02/06/2025
WENDYYY se rapè Ayisyen ki soti dirèkteman nan endistri lokal la Ayiti san feat avèk atis etranje Pou Rive sou Billboard, Istwa Yon Pyonye nan Rap Kreyòl
Nan yon endistri mizikal kote baryè yo souvan anpil, Wendy Traka, plis rekonèt kòm Wendyyy, kraze limit yo epi make non li nan listwa kòm sèl rapè Ayisyen kap opere lokalman ki klase sou Billboard Charts jiskaprezan.
📈 Yon Trajektwa Eksepsyonèl sou Billboard
Nan epòk kote reyalizasyon entènasyonal yo ra pou atis ki soti dirèkteman an Ayiti, Wendy reyalize yon feat ekstraòdinè: 3 pwojè sou Billboard Charts, chak avèk enpak pa yo:
2016 – Indétrônable
#11 sou Billboard World Albums
Premye albòm Rap Kreyòl ki fè gwo reyalizasyon sa, san yon ft avèk atis etranje
🎵 Patron (EP) (2022)
#97 sou Billboard Top Current Album Sales
EP sa a te antre sou lis Top Current Album Sales pandan semèn 18 jen 2022, yon lòt siksè enpòtan pou mizik lokal la.
🎵 Trois (2024)
#46 sou Top Current Album Sales
#25 sou Emerging Artists
Albòm Trois make youn nan pi gwo reyalizasyon Wendy ak Rap Kreyòl nan listwa. Klasman sa yo mete li ofisyèlman nan kategori atis ki gen enpak entènasyonal e ki kapab atire atansyon endistri mizik mondyal la.
WENDY fè gran reyalizasyon sa yo san li pa deplase al viv Ozetazini, ni siyen ak okenn label entènasyonal, se sa ki mete reyalizasyon li plis inik, e mete l kòm referans pou tout jenerasyon jèn Ayisyen ki kwè nan kapasite lokal yo.
🔥 Yon Dominasyon Solid nan Rap Kreyòl
Depi fen ane 2000 yo, Wendy ap jwe yon wòl san parèy nan evolisyon Rap Kreyòl:
Li toujou rete konpetitif sou plan teknik, lirikal ak sonorite.
Li enspire tout yon jenerasyon atis ki sòti apre li, tankou, Baky, MechansT, Toby, Rutshel, Bgamel, Blondedy, Fatima, Zoe Manno, ak Durkeim pou site sèlman sa yo
Plizyè lòt atis menm deyò Rap, tankou atis Konpa rekonèt enpak li sou chwa mizikal yo.
Kisa ki fè Wendy tout sipèsta sa?🤔
👥 Yon Fanbase Pasyonan
Fanatik Wendy yo pa sèlman tande mizik li,yo viv li. Soti nan rezo sosyal rive sou sèn TikTok, fanatik li yo pote non tankou Chinwa oswa Foumi. Anpil figi piblik tankou DJ Lobey, Stanley, Toto Show, Jeff Oka, Tchoupouly509, Anmwey, pou site sèlman sa yo kontinye pataje ak defann pwojè Wendy yo ak pasyon.
🐜 Foumi yo
Se fanatik ki reprezante travay di, disiplin ak lojyalite. Yo toujou aktif, pataje mizik Wendy, defann li sou rezo sosyal tankou nan lari, epi mete presyon lè li nesesè. Yo se fòs sou teren.
🀄 Chinwa yo
Fanatik ki wè Wendy kòm yon lidè, filozòf ak senbòl. Yo pi stratejik, yo mete stil li, panse li ak mesaj li sou rezo sosyal tankou TikTok. Yo se fòs spirityèl ak kiltirèl mouvman an.
Enpak yo:
Chinwa oubyen Foumi yo antann yo trè byen, yo mete Wendy sou pye, yo fè mizik li viv, yo defann non li, epi yo mete mouvman Rap Kreyòl la sou map la. Ansanm, yo se lame a, Bwa dèyè bannann WENDY
📢 Travay Endepandan & standa Pwofesyonèl
Malgre absans WENDY sou kèk gwo platfòm medya lokal, e malgre li pa asosye ak okenn gwo label entènasyonal, Wendy toujou kenbe yon prezans solid ki respekte. Se pa atis ou tande chak jou sou rezo radyo ak televizyon, men lè li pale li frape fò e li rive trè lwen.
Li evite eskandal rezo, li kontwole konsomasyon li, jere imaj li avèk prekosyon. Disiplin sa fè li vin yon modèl pou anpil lòt atis.
🌍 Yon Enpak Ki Depase Mizik
Chak pwojè Wendy lage mete tout endistri mizik la sou mouvman:
Lòt atis pran avantaj de vag sa a pou lage mizik.
Enfliyansè ogmante aktivite yo.
Mizik li ranvwaye motivasyon sou tout sistèm lan.
Wendy pa sèlman bay mizik, li pote vizyon, enèji, e li fòse tout endistri a leve kanpe ak renouvle tèt li.
Wendy pa jis yon rapè, li se yon referans, yon pyonye, yon modèl pou jenerasyon aktyèl ak sa kap vini yo. Reyalizasyon li sou Billboard, dominasyon li lokalman, ak etik pwofesyonèl li fè l tounen youn nan pi gwo atis Ayiti potko janm genyen.
Rap Kreyòl ap viv yon revolisyon. Epi, non ki make kòmansman revolisyon sa a?
WENDYYY.
© News timoun 2000
