閒談幾句，但當時車主都趕住走，最多只係記得佢姓。

直到前排喺另一個聚會有機會同佢相遇，言談之間先知道原來我哋有好多共同朋友。傾到上次見面時，我仲讚緊佢架MX-5幾靚，但佢就苦笑講咗句：「賣咗喇。」佢嘅語氣平淡，但眼神透露住一絲遺憾。「公司裁員，要套現。」

單單十個字，已經夠夭心夭肺。今日唔知聽日事，雖然好似已經變成常態，但唔好習慣。每日比機會自己去珍惜同認識更多身邊人同事，令自己嘅世界更多色彩。

-萊特

27/02/2025

24/02/2025

[消失中的影子]

以前喺街每個角落都見到JDM，而家每次見到都變得好珍貴。只要遠遠聽到把熟悉嘅引擎聲，都會停低腳步望住，等佢慢慢駛過。

呢種感覺，好似已經越嚟越難有。而家唔好話JDM，引擎聲都就嚟聽唔到。雖然有啲JDM已經有唔少歲月嘅痕跡，同時亦可以透過部車同司機嘅年紀略為估計到佢同部車之間嘅故事。望住部車慢慢離開，再睇住尾燈喺黑夜中慢慢消失，成個畫面都充滿住一種難以形容嘅感動。

每一部JDM，已經唔再係純粹睇一部車咁簡單。每架車背後，都代表住一個時代，一段青春，同埋一個車主嘅堅持，或者呢啲先至係最難得嘅地方。

- 萊特

17/02/2025

[感應]

有無試過有時行行下街，突然會聽到把好熟悉嘅引擎聲或者喉聲，雖然部車唔係全港獨一無二，但係唔知點解，嗰下會feel到係一位認識嘅人，就好似同佢之間有條睇唔到嘅線咁。

當然，如果係一部顏色比較sharp嘅車，可能會好易認得到，但好似之前試過喺街行緊，突然有一部Golf R經過，雖然黑色車、黑色鈴，就算睇唔到車牌，距離自己幾十米，都會有種感覺知道佢就係自己認識嘅朋友。

有時大家喺街撞到車友，都未必可能第一時間認到，反而見到車，就會知道車友個名。反而有時記性唔好，會用佢部車變成佢個名，就好似我有位朋友個名叫「掃把佬」咁。

感應呢樣嘢，有時真係好奇妙。

- 萊特

29/01/2025

新嘅蛇年，WeCar祝大家恭喜發財、身體健康🧧🧧

祝咁多位今年揸車路路通，賺多啲改車，搵多啲買多部車，儲咗嘅錢唔洗成日用黎整車。

- WeCar

23/01/2025

[眼緣]

同一款車，十個車盤，十種condition，但就係一張相、一段描述、一個簡短對話、再加上第一眼嘅對望(同架車呀! 唔係賣家呀!)，可能就促成咗一個新嘅緣份。

朋友本身都係揸DC2，因為一次意外，遇上一個大意嘅司機，摧毀咗佢keep咗10年嘅全原裝珍藏。過咗幾年無車生活之後，終於決定再搵返一部DC2，希望可以延續呢個本田之旅。

有一日朋友喺網上搵緊二手車嘅時候，睇到一個post：「出售Honda DC2，已經擁有二十多年，因健康原因，希望求得有緣人。」

第二日朋友約咗睇車，原來係個上咗年紀嘅伯伯。佢話呢架車係佢退咗休之後想返老還童，所以想買返自己一直都好鍾意嘅Dream Car，但退休前因為各種原因未能圓夢。而家因為身體都開始出現毛病，家人為咗安全起見唔想佢再揸車，伯伯自己亦都唔希望部車擺喺度封塵，所以先搵下一位主人。

正所謂知音人遇著知音人，兩個好快就deal好咗，而伯伯最後只係講咗句「後生仔，應承我，好好照顧佢。」

有時聽到賣家對新買家講「希望你會好好咁keep住佢啦」、「如果有一日你唔想要，記得話比我聽」、「得閒記得點點點保養」，其實佢對呢樣嘢係有感情，只不過有時身不由己，先做出呢個沉重嘅決定。伯伯放心，我朋友一定會好錫部車。

P.S. 圖文不符呀 圖文不符呀 圖文不符呀 (不想承認發雞盲😌😌😌)

- 萊特

11/01/2025

東京車展外的晚上 (1)

一月頭嘅東京街頭，就是不一樣。
Credit: Regolith Photography

- WeCar

10/01/2025

小編上個月頭先去完LA，轉眼間變成咁...

天佑LA🙏

09/01/2025

[突然又已一年，東京]

話咁快聽日就係東京改裝車展，相信已經有唔少朋友已經到咗。

講返起，小編對上一次去東京改裝車展已經係2013年，嗰陣仲係做緊雜誌寫車佬，幾個鐘之內要行曬十幾個展館，仲要影相，離開會場嗰陣一度懷疑人生，到底個展館裏面有咩車，因為基本上拎起相機影車多個肉眼去睇。

除咗車展之外，呢個星期東京街頭都有唔少嘢睇。繼上一年WeCar特派員「離糕聶」去東京，今年佢繼續自資機票、酒店、住宿、相機再去實地報導(記得買手信返黎比我呀！)。對於冇得去嘅小編嚟講，睇佢嘅相當去咗。

- 萊特