25/02/2026
Lè lòd ak referans chanje, se lalwa ki dwe gide aksyon yo, se pa enterè patikilye
——24 Fevriye 2026, komin Akayè ✍🏾
Nan tout peyi ki gen souverènte, Konstitisyon an se sous prensipal tout pouvwa. Li se kontra sosyal la, papye sakre kote dwa ak devwa tout sitwayen, ansanm ak limit pouvwa Leta, ekri nwa sou blan.
Apre asasina ansyen prezidan Jovenel Moïse, peyi a ap fè fas ak yon ensekirite telegide, kote Bandi federe nan plizyè depatman, nan yon sèl objektif kise ; pran kontwòl teritwa. Sa ki bay opòtinite pou sosyete a fè konesans ak yon gwoup volontè kap defann teritwa kont bandi, ki pote non “Brigad”.
Depi kèk ane, brigad yo ap tante defann popilasyon a nan divès komin tankou Ponsondé, Akayè, ak kèk espas nan zòn metwopolitèn nan, elatriye. Ase-souvan, se yon travay ki fèt an kolaborasyon ak lapolis, sa ki lakoz majorite moun nan popilasyon an gen yon minimòm konfyans nan brigad yo.
Plis konfyans ap etabli, se plis popilasyon an ap elaji tach ak wòl brigadye yo, tankou ; nan dosye konfli tèryen, sikilasyon ak lòt dosye pèsonèl. Sepandan, daprè konstitisyon an, se sèl lajistis ki gen dwa tranche sou jan de ka sayo. Keseswa Lame, Lapolis oubyen brigad pagen okenn dwa legal pou tranche.
Poutan, fòs lòd ak brigad yo enplike nan jan de dosye sayo plizyè fwa, sa konn kreye anpil dezòd nan sosyete a, epi mete brigad yo nan gwo divizyon antre yo.
Nap raple brigad yo, majorite nan nou te resevwa fòmasyon pou pwoteje sitwayen yo. Men, pouvwa nou genyen an pa yon favè; se yon responsablite sakre nou dwe jere ak anpil swen. Lè nou depase limit konstitisyonèl yo, lè nou poze zak abitrè pou enterè yon grenn sitwayen oswa lè nou touye yon moun ki pat reprezante yon menas pou nou, se konstitisyon an nou atake.
"Konstitisyon an pa jwe." Fraz sa a pa yon senp deklarasyon. Se yon rapèl fò pou tout moun, espesyalman brigad yo, nou pa pi wo pase lalwa.
Gen dosye ki pa pou nou, kite lalwa fè travay li jan sa dwe fèt. Wòl pa nou an ap toujou onore menmjan ak lòt wòl yo.
Menmlè gen moun nan popilasyon an kap rele nou pou jere divès dosye, pa janm bliye wòl nou, epi jwe wòl nou. Sonje limit nou, pa kite gwo van mennen nou nan move direksyon. Pèsonn paka kanpe anfas lalwa, sitou lè w kanpe nan move kan.
