12/06/2026
Vote pou 006 men lenk lan fanatik https://www.facebook.com/100095054050112/posts/985264584652001/?mibextid=Nif5oz
2EM EDISYON KONKOU TÈKS RTVN
ERNICE DIEUVERSON #006
KI WÒL FANM TA DWE JWE NAN DEVLOPMAN SOSYETE A
Ekri pa: ERNICE DIEUVERSON
1.
Lè Bondye t ap trase desten sou figi limanite,
Li mete fanm kòm premye sous sansiblite,
Li ba li misyon pou gide ak responsablite,
Pou fè lavi fleri ak plis diyite.
2.
Fanm se premye lekòl kote timoun aprann renmen,
Se nan bra li anpil rèv kòmanse pran chemen,
Li fòme lespri ki pral sèvi peyi demen,
Ak bon prensip ki fè yon pèp toujou kenbe men.
3.
Li dwe leve jenerasyon ak sajès ak limyè,
Pou fè nwa inyorans pa kouvri laviyè,
Li dwe simen konesans tankou yon bèl rivyè,
Ki wouze avni nasyon an chak jou sou latè.
4.
Fanm dwe pote lapè lè rayisman vle monte,
Li dwe ini kè yo lè divizyon vle gaye,
Li dwe fè lanmou pale kote mechanste plante,
Pou tout pitit peyi a aprann youn lòt respekte.
5.
Li dwe kanpe djanm pou defann verite,
Li dwe sèvi kòm modèl onètete,
Li dwe fè briye jistis ak entegrite,
Pou sosyete a mache nan bon direksyon ak fyète.
6.
Fanm dwe patisipe nan tout espas desizyon,
Paske entèlijans li se yon rich kontribisyon,
Li pote vizyon, kouraj ak refleksyon,
Ki kapab chanje figi tout yon nasyon.
7.
Li dwe travay pou ekonomi pran elèvasyon,
Li dwe kreye opòtinite ak inovasyon,
Li dwe montre mond lan fòs detèminasyon,
Pou pwogrè vin tounen yon bèl reyalizasyon.
8.
Li dwe pwoteje kilti nou ak tradisyon,
Li dwe transmèt valè nou bay chak jenerasyon,
Li dwe kenbe vivan tout sa ki fè fyète nasyon,
Pou rasin nou pa pèdi nan okenn direksyon.
9.
Li dwe leve vwa li kont tout enjistis,
Li dwe fè limyè klere sou tout sèvis,
Li dwe goumen pou dwa moun ak jistis,
Pou chak sitwayen jwenn respè kòm benefis.
10.
Li dwe sèvi kòm poto mitan solidarite,
Li dwe ranfòse lyen fraternite,
Li dwe aprann tout moun sans imilite,
Pou kominote yo viv nan estabilite.
11.
Li dwe pwoteje lanati ak devouman,
Li dwe montre timoun yo bon konpòtman,
Li dwe plante espwa nan chak anviwònman,
Pou lavi kontinye fleri abondamman.
12.
Li dwe ankouraje sante ak prevansyon,
Li dwe ede fanmi yo jwenn pwoteksyon,
Li dwe sèvi pèp la san diskriminasyon,
Pou byennèt vin tounen yon gwo benediksyon.
13.
Fanm se zetwal ki klere menm nan tan difisil,
Li fè espwa leve lè syèl la vin febril,
Li fè kouraj pouse sou tè ki vin esteril,
Paske fòs li depase tout sa ki sanble frajil.
14.
Lè yon fanm edike, se yon pèp ki grandi,
Lè yon fanm respekte, se yon nasyon ki bèl anpil,
Lè yon fanm avanse, se pwogrè ki elaji,
Paske avni sosyete a nan men li bati.
15.
Se poutèt sa mwen leve vwa mwen ak konviksyon,
Pou mande plis valè pou fanm nan chak aksyon,
Paske dèyè chak gran pèp gen kontribisyon,
Yon fanm ki sèvi limanite ak pasyon.
FEN (POU SLAM LA)
Bay fanm plas li merite, epi n ap wè sosyete a leve.
Bay fanm respè li merite, epi n ap wè devlopman rive.
Paske fanm pa sèlman yon manman, yon sè oswa yon madanm;
Li se premye achitèk avni yon nasyon.
