27/08/2025
Bwakale nan Petyonvil : Krazebaryè pa ko vle lapè k ap klèwonen an
Malgre Vivansanm ap pale de lapè, granm bonè nan maten mèkredi 27 out 2025 lan, gang Krazebaryè ki mele ak 400 Mawozo te pase anba mòn Chacha, tou pre zòn Kamay, epi yo te moute nan katriyèm seksyon Bèlvi Lamontay, nan komin Petyonvil, nan zòn mache Grefen pou al simen latwoublay. Zèfèyis yo te al kwaze sou gwoup brigad zòn sa yo epi kout zam te fè mikalaw. 5 bandi mouri anba kout zam, 2 tou pre mache Grefen, 2 tou pre wout Metivye, youn mouri nan yon ravin apre li te bay anpil san anba plizyè katouch li te resevwa nan divès pati nan kò l. Bandi yo te gentan mete dife nan plis pase 3 kay pandan yo te fenk parèt Grefen, men popilasyon an te gentan alète brigad yo atan. Okenn moun nan popilasyon an pa viktim. N ap raple w, gang Krazebaryè a pa janm moute nan zòn sa yo pou yo pa plede mouri san rete, men gang nan toujou prete lòt sòlda swa nan men 400 mawozo, swa nan men Djèf Gwolwa pou vin mouri anwo a, selon sa plizyè manm popilasyon an fè konnen. Responsab zòn sa yo mande pou moun ki pa bezwen pa vin fè enpridans nan zòn tankou Gwojan, Divye, Grefen, Fòjak, Kagwo, Doko, Metivye, Lespinas, Glò, Tinèl, san konte divès lòt katye nan komin Petyonvil kote moun yo trè veyatif.
