Kaba jo Carito Minang

04/07/2025

03/07/2025

Sabana e antahlah, tapi baa lah.....

21/06/2025

Cari gampang maingek beda AM jo PM dalam Bahasa Inggris, cek!

18/10/2024

REUNI
BAGIAN 4
Tina mamatuik mamtuik dirinyo di muko kaco. Raso e penampilan e alah paripurna. Jilbab jo baju alah suai warna e. Warna gincu bibia e pas lo jo baju.

Walau alah lamo badaster di rumah, Tina ndak pernah lupo caro babadak. Badan Tina masih singset co padusi umua duu puluah juo lai. Kulik mulus dek rutin luluran jo spa di salon. Muko janiah dek makanan sayua buah seimbang tambah lo skincare e maha. Agiah atau ndak diagiah dek laki, pitih Tina cukuik di dompet. Biar kaum rebahan tapi tajir, itu prinsip Tina.

Tina kalua dari rumah sambia mambaok tas Fossil e nan bali e ba juta tu. Pantang dek Tina bali barang kawe. Dicaliak jo dipatuik Tina masih suai jadi manajer bank.

Dengan picayo diri Tina pai jo taksi ka restoran India nan lokasi e alah diagiah tahu dek Da K**al.

Tibo di restoran India tu, nampak Da K**al malambaian tangan e. Ado baduo urang lai duduk di sampiang lakinyo. Surang laki-laki nan surang lai padusi. Nan laki-laki wajahnyo ndak terlalu kenal bana Tina do, tapi nan padusi sah Tina tau.

Nampak dari jauh Jinbarageh nan selalu mengiriman foto-foto jo laki e alah bara hari ko. Jibarageh nan namo sabana e Epa ko pun alah maliek Tina dari jauh.

Wajah e agak takajuik tapi nyo pura-pura mangicek jo laki-laki nan di sabalah e. Da K**al tagak manyonsong Tina. “Macet di jalan tadi Na?” tanyo Da K**al.

Tina manggelengan kapalo e.

“Iko kawan Uda, Na. Iko Salam, nan Iko Epa. Lam, Epa, iko urang rumah ambo, Tina,” kato Da K**al.

Tina manjuluan tangan e ka Salam, siap tu ka Epa. Di ganggamnyo tangan Epa agak kuat sagetek dek Tina walaupun Tina galak manih ka Epa. Epa takajuik tapi ndak bisa babuek apo-apo. Tina maraso di ateh angin. Mental Epa manciut. Sangkonyo Tina ko induk-induk kusuik badaster sajo, rupo e indak. Salah cari lawan Epa raso e.

Antaro manyasa jo indak. Manyasa mausik Tina, ndak manyasa karanonyo memang alah kanai hati ka K**al dari dulu. Kini dapek kesempatan dakek dek acara reuni akbar ko, Epa ndak akan manyio-nyiokan kesempatan. Tapi nan jadi masalah, K**al basikap biaso sajo, ndak lo manunjuk an perasaan sukonyo ka Epa.

“Apo kegiatan kini, Na?” tanyo Salam.

“Ndak ado. Di rumah sajo da,” jawek Tina marandah. “Maabehan Uda K**al jo anak-anak” lanjuik Tina.

Epa nan mandanga itu maraso ado kesempatan. Oh, jadi bini K**al ko hanyo ibu rumah tanggo nan manang di gaya sajo?

“Bukannyo dulu Na karajo di Bank?” selidik Salam.

“Iyo, tapi nyo korbankan karir dek yayang ambo ko supayo bisa maabehan laki jo anak-anak di rumah. K**a ka ambo cari padusi nan bisa mangalahan ego e untuk di rumah sajo maabehan ambo jo anak-anak? Padusi langka bini ambo ko Lam,” kato Da K**al sambia mangganggam tangan Tina tapi mato e mancaliak arah ka Epa.

Epa purak-purak manunduk. Pernyataan K**al alah manjalehan posisi e. Inyo ndak labih ndak kurang hanyo padusi nan mancubo peruntungan jadi pelakor tapi alah kalah dulu dek salah mamilih lawan.

Hati e sakik raso di rameh, tapi salah sia. Epa nan bamain api, inyo tabaka surang.

Mancalik pasangan nan saliang manatap mesra inyo maraso patah.
Epa purak-purak mancaliak hape dan tibo-tibo inyo mangicek

“maaf sadonyo, ado pasan mandadak dari rumah sakik. Awak harus baliak mancaliak amak wak. Jadi maaf, ndak bisa ikuik makan siang do,” kato Epa mancari alasan.

Salam takajuik. “Paralu di anta, Pa?” nyo mancubo maagiah katolongan ka Epa.

“Ndak usah, Lam. Bia Epa pai surang naik ojek online sajo. Tagaduah lo beko acara makan siang kawan-kawan sadonyo,” kilah Epa.

“Epa duluan yo, Mal, Lam, Tina” pamit Epa.

“hati-hati di jalan Pa,” kato Salam masih khawatir. “Bakaba beko kalaua do apo-apo yo Pa,” lanjuiknyo.

“Iyo. Mokasi Lam..” Epa mulai bajalan ka arah lua restoran India tu.

Tapi Tina manampak sapu tangan nan tatingga dakek Epa duduk tadi. Spontan Tina maambiak sapu tangan tu dan nyo agak balari maimbau Epa nan kini alah ado di lua restoran.

“Ni Epa, sapu tangan e tingga,” kato Tina.

“Eh, iyo. Maaf, ndak sangajo tadi tatingga do. Dek tasasak lupo se jadi e,” jawek Epa.

“Dek tasasak atau sangajo batinggaan, Ni Epa?” Tina mulai curiga.

“Apo maksud Tina ko? Ndak mangarati Uni do,” kilah Epa sambia mambuang pandang.

Tina galak sengeang, “Salah pilih lawan Uni ma,” kato Tina. “ Nan bujang banyak, nan duda ado, nan gaek tasadio, baa kok laki urang nan bapilih, Ni?” Tina galak sereang.

Wajah Epa barubah warna jadi saputih kapeh. Tanyo Tina langsuang sampai ka ulu hati e. Malu, tapi dek perasaan kanai hati ko juo batabaan muko, pura-pura ndak ba malu se.

“Maambik nan punyo urang ko lain lo manantang e ma, Tina. Nan mamacu adrenalin awak tu nan mambuek wak tambah mudo,” kato Epa sambia manyaringai.

Tina geram mandanga e. Tapi sadapek mungkin nyo tahan emosi. Sambia galak cimeeh, Tina manjawek, “ Caliak-caliak ka marompak paga rumah tangga urang, Ni. Paga urang bagembok. Kok tangan uni nan ka luko. Barang bacilok ko haram mah ni, ndak malu uni? Kok rancak lai dek uni, ko sakola lai tinggi pulo, karajo lai segeh lo, baa kok barang bekas nan ka tuju dek Uni? Randah bana salero Uni ma,” Tina tagalak.

Samantaro Da K**al nan maraso Tina lamo di lua mulai was-was. Da K**al nan mulai khawatir sebab nyo tahu baa bininyo kalau alah emosi basigageh manuruik kalua restoran.

Nampak Tina sadang galak sengeang di muko Epa nan sadang manahan emosi pulo. Kaduoannyo bantuk Singo jo Harimau nan ka balago. Tapi mereka baduo ko masih manahan emosi bantuknyo.

“Na, baa kok lamo bana di lua? Apo nan sadang baotaan tu?” K**al pura-pura ndak tahu.

“Ndak ado. Bakenalan sagetek jo Ni Epa, Da. Cameh bana Uda Tina lamo di lua ma,” tanyo Tina sangajo manjo.

K**al nan mangarati jo gurenah bini manjawek, “baa ka indak lah. Saminik se Na ndak nampak di mato Uda, alah khawatir uda. Takuik uda kok usak bini Uda ko,” K**al mangicek sambia galak.

Epa manahan hati. Urang baduo di mukonyo bersikap seolah inyo ndak ado di muko bumi. Antah sangajo antah indak, Epa sakik hati. Nan parah e, K**al indak lo peduli. Apo nan labiah sakik selain cinto nan batapuk sabalah tangan?

Untuang ojek nan dipasan Epa datang manyalamatkan muko e. Bagageh Epa pai setelah babaso basi ka pasangan laki bini nan sadang mabuk cinto bantuk e.

Sapaningga Epa, Da K**al batanyo ka Tina, “Apo tadi nan bakicek an ka Epa, Na? Bantuak singo ka makan harimau Na bantuk e tadi dek uda,”.

Tina tagalak, “salah e surang manjagoan singo lalok. Tina ka diago, dapek lawan e beko,” kato Tina.

“Sudahlah, jan diagiah malu bana urang, Na. Uda kan ndak ado raso ka inyo do. Rasonyo uda basikap biaso sajo tapi inyo nan salah tangkok,” jaleh K**al.

“Yo lah. Makan lah wak lai. Lapa Na langsuang dek manahan emosi padusi aneh tu mah. Lagian sagan pulo wak kawan Uda alah lamo manunggu di dalam,” ajak Tina.

Da K**al maangguak sambia maikuti langkah Tina bajalan ka meja tampek Biryani nan dipasan e tadi balatak an.

BERSAMBUNG

18/10/2024

REUNI
BAGIAN 3
Hati Tina mulai ndak tanang katiko maliek jam salapan malam Uda K**al alun pulang juo lai. Pasan Tina dak dibaleh, ditelpon ndak maangkek. Anak-anak mulai heran baa kok ayah e alun pulang juo karajo tapi mananyoan agak anggan ka Tina. Nan bungsu batanyo ka uda nyo.

“Kok ayah alun pulang yo da?” kato Runi.

“Ndak tau uda do. Mungkin ayah sibuk ma,” jawek Aqmar.

Tibo-tibo pasan masuak. Dari Jinbarageh! Foto pulo baliak.
Kini foto makan baduo lai. Selfie pulo.

Nyo buek pasan, “akhirnya setelah lelah berurusan dengan rumah sakit, Da K**al dengan senang hati menemani makan malam dan dengan sabar mendengar keluh kesahku. Terima kasih, pujaan hati,”

Tina pengin muntah mambaconyo. Ditelponnyo da K**al, tapi ndak bisa. Di luar jangkauan jawek operatornyo.

Tina tamanuang. Pikirannyo mulai bacabang, antaro picayo jo ndak picayo ka lakinyo. Dunia kini yo sabana gilo. Ndak laki wak nan gata, na padusi gilo-gilo ranang ka laki urang. Alah banyak kejadian nan nampak jo tadanga dek Tina.

Jam sambilan lewat sapuluah minik, Uda K**al akhir e pulang juo. Wajah e agak lelah nampak. Tina co biaso manyambuiknyo jo muko janiah, manjawek tangan lakinyo, tu maagiah aia putih sagaleh ka diminum da K**al. Tina ndak ado mananyoan baa ko lambek Da K**al pulang walaupun dalam hatinyo nio berang apolai setelah mancaliak foto nan dikirim padusi gilo tu.

Da K**al mulai pai mambarasihan badannyo, manuka pakaiannyo jo baju rumah dan sumbayang. Tina manunggu di meja makan. Salasai sumbayang Da K**al duduk di meja makan.

“Alun makan Na lai?” tanyo Da K**al.

“Manungguan uda raso ka pulang juo dari tadi. Alun ado Na makan lai,” jawek Tina agak kesal.

“Maaf Na, Uda ado urusan mendadak tadi nio mangabaan batrai hape uda habis pulo. Uda alah makan tadi Na samo kawan tu,” kato da K**al.

Tina mamandang tajam ka da K**al.

“Urusan mandadak apo?” selidik Tina.

“owh, amak kawan Uda tibo-tibo kambuh jantuangnyo. Jadi kawan uda ko mintak tolong antaan ka rumah sakik, tu manungguan amaknyo pulo dulu malakik dunsanak nyo nan lain tibo. Tu habis tu uda anta kawan uda tu pulang ka rumahnyo,” jaleh da K**al.

“Elok bana uda ka kawan uda, yo? Kawan uda laki-laki atau padusi?” tanyo Tina.

Da K**al tatagun. “Padusi, Na. Ibo uda nyo. Nyo tingga baduo sajo jo amaknyo di rumah,” jalleh da K**al.

“Ndak balaki inyo?” selidik Tina.

“Ndak, Na. Alun balaki lai. Dulu sempat putuih tunangan” kato Da K**al.

“Sia namonyo?” tanyo Tina.

“Epa” kato Da K**al.

“Uda alah malangga kesepakatan pernikahan awak bantuaknyo ko mah. Uda nan mangicek an ka Na, tapi uda surang nan malangga. Kicek uda dulu, bakawan dakek jo laki-laki jan sampai ado curhat-curhatan, bacarito masalah pribadi. Di situ masuknyo urang katigo dalam rumah tangga awak. Baitu lo jo uda, jan sampai uda jadi tampek curhat kawan uda nan padusi. Bisa jadi duri dalam rumah tangga awak.” Kato Tina.

Da K**al tamanuang. Takana Epa nan alah nyaman bantuknyo curhat ka inyo. Tiok sabanta nyo mangirim pasan ka K**al walaupun K**al ndak ado raso apo-apo kecuali raso ibo dek bakawan sajo.

Tibo-tibo hape Tina nan talatak di rak buku dakek meja makan babunyi, Ado pasan masuk. Pasan dari Jinbarageh, ruponyo. Ciek gambar lai. Fotonyo sadang baduo di ateh oto kenek Da K**al.

Caption e, “habis dinner pulang dianter ke rumah sama kekasih hati. So sweet”.

Tina raso ka muntah mancaliak e. Diagiahannyo ka Da K**al hapenyo tu. “Ko caliak lah dek uda pasan-pasan nan dikirim urang ka Tina,”.

Da K**al manggarinyik an kaniang e mancaliak namo nan mangirim pasan. “Jinbarageh? Sia ko Na?”

Tapi katiko mancaliak poto-poto jo caption nan ditulih mambuek Da K**al takajuik gadang. “Epa?” raso ndak picayo K**al mancaliak foto tu, tapi itu memang foto nyo jo Epa. Captionnyo nan mambuek Da K**al ndak habih pikia. Sajak bilo inyo jadi kekasih hati Epa ko?

Tina masuk bajalan ka kamarnyo diikuti dek lakinyo nan sadang shock tu. Sampai di kamar Tina tagak dakek meja rias sambia mamaluak tangannyo ka dado. Matonyo tajam mamintak penjelasan da K**al.

Da K**al manutuik pintu. “Uda ndak ado hubungan apo-apo jo inyo do Na,” kato Da K**al.

“Sumpah demi apopun, ditembak patuih tungga uda jadinyo,” sumpah da K**al.

“Uda ibo karano nyo curhat tentang hiduiknyo, karajo, amaknyo jo mantan tunangannyo. Dan uda basuo jo inyo dek ado rapek acara reuni akbar tu sajo nyo Na.”

“Tu hasil e ibo uda tu ma. Kalau ndak janiah Na bapikia dek uda alah baserak tambang rumah tangga wak ma. Laki-laki nan gata banyak da, tapi padusi nan gilo-gilo ranang marabuik laki urang labiah banyak lo lai. Tu kawan uda tu contoh e. Diambiaknyo foto dikirim ka Na. Kini salasaian dek uda masalah nan uda buek surang. Kok iyo uda sayang ka Na jo anak-anak, ndak ado celah untuk urang katigo di rumah tangga awak do,” kato Tina berani.

“Iyo bia uda salasaian. Gilo paja ko ma. Uda ndak lo ka manyangko ka co iko jadi e do, Na. Uda mintak maaf Na..bisuk uda salasaian jo si Epa tu,” kato Da K**al.

“Jan berang ka Uda, Na…maaf an Uda dih,” Da K**al marayu Tina.

“Kok berang Na ka Uda ndak ka Tina agiah makan uda tiok pagi do,” kato Tina sambia marunguik. “Berang kicek uda. Mode itu bini sia nan ndak ka mamburansang ado padusi nan mangaku-ngaku jadi kekasih hati laki wak,” hati Tina alun jo pueh marunguik lai.

“Bialah inyo gilo ranang surang, Uda kan sayang ka Tina jo anak-anaknyo,” rayu da K**al.

“haih Uda lai…alah gaek pulo mako ka sayang ba sayang,” Tina baliak kalua kamar, nio balik ka meja makan. Paruik e lapa dek manahan emosi dari siang tadi.

Pagi isuaknyo Da K**al babisik ka Tina.

“Na, ndak usah baok bekal Na. Kawani se uda beko makan siang di restoran dakek kantua dih. Ndak taragak Na makan Biryani? Ado restoran India baru bukak di dakek kantua tu. Bilo juo wak makan baduo lai Na?”

Tina maangguak an kapalo. “Uda traktir, Na” kato Da K**al sambia mangijok an mato.

“Ih bantuk nan ka banyak pitih lo uda. Atm uda latak e di dompet Na. Lupo Uda? Bali bensin oto Uda se dari saku Na pitih e,” Tina mancibia.

Da K**al tagalak. “Uda ado dapek rasaki patang sagetek. Cukuiklah untuk mentraktir buk bos kamek berdaster uda ko,” rayu K**al sambia maelus sayang rambuik Tina.

“Uda barangkek dulu yo Na. Jan lupo beko makan siang. Pakai baju ancak Na, uda nio mangenalkan bini Uda ka kawan Uda beko.
Assalamualaikum” pamit Da K**al.

“Waalaikum salam” jawek Tina malapeh lakinyo pai karajo.

BERSAMBUNG

18/10/2024

REUNI
BAGIAN 2

Tapi nan namo e rumah tanggo pasti ado sajo masalahnyo. Ndak ado lauik nan ndak ka ba riak. Alah bara bulan ko Da K**al sibuk jo kegiatan alumni akbar di SMA nyo. Baliau ko lai ditunjuak pulo jadi panitia acara. Jadilah Uda K**al ko sibuk. Bahkan sampai tangah malam pun WA nyo masih badantang-dantang juo baru. Awalnyo Tina ndak terlalu mempermasalahkan. Tapi lamo-lamo Tina jadi samak utak juo, mulai protes jo kesibukan Da K**al. Ditambah jo chat group dan pribadi nan ndak baranti-ranti. Da K**al sibuk jo hape di kamar tidua samo meja makan. Saparo muak Tina dibueknyo.

Padohal ado aturan baku di rumah, hape harus mati jam sapuluh malam ka ateh, dan ndak ado carito anggota keluarga nan mamaciak hape katiko makan. Tapi aturan tu dilangga dek da K**al. Muntablah Tina dibueknyo.

Siang Tina sadang manulih ulasan barang untuk halaman internet manggalehnyo katiko hapenyo badariang; ado pasan masuak.

Dibukaknyo WA, ado pasan dari nomor baru, mangiriman gambar pulo. Biasonyo Tina indak ka mambukak gambar dari nomor asiang karano takuik peretasan atau virus, tapi kato-kato nan ado di bawah gambar tu nan mambuek Tina takajuik. “Makan siang jo Uda K**al tacinto, cek”. Langsuang Tina penasaran.

Dibukaknyo gambar tu, poto da K**al jo padusi di sampiangnyo saliang galak bapandangan. Dimuko mereka ko ado beberapa jenis makanan. Bantuaknyo makanan Cino.

Tasirok darah Tina sakali. Nio manangih tapi aia mato ndak namuah kalua. Nio mamakiak tapi ntah apo nan ka dipakiak an. Sakik dado Tina taraso.

Tamanuang Tina, pikiran e jadi bacabang-cabang. Azan Zuhur tadanga, Tina sumbayang sambia mandinginan kapalo e. Lamo duduk di sajadah, akhirnyo Tina bangkik. Diputuskannyo sajo untuk mampadiakan pasan tu. Dan mancaliak gurenah Da K**al beko pulang. Yang penting jan tabaok emosi, itu pangananyo.

Sorenyo Da K**al pulang kantua. Tina manyambuik takah biaso. Masih senyum dan manyalami lakinyo. Diagiahnyo aia putih. Dan Da K**al masih bersikap mode biaso. Tina maambiak kotak bekal da K**al ka mambaok ka dapua, kaniangnyo bakaruik. Barek kotak bekal tu masih samo co tadi pagi.

Da K**al sadar diri kalau bininyo sadang mancaliak manuntuik panjalehan walau tanpa kato.

“Maaf, Na..makan siangnyo ndak jadi tamakan dek uda do. Uda mandadak diajak makan siang tadi samo kawan-kawan panitia alumni di restoran dakek kantua. Pertemuannyo mandadak sajo. Kanyang paruik uda, mako e bekal uda baok pulang liak supayo uda bisa makan untuk malam beko sajo,” kato da K**al sambia senyum.

Tina maangguak an kapalo. Uda K**al lai jujur masalah bekal ko bantuaknyo.

“Ado padusi bagai panitia nyo da?” tanyo Tina.

“Lai. Banyak juo nan padusi tarutamo seksi konsumsi dan surek manyurek,” kato Da K**al. “Baa tu? Curiga Na ka Uda?”, tanyo K**al.

“Ndak. Cuma batanyo se,” kato Tina.

Berarti nan mangiriman gambar tadi pastilah salah satu induk-induk nan jadi panitia acara alumni tu. Tapi pertanyaannyo, dari ma nyo dapek nomor Tina?

Malamnyo Tina mambaco pasan dari grup alumni SD nyo. Ado usulan untuk basuo makan-makan karano ado beberapa urang kawan nan dirantau pulang. Mereka ko taragak nak basuo.

“Baa kawan-kawan? Lai bisa kiro-kiro minggu muko hari Rabaa wak basuo di restoran salero lamak tu? Bagi nan bisa tolonglah dibuek daftar namonyo.” Mode itu bunyi pasan di grup nan dibuek dek salah surang kawannyo, Jamal.

Mulailah daftar namo ko dibuek digrup. Karano alumni angkatan Tina di SD Cuma duo puluh limo urang, dalam wakatu sabanta, alah ba isi se daftar namo ko sabanyak duo puluh urang dalam wakatu limo minik.

“Tina ma? Dak ikuik Na? Ikuik lah, Na…taragak wak basuo Tina. Alah hampia duo puluh tahun wak ndak basuo Na ha,” tulih pasan kawannyo di grup tu, Ijon namonyo.

“Iyo Na, pai yo Na. Alah banyak kawan-kawan nan taragak basuo jo Tina ha,” kato Isal.

“Iyo….taragak den Jo Tina ha, kawan samo bagubalo jawi den di parak Anyah ha. Pai yo Na” baleh Toni.

“Penasaran, baa wajah Tina tu yo? Lai sakaliang dulu juo lai na? Lai samo kaliang juo wak lai na hahahahah?” kato Dodit.

“Tina ko kawan mandi-mandi den balumbo-lumbo di lubuk Sungai Balik sari mah kawan. Pulang sakola mancilam di lubuk langsuang sambia maambiak tanah liek. Mandi sampai mato sirah, tu pulang lai. Sampai di rumah kanai haban dek gaek…hehehehee. Indah bana maso kenek wak dulu ndak Na?” kato Iyuih.

Tina tagalak mambaco e. Tapi masih ndak nio mambaleh.

Ndak lamo datang lo pasan dari Ilin nan kini samo laki jo anaknyo tingga di Serang.

“Na awak pulang lo ma. Basuo wak yo Na. Wak taragak jo Tina ha, taragak wak maingek kawan samo main yeye wak,” tulih Ilin.

Tina baliak tagalak. Ndak sadarnyo Da K**al mamparatian e dari tadi.

“Tina jagok main yeye, jagok lo main genggong ma. Sakiang mantap e, sampai pacah gundu Ujang sari dek e gai,” baleh Pia.

“Tapi Tina kalah taruih kalau main kaleren jo awak”, olok Aguih.

Tina galk-galak mambaco, tapi alun juo mambaleh lai. Tapi sungguh, nyo taragak jo kawan-kawan Esde e. Raso e itu kenangan nan paliang indak talupoan dek Tina.

“Sia nan mangirim pasan Na sampai galak-galak Na mambaco e?”, tanyo Da K**al.

“Ado undangan makan-makan alumni SD da. Jadi kawan-kawan maheboh di grup. Pasan e lawak-lawak,” kato Tina.

“Bilo?” tanyo da K**al.

“Rabaa minggu muko. Lai buliah wak pai da?” tanyo Tina.

“Lai, pai lah. Tapi jago diri elok-elok,” kato Da K**al.

Dapek izin dari Da K**al, Tina langsuang mambaleh pasan kawan-kawan e di grup.

“Kawan-kawan, insyaallah Tina pai minggu muko. Basuo wak, malapehan taragak sambia bagalai-galak”, jawek Tina nan langsuang di agiah ampu dek kawan-kawan e.

“Mantap! Taragak bana den jo kawan sabangku den ko,” baleh Ririn.

Tina mambaleh jo pasan galak sajo. Siap tu hape dilatak an di ateh meja rias di kamar e. Tina ba siap-siap ka lalok tapi Uda K**al masih sibuk pulo jo hapenyo. Tina maleh berkomentar karano mambaok patangkaran rumah tangga di ateh tampak tidua tu pantangan hiduik e bana. Nyo baharaok da K**al sadar.

“Sabanta lai uda lalok, Na. Kok mangantuak Na duluan lalok. Uda masih diskusian acara duo minggu ka muko persiapannyo jo kawan-kawan panitia,” seolah Da K**al sadar jo apo nan dipikian dek Tina. Tina maangguak an kapalo tu mulai marabahan badannyo ka kasua.

Pagi manjalang. Tina sibuk di dapua co biaso. Nan ndak biaso tu Uda K**al nan mangicek an nyo ndak mambaok bekal sebab beko ado rapek baliak sambia makan siang. Tina maangguak sajo dan menyiapkan bekal untuk tigo anaknyo takah nan taralah.

Siangnyo Tina takajuik mandapek an pasan dari nomor nan kapatang mangiriminyo foto model mesra jo da K**al. Kini ko caption foto e, “bajunya warnanya samaan ya Beb….outfit of the day sama Da K**al tersayang,”. Warna baju e memang samo, corak batik e beda. Nampak di foto tu bagai Da K**al senyum sumringah bafoto jo nan padusi. Tina masih ndak mambaleh walaupun nyo yakin padusi tu tau nyo mancaliak foto tu.

“Dari foto ko nampak kami sehati, kan?” paja nan diagiah namo dek Tina pada akhir e “Jinbarageh” tu mulai mangirim pasan.

Tina masih mambaco, tapi ndak mambaleh.

“Akhirnyo upiak abu lai sadar ndak mambuekan da K**al makan siang lai. Sadar diri se lah bekal e ndak lamak, mako e kami makan kalua,” kato Jinbarageh tu.

Tina masih mambaco.

Dikirimnyo foto sakali lai. Kini ko foto e urang baduo ko masih duduk tapi bantuknyo sadang mambaco karateh nan samo. Cadid tapi mesra gitu lah model e.

Tina sabana e paneh hati. Tapi masih manahan diri.
Dikirimnyo pasan ka Uda K**al.

“Dima Da? Alah makan? Jan talat makan ndak da, kambuh maag uda beko,”

Pasan tu langsuang dibaco dan dibaleh dek Uda K**al.

“Uda di restoran Cino dakek kantua. Alah makan samo kawna-kawan. Ko sadang diskusi masalah dana untuk acara alumni tu. Alah makan, Na? Sadang manga Na ko?” baleh da K**al.

Hati Tina mulai tanang mambaco baleh dari Da K**al.

“Ma foto e mah? Caliak na kawan-kawan uda tu? Na alah makan, ko sadang baco bahan untuk kuliah online,” baleh Tina.

Ndak lamo tibo pasan foto dari Da K**al jo kawan-kawannyo, ado “Jinbarageh” tu duduk mangamek di sampiang da K**al. Bantuk wajah e agak mangambok.

Foto tu diforward dek Tina ka padusi tu. Dibalehnyo pasan tadi dengan elegan.

“Raso baduo di nan rami tu ciri-ciri urang halu jo depresi mah ni,” kato Tina.

Sent. Dibaco paja tu tapi ndak dibaleh. Malu muko kawan bantuk e.

“Mati kau, pulang baleh”, kato Tina.

BERSAMBUNG

15/10/2024

REUNI
Bagian 1

Pagi ko agak dingin sebab semalam habis hujan labek. Walaupun cuaca agak kurang bersahabat Tina alah bakapusu mamasak di dapua manyiapkan sarapan pagi untuk anak-anak nyo nan ka barangkek sakola jo lakinyo nan ka pai karajo.

Pagi ko Tina buek nasi goreng jo dadar talua sajo untuk makan. Mambuek nasi goreng ndak lamo karano bumbunyo alah siap dek Tina mambueknyo, jadi tingga maaduak bumbu jo nasi samo mambuek talua dadarnyo sajo. Tu diirisnyo timun, tomat samo salada kapalo untuk ka sayuanyo.

Nan lamo tu manyiapkan bekal makan siang anak-anaknyo nan batigo jo lakinyo. Si Aqmar anaknyo nan paliang gadang sakola di SMP dakek rumahnyo biasonyo ndak pernah banyak kandak. Apo sajo nan dimasukan Tina ka kotak nasinyo selalunyo ndak pernah protes dan selalu habis. Yang penting dek nan paliang gadang ko nyo makan masakan amaknyo.

Samantaro nan di tangah, Arsa, biasonyo nan banyak cincong masalah bekal ko. Karano anak nan tangah payah makan sayua, Tina selalu mengakalinyo dengan mambuek nugget atau nan lain nan bisa dimasuk an sayua. Rancaknyo si Arsa ko suko buah, jadi Tina selalu mamasuk an buah ka dalam kotak bekal Arsa selain makan siangnyo. Arsa kelas anam SD, ndak bara bulan lai masuk SMP lo lai.

Samantaro nan bungsu, padusi, Seruni, kelas 3 SD saulah mode si Aqmar. Pemakan segala. Apo sajo nan dimasuk an ka kotak bekal selalu habis asa laia do sekotak susu di bekalnyo. Lakinyo,

Da K**al, pun selalu mambaok bekal ka kantuanyo, katonyo lebih hemat dan sehat makan bekal nan dibuek bini. Untuk Da K**al ko apopun samba, selain ayam, dimakannyo sajo tanpa banyak protes.

Jadi tiok pagi, Tina, salain menyiapkan makan pagi, pun menyiapkan bekal untuk makan siang untuk ampek urang di rumah tu. Alah tabayang bara sibuknyo Tina tiok pagi. Alun kalau ado nan basorak dari ruang tangah mananyoan dima Tina malatak an kaus kaki, atau pagi-pagi ado nan salah malatak an buku nan ka dibaok sakola, atau ado nan kahilangan pena atau pensil. Suasana rumah batambah runyam.

Katiko sadonyo alah pai, Tina mulai mangamehan rumah. Mancuci piriang, mancuci baju, sekalian mambarasihan rumah dan halamannyo. Jam sambilan atau paliang lambek jam sapuluah sado karajonyo salasai. Baru Tina bisa istirahat sabanta maluruihan pungguang sambia mancek henpon kok ado pasan nan masuk atau email nan ka dibaleh. Sakileh, Tina ko mirip ibu rumah tangga kebanyakan sajo nan rutinitasnyo dari hari ka hari ndak jauh-jauh dari sumua, dapua, jo kasua.

Sabananyo Tina ko sabalumnyo wanita karir nan karajonyo mungkin banyak diimpikan urang. Tina menjadi manajer marketing di salah satu bank terkemuka di nagari ko. Tapi katiko anaknyo nan kaduo lahia, Tina dengan sukarela memutuskan untuk baranti karajo dan maabehan anak jo laki sajo di rumah. Katonyo, rasonyo ndak tarimo batin maninggaan anak di rumah jo pengasuh. Bukannyo ndak picayo samo urang lain, tapi perasaannyo antah baa selalu manangih dalam hati satiok kali maninggaan anak di rumah samantaronyo sibuk saharian di lua. Rasonyo ado raso ndak rela dan tega nyo kehilangan masa tumbuh jo maso emas anak-anaknyo.

Ado nan ma usulkan kalau anak-anaknyo bisa dititip ka amaknyo. Tapi ide itu jaleh-jaleh ndak tatarimo dek Tina. Pikirannyo, amaknyo alah tuo, alah masonyo amak jo abank nyo sanang-sanang mamikian hal yang menyenangkan hatinyo, banyak mangaji jo ka surau.

Bak kicek Tina, “alun lapeh rangkik-rangkik amak manggadangan awak lai do, kini anak awak lo nan ka diabehan dek amak lai. Indak lo ciek do. Tigo lo. Gadang bana lo doso wak ka amak raso e. Doso awak malawan kicek amak se kadang-kadang alun tantu diampuni dek Tuhan lai, kini batambah lo jo nan lain lai. Anak awak tangguang jawab awak, manga lo amak nan ka payah. Kini giliran amak jo abak harus sanang-sanang. Nikmati sajo maso pacaran amak jo abak baliak.” Gitu kato Tina sambia galak. Padahal amaknyo nan masih coga ndak keberatan samo sakali mangasuh cucu tu.

Untuangnyo keputusannyo di dukung panuah dek lakinyo dengan catatan Tina nan biaso mandiri jo bapitih surang indak mangaluah dengan pemasukan rumah tangga Cuma dari udanyo surang.

Sebagian urang mungkin menyayangkan keputusannyo baranti, sebagian ado nan memaklumi, tapi ndak sagetek pulo nan mancibia. “Sakola tinggi-tinggi sampai S2, karajo rancak manajer pulo, kini memutuskan untuk baranti jadi ibu rumah tangga. Galak ijazah digantuang sajo di dindiang, dan sio-sio sajo abak jo amaknyo mahabihan pitih untuk manyakolahannyo dulu. Kok ka jadi ibu rumah tangga se manga sampai harus S2 bagai”.

Mode itulah kiro-kiro cimeeh urang kampuang madok ka Tina. Tapi Tina ko masa bodoh sajo. “Manga lo urang nan ka heboh, hiduik wak awak nan ka tahu”.

Tapi bukan Tina namonyo kalau ndak kreatif. Walaupun baranti karajo, bukan berarti pikirannyo ndak bajalan.

Anam bulan partamo memang agak binguang tapi kemudian kawannyo maagiah tahu saran dan informasi karajo nan bisa dikarajoan dek Tina di rumah. Di jaman serba canggiah kini apopun bisa dikarajoan di rumah tamasuak karajo. Jadilah Tina karajo sabagai affiliate marketer. Manggalehan barang-barang di toko online tertentu, dan dari penjualan Tina dapek komisi.

Awalnyo memang susah, Tina harus baraja mambuek web, manulih, mampromosian barang, karano ndak tangguang tangguang Tina langsuang jadi affiliate marketer toko online lua nagari sebab wakatu itu balanjo online alun talampau terkenal bana di nagari ko lai.

Anam bulan partamo, Tina ndak dapek apo-apo. Bulan ka tujuh, Tina mulai dapek komisi, ndak banyak, Cuma sapuluah dolar sajo. Tapi Tina ndak patah arang. Nyo rajin manulih di blog jo promosi. Di bulan ka sambilan Tina manarimo cek partamonyo sabanyak saratuih limo puluh tujuh dollar.

Tina sanang hati; babuah juo karajo ko. Karano Tina pandai babahaso Inggris jo Spanyol, jadilah Tina manulih di duo bahaso tu. Ditambah jo kemampuan marketingnyo, di tahun katigo, usahonyo mulai bakambang. Cuma sempat agak vakum sagetek karano manganduang jo malahian anak katigonyo. Usaho Tina mulai rancak kambangnyo di tahun ka limo, wakatu anak e nan bungsu alah duo tahun umuanyo dan alah bisa main surang. Tina mulai manarimo gaji atau komisi nan lumayan karano dibayia jo dollar.

Kini alah tahun ka duo baleh. Nan bungsu alah kelas tigo, wakatu Tina mulai lapang karano anak-anak alah bisa lapeh sadonyo. Pengasilan Tina bahkan alah mengalahkan %penghasilan udanyo nan PNS.

Satiok bulan Tina manarimo duo digit berkat kesabarannyo. Sampai di titik itu bukannyo mudah dek Tina. Wakatu anak-anak masih ketek-ketek, rasonyo karajo rumah ndak ado ujuangnyo. Rasonyo kaki ka ateh kapalo ka bawah dek latiah. Apo lai kalau anak-anak sadang sakik, yo sabana repot.

Tapi nan namo e urang kampuang, muncuang boto bisa dipakok, muncuang urang baa ka manutuiknyo. Tatap juo Tina jadi gunjiangan. Jadi contoh; jauh-jauh sakola, tinggi-tinggi sakola, tapi ujuang-ujuang e maabehan anak juo karajo.

Ditambah lo karano kesibukannyo Tina jadi jarang kalua rumah- berinteraksi jo urang kampuang ala kadarnyo sajo. Jadilah inyo dicap sombong maleh bagaua jo kawan-kawan. Bahkan acara-acara alumni pun Tina jarang datang kalau ndak kaparalu bana.
Tapi Tina masih aktif digrup alumni mulai dari alumni SD sampai alumni kuliahnyo. Satiok pakabaran inyo dapek, tapi itu, jarang datang. Masiha do kawan-kawan dakeknyo untuk pai kalua sakali-sakali, sekedar maluruihan pangana pai makan-makan kalua, atau pai ka salon untuk sekedar manyanangan diri.

Ndak jarang kawan-kawan alumni mambuek kegiatan amal nan bermanfaat, biasonyo Tina dengan sanang hati ikuik. Intinyo Tina sabananyo ndak membatasi diri bergaul jo urang kampuang atau kawan-kawannyo, hanyo karajo dan kegiatannyo di rumah yang mambueknyo sibuk.

Tambah pulo kini nyo ikuik kuliah online, jadilah inyo tambah sibuk. Dek Tina, manuntuik ilmu tu wajib hukum e walaupun umua alah lewagt kapalo tigo. Dunia makin bakambang, teknologi makin canggiah, ilmu pun harus selalu diperbaharui. Jadilah Tina kuliah online di kampus lua nagari, jurusan e ndak tangguang-tangguang, Kecerdasan Buatan, nan kini sadang marak.

Dan sakali lai, Uda K**al tacintonyo ko mendukung sajo kegiatan istrinyo asa lai positif.
Rumah tangga Tina jo Akmal sabananyo tanang-tanang sajo. Rasaki alhamdulillah lai ado. Rumah sederhana, kendaraan sekedar sajo; oto ketek ciek, motor vario duo.

Ndak ado nan balabihan kelihatannyo dari lua walaupun Tina bagaji gadang. Cuma penghasilan Tina disimpan, Cuma dipakai sagetek. Prinsip e mode iko; gaji da K**al pitih Tina, pitih Tina haratonyo surang.

Da K**al ndak pernah mancikaraui harato Tina kecuali Tina nan maagiah tahu. Sesederhana itu rumah tangga mereka baduo, insyaallah bahagia. Ditambah jo anak-anak nan lai sehat jo elok parangai. Fix hiduik Tina co lauik tanang
kini.

BERSAMBUNG