06/10/2025
Wajigii kowaad Ee is-aragii Madaxweyne Xasan Sheekh iyo Axmed Madoobe oo soo dhamaaday
Waxaa goor dhow soo gebogaboobay wajigii koowaad ee wadahadallada albaabadu u xidhnaayeen ee caawa ka dhacay Guriga Martida ee Magaalada Kismaayo, kuwaas oo u dhexeeyay Madaxweynaha Jamhuuriyadda Federaalka Soomaaliya, Xasan Sheekh Maxamuud, iyo Madaxweynaha Jubbaland, Axmed Maxamed Islaam (Axmed Madoobe).
Kulankan oo ahaa mid si gaar ah loo qorsheeyay, ayaa lagu sheegay inuu diiradda saarayay xal u helidda khilaafka siyaasadeed ee u dhexeeya Dowladda Federaalka iyo maamulka Jubbaland, balse warar goor dambe la helay ayaa muujinaya in kulankii ugu horreeyay uu kusoo dhamaaday is-faham la’aan iyo kala aragti duwanaan muuqata.
Villa Soomaaliya oo weli diidan aqoonsiga doorashada Jubbaland
Wararka laga helayo ilo ku dhow wadaxaajoodyada ayaa sheegaya in Villa Soomaaliya aysan weli aqbalin shuruudda koowaad ee Jubbaland ku xirtay wadahadallada — taas oo ah in dowladda federaalka ay si rasmi ah u aqoonsato doorashadii Kismaayo ee dhammaadkii sanadkii h**e lagu doortay Axmed Madoobe.
Dhanka kale, Madaxweyne Xasan Sheekh ayaa la sheegay inuu ku adkaysanayo in Axmed Madoobe uu ka laabto doorashadiisii, isla markaana uu aqbalo doorashada qof iyo cod ee heer maamul goboleed lagu qaban doono mustaqbalka dhow, sidoo kale uu dib ugu soo laabto Golaha Wadatashiga Qaran, oo ah madal ay ku bahoobeen madaxda dowlad-goboleedyada iyo dowladda dhexe.
Jubbaland oo ku adkaysanaysa mowqifkeeda
Madaxweynaha Jubbaland, Axmed Maxamed Islaam, ayaa dhankiisa diidan in wax wadahadal ah laga galo qodobada kale, ilaa DFS ay marka h**e aqoonsato doorashadiisii, isagoo sheegay in wixii kale ee khuseeya hannaanka doorashooyinka iyo wada shaqeynta lagu heshiin karo marka la xaqiijiyo sharci ahaanshaha maamulka Jubbaland.
Kenya iyo Sanbaloolshe oo door muuqda ka ciyaaray
Kulanka caawa waxaa goobjoog ka ahaa saraakiil sare oo ka socday Dowladda Kenya, kuwaas oo lagu sheegay inay qayb ka yihiin dadaallada diblumaasiyadeed ee lagu doonayo in lagu xaliyo xiisadda labada dhinac.
Sidoo kale, Taliyihii h**e ee Hay’adda Nabad Sugidda iyo Sirdoonka Qaranka (NISA), Cabdullaahi Maxamed Sanbaloolshe, ayaa door “odeynimo” ah ka qaatay kulanka, isagoo la socday Madaxweyne Xasan Sheekh.
Wajiga labaad oo berri lagu wado inuu bilaabmo
Wararka la helayo ayaa tilmaamaya in wajiga labaad ee wadahadallada lagu wado in uu bilowdo berri gelinka h**e, waxaana la rajeynayaa in dhinacyadu ay isku dayaan inay meel dhexe isugu yimaadaan si looga fogaado khilaaf hor leh oo siyaasadeed.
Hase yeeshee, ilo xog-ogaal ah ayaa sheegaya in xaaladda hadda taagan ay tahay mid cakiran, iyadoo dhinac walba uu ku adkeysanayo mowqifkiisa.
Madaxweyne Xasan Sheekh iyo Taliyaha sirdoonka Dalka Kenya Nurdiin Xaaji ayuu hadda kulan kale oo albaabada u xidhan yihiin Sidoo kale u bilowday.
Kulankan ayaa loo arkaa mid muhiim ah oo go’aamin kara jihada ay qaadi doonto xiriirka ka dhexeeya Villa Soomaaliya iyo maamulka Jubbaland, gaar ahaan xilli ay soo dhow yihiin wadatashiyada ku saabsan hannaanka doorashooyinka qaranka iyo dib u dhiska hay’adaha federaalka.
Maxay kula tahay?
