22/08/2025
कोशी प्रदेशमा सञ्चार विधेयकविरुद्ध पत्रकारको धर्ना : प्रहरीद्वारा हस्तक्षेप
विराटनगर । कोशी प्रदेश सरकारले सदनमा पेस गरेको “आमसञ्चार सम्बन्धी विधेयक” को विरोधमा शुक्रवार पत्रकारहरूले धर्ना दिए । प्रेस स्वतन्त्रता सीमित गर्ने प्रयत्न भएको भन्दै पत्रकारहरूले संसद् भवनको सभामुख प्रवेश गर्ने गेट नजिकै नाराबाजी गर्दै प्रत्यक्ष रूपमा आपत्ति जनाए ।
विधेयकले सञ्चारकर्मीलाई लक्षित गर्दै समाचार प्रकाशन वा प्रसारण गरेकै आधारमा एक लाख रुपैयाँसम्म जरिवाना गर्ने प्रावधान समावेश गरेको छ । यही कारण पत्रकारहरूले यसलाई प्रेस स्वतन्त्रतामाथि प्रत्यक्ष आक्रमण भएको भन्दै प्रेस स्वतन्त्रता कुण्ठित गर्ने प्रावधान खारेज गर्न मागसहित धर्ना गरेका हुन ।
शान्तिपूर्ण धर्ना जारी राखे पनि प्रहरीले हस्तक्षेप गरेपछि पत्रकार र सुरक्षाकर्मीबिच केही बेर धकेलाधकेल र घम्साघम्सी भएको थियो । वडा प्रहरी कार्यालय विराटनगरका डीएसपी अनमोल खड्का नेतृत्वको टोलीले पत्रकारहरूसँग दुर्व्यवहार गरेको आरोप पनि लगाइएको छ । सहभागी सञ्चारकर्मीहरूले “प्रहरीले अनावश्यक बल प्रयोग गर्दै आन्दोलनलाई दमन गर्ने प्रयास गरेको” गुनासो गरेका छन् ।
वास्तवमा, लोकतन्त्रको आधार नै स्वतन्त्र प्रेस हो । तर यस विधेयकले सञ्चारमाथि पूर्ण नियन्त्रण गर्न खोजेको छ । सञ्चारमाथि नियन्त्रण गर्न खोज्ने कुनै पनि कानुनी प्रावधान जनताको मौलिक अधिकारमाथि प्रहार हो ।
