19/04/2026
Depi byen bonè nan lavi li, atis la te deja gen yon koneksyon pwofon ak mizik. Li fè konnen premye kontak li ak linivè mizikal la sòti lakay li, kote papa li te konn ap jwe mizik avèk anpil pasyon. “Mwen te konn gade papa m ap chante ak kè kontan pandan mizik yo ap pase. Li te gen anpil kasèt, e nan katye a yo te konn rele l Cubano,” li rakonte.
Yon lòt etap enpòtan nan dekouvèt li se lè li te jwenn kèk kasèt, magazin ak CD nan yon bwat yon tonton li te voye sòti aletranje. Se moman sa a li konsidere kòm premye rankont reyèl li ak mizik, yon rankont ki pral make lavi li nèt.
Malgre li te fè yon ti pasaj nan legliz, eksperyans lan pa t dire lontan. Li eksplike ke, kòm timoun, li pa t vrèman adapte ak disiplin legliz la, menm si manman li te konn fòse li ale. Peryòd sa a pa t sifi pou kenbe li, paske li te plis atire pa libète ak aktivite timoun nan lari.
Se kèk ane aprè, sou ban lekòl Père de Montfort nan Tijo nan komin Pòtoprens, li pral rekonekte ak mizik ankò. Sepandan, se an 2016 li deside pran mizik oserye, aprè plizyè fòmasyon ki ede li estriktire tèt li kòm atis pwofesyonèl, avèk sipò Eliacim Abolasen.
Atis la fè konnen enfliyans li yo sòti nan plizyè estil, tankou rap ameriken ak fransè, dancehall, zouk ak lòt sonorite. Avèk tan, li devlope yon pasyon pwofon pou mizik, e li rive dekouvri pwòp talan li. “Mwen vin konprann fòk mwen konstwi don sa a pou m ka bay li tout valè li,” li eksplike.
Jodi a, li pare pou prezante nouvo pwojè li ki rele “Nostalji ak Souvni”, yon EP ki vini kòm yon avan-gou pandan piblik la ap tann premye albòm estidyo li, “ÀZéro19.08.25”, ki deja fini men k ap tann resous nesesè pou lansman li.
Nan vizyon li, pwojè sa a gen pou objektif anrichi diskografi dancehall ayisyen an. Li raple ke aprè disparisyon kèk gwo non tankou Full Bass, Rbass ak Izi One, ansanm ak kontribisyon Solèy Sound, mouvman an te pèdi fòs li. Se nan kontèks sa a li deside pote yon nouvo enèji, ak yon sonorite modèn, yon lespri kreyatif, epi yon volonte pou bati yon kominote solid alantou reggae dancehall nan peyi a.
“Nostalji ak Souvni” se plis pase yon pwojè mizikal. Se yon refleksyon sou memwa, eritaj ak espwa. Daprè atis la:
Nostalji ba nou fòs pou nou vanse, tandiske souvni yo kite tras ki alimante lespwa nou.
Li wè travay sa a kòm yon kontinite nan eritaj zansèt yo, kote chak mizik pote yon pati nan nanm dancehall la. Chak pawòl, chak son, se yon ekspresyon kouraj ak espwa pou yon avni miyò.
Pwojè a dedye a tout pèp ayisyen an, ak yon omaj espesyal pou Pacia Flaunesse Ma’ek Tyna, Marc Bryan Pierre, ansanm ak de timoun li konsidere kòm “ti zanj limanite”, ki senbolize lanmou, aksyon ak espwa.
EP a gen 7 mizik, pami yo:
DD Saw Gen La
Single Mada (yon adaptasyon orijinal Mister Nayh)
Graduation (ak yon entèpolasyon 10 segonn nan “Pa Kriye Kanpech”)
Lejand (ak Manman Cori / Chosen, anba sipèvizyon 971 Empire)
Nostalji ak Souvni
Viktim (yon storytelling remasterize)
Me Luv Yah (yon deklarasyon lanmou pou Ayiti)
Daprè atis la, pwojè a se yon pwen depa pou yon mouvman pi laj: sòti dancehall la anba tonèl pou mennen li sou gwo sèn entènasyonal yo.
“Nostalji ak Souvni” ap disponib sou tout platfòm distribisyon mizik apati 20 avril.
