12/05/2024
Vòl motosiklèt yo entansifye nan vil Aken nan dènye jou sa yo
Plis pase sis (6) motosiklèt diparèt soti nan dat 22 mas pou 03 mai 2024 la. Pifò nan moto sa yo pèdi gwo lajounen devan plizyè enstitisyon tankou legliz , magazen, elatriye. Dènye ka ki anrejistre pase devan mini makèt Nenette la. Yon video ap sikile sou entènèt la montre manèv vòlè a itilize pou ale avèk moto a.
Youn nan viktim yo ki pa vle non l site ke nou te gen posiblite pale ak li fè nou konnen li menm li mache nan 1e Egliz de Dye Aken an, “se pandan map swiv sèvis konsa volè a pase pran moto a devan legliz la, yon ti Dayun wouj 110 ” se pawòl viktim nan.
Nan ti bat bouch ak kèk sitwayen depi aprè plizyè zak sa yo , Anpil ladan yo kritike konpòtman lapolis ak lajistis ki depi kèk tan bese kad, daprè yo se sa ki lakoz deriv sa yo nan site Julien Raymond an. Yon lot bò yo kritike mank vilijans popilasyon an ki daprè yo lakoz tout moto sa yo gentan pèdi nan Vil Aken.
Kisa chef pouswiv vil la di nan koze sa? Eske lajistis ak lapolis ap kontinye kite malfra kontinye komèt zak sa yo nan vil la?
Aquin Infos
