24/09/2025
कलिला बालबालिकाको टाउको र छातीमा गोली ठोक्न आदेश दिने रमेश लेखक कुन दुलोमा छन् मिडियाको चासो छैन ।
करोडौंको सम्पत्ति, नोट, सुनचाँदी, हिरामोती घरभित्र राखेका नेताहरुबारे खोज-रिपोर्टिङकाे चासो छैन।
सहिद परिवारहरू कसरी जीवन धानिरहेका छन्, सयौं घाइतेको उपचार कसरी हुँदैछ, परिवार के गर्दैछन्,उनीहरूको माग बमोजिम गोली ठोक्नेहरुलाई नियन्त्रणमा लिएर तत्काल अनुसन्धान सुरु गर्नुपर्नेमा कसैको चासो छैन ।
प्राथमिकताका समाचारहरू- रविले गर्दा कैदी भागे, भागेकाका कैदीले गरेको अपराध पनि रविकै, अदालतमा रविका मुद्दा मात्र जले, जलाउने पनि रवि !
हेडलाइनहरू पनि बिकेकै हाेलान्!
झन्डै एक वर्षदेखि हिरासत र जेलभित्र बसेको एउटा रवि लामिछानेमाथि तपाईंहरुले गर्नुभएको अत्याचार जनताले नोटिसमा लिएको थियो/ छ।
अदालतलाई कुरा लगाइदिने दूषित उद्देश्य मात्र राखेर तपाईंले बनाउनुभएको समाचार र मिस लिडिङ हेडलाइनका कारण जनताको आक्रोश पुराना नेताहरूसँग मात्र थिएन, मिडियासँग पनि थियो। एउटा रवि लामिछानेलाई घेराउ गर्न तपाईंहरूले अझै छोड्नुभएको छैन। समाचारमार्फत तपाईंले अदालतलाई पार्न खोज्नुभएको प्रभाव बच्चाबच्चाले बुझिसके, सम्मानित अदालत र स्वतन्त्र न्यायमूर्तिहरूले नबुझ्ने कुरै होइन।
पुराना दललाई सच्चिनुपर्छ भनेर अर्ति दिनुहुने सम्पादकज्यूहरू,तपाईंहरू चाहिँ सच्चिनु पर्छ कि पर्दैन ? मैले कटाक्ष, व्यङ्ग्य वा आलोचना गरेको होइन। एकपटक गहिरिएर सोच्न आग्रह गरेको हुँ ।
सर्वोच्च अदालतसहित दुई दर्जन अदालत जले । सुरक्षा निकायले राष्ट्रपति भवनदेखि संसद भवनसम्म जोगाउन सकेन। कारागार चाहिँ जोगाउन सक्थ्यो त? वर्षौंको बेथितिसँगै रवि लामिछानेमाथि निरन्तर गरिएको अन्याय र मिडिया ट्रायलले पनि जनताको आक्रोशमा ठूलो योगदान दियो। आगोमा घिउ थप्यो ।
सबका सब नेताहरू हेलिकप्टर चढेर भागे/भगाइए, लुके/लुकाइए। प्रधानमन्त्रीसहित सबका सब मन्त्रीहरूलाई हेलिकप्टरबाट रेस्क्यु गरियो। सुरक्षित ठाउँमा लगियो। तर, सुरक्षित ठाउँमा बसेको एउटा रवि लामिछानेलाई जेल प्रशासनले जनताको भिडमा लगेर बुझाइदियो। देशमा आगो लागेको बेलामा धुवाँको मुस्लो र अनियन्त्रित भीडबाट बिना सुरक्षा एक्लै निस्केर आफ्नै घर जान सक्ने अर्को कुनै नेता देखियो त यो देशमा ?
झुठा मुद्दा लगाएर जबरजस्ती थुनिएको एउटा व्यक्तिमाथि अझै अन्याय गर, मिडिया ट्रायल गर । हिसाब त जनताले गरेकै हुन्छन् । 'यह पब्लीक है, सब जानती हैं।'
