24/07/2025
MANDI KA BATANG AIA.
Sanak. Jadi caritonyo dulu sangkek kami ketek-ketek, dikampuang kami ko sang*ik sulik aia.
Dulu alun adoh aia pam masuak ka kampuang kami lai doh.
Nah... Mulai dari jam satangah 4, kami lah basiap-siap pai ka batang aia untuak mandi.
Manga jam satangah 4 bana.?
Yo buliah pasai baranang😁
Jam satangah 4 tu kami lah bakameh. Ambiak embe batangkai, isi anduak jo baju ganti. Jan lupo sikek jo badak nyo bag*i.
Jan lo lupo mambao nasi nan babungkuih jo plastik gulo. Nasi ko lah taaduak jo siso lado samba amak.
Jikok masih ado samba dibawah tuduang, baok bag*i lah sasaik. Kok dak ado basamba mandeh lai, pakai minyak siso samba tadi lah lamak juo.
Ma yang punyo benan, baok lah benan ko ka batang aia untuak baranang. Kalau dak adoh benan bisa pakai derigen minyak yang 5 liter. Masih bisa juo di pakai. Beko pulang-pulang isi jo aia barasiah untuak mancuci kaki tibo dirumah.
Kalau dak punyo derigen minyak, baok sajolah kain saruang amak. Dikabek bateh katiak, dikambangkan bawahnyo, dibae malompek dari ateh. Jadilah parapuang mode balon-balon.
Sangkek tu ba macam-macam pakakeh nan di bao ka batang aia. Ado nan mambao piriang kumuah. Ado nan mambao kain kumuah. Ado nan hanyo malenggang sajo.
Salasai karajo barulah kami mancilam kadalam aia. Baranang sampai manggigia baru kalua untuak makan nasi nan babao tadi.
Kadang kami dak ado minum, bakumua kumua sajo aia batang aia ko baru lanjuik baranang.
Nan ketek ketek lah pasai baranang, baru tibo nan gaek gaek ka mandi. Satangah 6 lah kalua dari aia sadonyo, bajalan basamo samo pulang.
Kadang nan paliang seronyo, ado batang karambia nan rabah arah ka aia, disitu lah mainan kami barado.
Dipanjek nyo karambia condong ko, dihoyak nyo samo-samo.
Sia nan jatuah ka aia labiah dulu, inyo nan kalah.
Dak takuik g*i kami jo ombak maso itu do. Gadang bana aia kami bisa juo baranang sampai kasubarang.
Tibo disubarang baru manggarapai mode simpai.
Ado nan main sipak tekong. Manyuruak baliak batu, mancilam dalam aia, maandok baliak samak.
Ado pulo nan main antuw-antuw. Bakubuan yang kalah kadalam kasiak, kapalo nyo sajo yang bakaluakan.
Beko nan manang maituang sampai 10, bangkik lah antuw ko dari tanah, bakaja nan manang sampai kadalam aia bag*i.
Kok alun sirah incek mato, alun ka baranti kami baranang lai doh😅
