https://www.facebook.com/161313748995943/

DD News Mizoram, DD News, Aizawl (2026)

12/04/2026

Hnahthial April 12, 2026: Hnahthial District Magistrate Pi K. Vanlalruati, chuan Kuhva Ro (Dry areca nuts) chu Hnahthial District chhungah dan ang lova lakluh chu khap tlat a nih thu thuchhuah a siam.

Thuchhuah-ah chuan Mizoram Sorkar Home Department atanga lehkha an hmuh angin Kuhva Ro (Dry areca nuts) hi dan ang ni lova lakluh khap tlat a ni a. Hnahthial District chhungah dan ang ni lova lak luh a nih loh nan khuahkhirhna thupek chhuah a tul a ni tiin "Hnahthial District chhung khawi hmunah mah dan ang ni lova kuhva ro lak luh leh phurh phal a ni lo" He thupek zawm lo chu Section 223 of Bharatiya Nyaya Sanhita, 2023 dan hmangin hrem theih a ni ang. He thupek hian tul bik thila tihdanglam a nih loh chuan tihchhuah a nih atanga thla hnih chhung a huam ang tih a tarlang.

12/04/2026

Lawngtlai April 12, 2026: Pu C. Ngunlianchunga Lawngtlai West MLA chuan a bial chhungah zirna an hnufual em avang in Zirna in hma a sawnna turin theihtawp a chhuah zel dawn tih a bial a fanna ah a sawi.

Lawngtlai West MLA chuan Zochachhuah Primary School tlawhin an sikul dinhmun a enfiah a, zirlai naupang te Mid-day Meal chhum leh eirawngbawlna tur Choka an neih loh avangin, bialtu MLA in Choka sakna turin cheng 70,000 a pe a ni.

Pu C. Ngunlianchunga chuan Tuichawngtlang khawtlangin an dinthar Tuichawngtlang Middle School (Private) a zirtirtute lawmman leh school enkawlna turin cheng nuaih 2 k*mtin a pe dawn a, hei hi sorkar in a enkawl hma chu pek tur a ruahman ani. Lawngtlai West bialtu MLA chuan a bial chhungah zirna an hnufual em avang in Zirna in hma a sawnna turin theihtawp a chhuah zel dawn tih a sawi bawk.

Pu C.Ngunlianchunga chuan a bial chhunga Sorkarin Health Clinic Centre tura asak dan chu pawi a tih thu a sawi a, khawtlang tana hmantlak loha mipui pawisa hetiang taka hman ral a ni hi a zahthlak hle a ni a ti. Heng Health Clinic Centre sakte hi a dung feet 10 a vang Feet 8 a ni a, mipui ten a takin an chhawr tangkai lo niin Lawngtlai West MLA chuan sawiin, sum siam nan a hmang a ang hle a ni a ti bawk.

12/04/2026

April 12, 2026: Chhiarpui 2027 atana thawhkhatna kalpui mek ah, online a mahni a inziahluhna Self Enumeration ah Aizawl District atanga inziak lut tam ber in, household 2180 an in ziaklut tawh.

Sawkar Laipui Registrar General and Census Commissioner of India hmalakna in Chhiarpui thawhkhatna chu kalpui mek a ni a, India rama a vawikhatna atana Houselisting atana Online Portal a mahni inziahluh theihna chu April ni 1 atang khan kalpui a ni a, district anga khaikhin in, Aizawl ah in ziak lut tam ber tawh in, mi 2180 an in ziak lut tawh a, Lawngtlai District in dawt in household 2159 an in ziaklut tawh a ni. Htih lai hian Hnahthial District chu inziak lut tlem ber niin, household 24 chiah an la in ziak lut a, Khawzawl Dist tlem ber dawt in 39 an in ziak lut a, tihian Mizoram pumah household 6030 an in ziak lut tawh a ni.

State sawrkar a Chhiarpui buaipuitu te chuan awlsam zawk a he chhiarpui ah hian in ziahluh a nih theihnana online portal ruahman chu mitinin hmang tangkai se an duh thu sawiin, hei hian Houselisting atan Enumerator ten mimal ina hun an hman chu nasa takin a chhawk zangkhai dawn tih an sawi an sawi bawk.

Self Enumeration hi se.census.gov.in ah April Ni 15 thleng a tih theih a ni dawn a ni.

12/04/2026

Tlabung April 12, 2026: Mizorama Jute chin beihpui thlakna tur Improved Cultivation and Advanced Retting Exercise atan Tlabungah Jute chi thlenpui a ni tawh.

Jute Corporation of India hmalaknaa Jute I-Care kalpui turah, an thawhpui Tlabung MPACS chuan an khua leh a chhehvela Jute ching tur leilet nei mi 200 chuang an ziak lut tawh a, heng mite chin tur jute chi chu nimin piah khan Tlabungah phurh thlen niin, a chingtu turte hnenah hian a thlawna sem tur a ni tih, Tlabung MPACS hruaitute chuan an sawi.

Jute Corporation of India hotute chuan, Jute chu March atanga May thla bawr vel thlenga chin theih, khaw lum leh hmun uapa chin chi a ni tih sawiin, thla 4-5 chhung vela enkawl puitlin hman a ni tih, an sawi a, Jute thar chhuah chu JCI lamin quintal khat zelah Rs. 6000 vel zel Minimum Support Price an pek dawn avangin a hralhna lamah buaina a awm loh tur thu, an sawi a, a thlâwna csemchhuah tur Jute chi hi a man chanve chu JCI lamin tumin, Lunglei District Agriculture Office-in a man chanve an tumsak ve bawk.

12/04/2026

Aizawl April 12, 2026: Salvation Army officer tur te nemnghehna leh tirhchhuahna service chu vawiin khan ITI corps, Aizawl, Central South Division ah neih a ni.

‘Keepers of the Covenant session’ a Salvation Army officer atan nemngheh leh tirhchhuah tharte hi cadet 7 niin, nupa tuak thum leh single cadet pakhat anni a, Cadidateship k*m khat an zawh hnuah Officer Training College ah lutin k*m hnih chhung an Training leh a, training tha taka an zawh hnuah nemnghehna leh tirhchhuahna inkhawm hi buatsaih a ni.

Zirtawp khan Training College chapel-ah Covenant service neih a ni a, Inrinni zan khan ’Service of praise’ meeting neih niin Training laiin subject hrang hranga titha te hnenah lawman semna te, Graduation certificate leh Bth degree hlanna neih a ni a, Colonel Lalbulliana TC leh Colonel Lalnunhlui TPWM te chuan heng certificate te hi an hlan a ni.

Nemnghehna leh tirhchhuahna inkhawm hi Pathianni chawhma, Thianghlimna inkhawmah neih niin, Colonel Lalbullian, Territorial Commander chuan nemnghehna hi a nei a, Pathianni zan, Chhandamna inkhawmah appointment services neih a ni anga, Officer Commission tharte chu an awmna tur puanna leh appointment pek anni ang.

12/04/2026

Vathuampui April 12, 2026: Vathuampui BCM Sunday School hall leh Choka chu tukin Zing dar 5:00 vel khan Bungrua eng hmah chuh hman lohvin a kang ral.

Thudawn na in a sawi dan in Kangmei chhuah chhan hi Electric current kal sual vang a thleng a nih rin a ni a, Bungrua kangral hlut zawng hi cheng nuai 13 hu nia chhut a ni. BCM Sunday school hall hi Assamtype niin, Cheng nuai 7 vel seng a sak a ni a, hriattheih chinag bungrua kang chhe zingah hian Generator lian cheng nuai 1,20,000 man, a thar la hman loh leh Generator te cheng 80,000/- man bakah, Almera pathum, Thingzai engemawzat leh plastic tuizem leh bungrua chi hrang hrang tam tak a kang ral a, Kohhran lekha pawimawh leh thildang pawh kangral in, a vaiin bungrua kangral hlut zawng hi cheng nuai 13 hu nia chhut a ni.

12/04/2026

Tlabung April 12, 2026: Lunglei District Agriculture Office buatsaihin Tlabungah Oil Palm hralh chhuah tur chu nimin khan Lunglei District Agriculture Officer Dr Samuel Laliansanga chuan a vai liam.

Tlabung chhehvela oil palm thar hmasak ber hralh chhuah tur vailiam na ah hian Tlabunga oil palm chingtute, Agriculture & Farmers Welfare Department-a thawktute leh Partner Company Patanjali Foods Ltd ai awhte an tel a. Oil palm hralh tura thawn chhuah hi kilogram 4,175 niin, oil palm chingtu chhungkaw pakaw ta a ni a, he hunah hian Tlabung Block huam chhunga oil palm chin leh hralh chhuah chungchanga hma lak zel dan tur leh hmasawnna tur hrang hrang ruahmanna te an sawi ho nghal bawk.

Tlabung Block huam chhungah hian oil palm chingtu chhungkaw 80 vel awmin, ram hectare 150 vela zauvah oil palm hi an ching a. Tlabung, Tipperaghat leh Khojoysuri khuaah te oil palm hi an ching mek a ni.

Agriculture Department chuan k*t hna thawktute hnenah oil palm ṭiak (seedling) hi an sem ṭhin a. A chinna senso hrang hrang – a hmun enkawlna, half moon terrace laihna, leilawn leh a sengna harvesting pole te chu oil palm farmer-te hnenah hian pek ṭhin a ni bawk.

11/04/2026

Champhai April 11, 2026: PWD Minister Pu Vanlalhlana chuan Champhai, Mualkawi, Melbuk leh Zokhawthar inkalpawhna kawng siamthat tur chu a hmunah kalin a enfiah.

Highway kawnghluiin a paltlang siam thatna tur One Time Improvement (OTI) atan hian Nuaih 985 sanction a ni a. He hna hian Champhai khawchhung Kanan Veng atanga New Champhai Zotlang inkar bakah Mualkawi, Melbuk, leh Zokhawthar khawchhung kawngte a huam dawn a ni. He kawng, a tira Km 17.45-a thui hi Black top chhah tha tak (BC=40mm) hmanga siam tur a ni a, tunah hian Tender buaipui mek a ni. PWD Minister Pu Vanlalhlana chuan heihi a hmun ah enfiahin hmalak zel dan tur thlir ho a ni a, PWD Department hotu E-In-C, Chief Engineer-te leh Technical Officer-ten an tawiawm a ni.

Khankawn atanga Zokhawthar inkar, 2-lane highway awmsa enkawl zui hna thawhna tur pawh Nuaih 2,895 sanction a ni tawh tih sawrkar thuchhuah chuan a tarlang a, He hna atan hian Tender chhuah tawh niin, tun thla ni 30 hian Technical Bid hawn a ni a. He hnathawh tur hian kawng chhe lai hnawh phui, Road sign leh Protection wall siam, leh kawng tluana Blacktop thar te a huam a ni.

He hmalakna hnuaiah hian kawng siam bakah k*m 5 chhung enkawl zui (Routine Maintenance) hna leh leimin thenfai (Emergency works) hnate pawh a tel vek dawn a. He hmalakna hian Champhai leh Zokhawthar inkar inkalpawhna a ti hmasawn hle tura beisei a ni.

11/04/2026

Champhai April 11, 2026: Principal Scientist and Head, KVK, Pi Michelle C. Lallawmkimi’n Kolasib Chemphai, Bilkhawthlir ah Nihawi hlawhtling taka chin niin, nasa lehzuala kalpui tum anih thu a sawi.

Pi Michelle C. Lallawmkimi ho in nimin khan KVK mithiam ten Chemphai a Nihawi chinna hmun tlawhin, nihawi chin chu lian zawk leh zau zawka kalpui tlak a nih thu an sawi. Chemphai a Nihawi chin hi KVK Kolasib hmalakna hnuaiah Thingdelh FIG Bilkhawthlir a chhungkaw 30 velin hma anla a, tunlai hian a thar hmasa chu an seng mek ani.

Nihawi hi Tel eichi tharchhuah tuma hmalakna ni mahse, a par mawina hian mipui a hipin, tlawhtu pawh an ngah thin hle tih FIG hruaitu te chuan sawiin, an tharchhuah hma hauh atangin an hmalakna hmun tlawhtu te atangin sum tam tak an lalut tih an sawi bawk.

11/04/2026

Aizawl April 11, 2026: Social Wing Committee, General PYD, Mizoram UPC bul tumin vawiin khan Chite lui then fai hnatlang neih a ni.

He hnatlang hi Chite Veng Inpui kawtah hman niin Lalnunpuia Pachuau, Chairman, Social Wing Committee chuan kaihruaiin T.Upa Vk Lalmalsawma, Vice Chairman chuan hunserh hmangin F.Lallawmzuala, Secretary chuan report tawi pe in hnatlang chhunzawm nghal a ni.

Hnatlang hi mi 100 bawr vel niin Bazar Bial PYD, Bethlehem Bial PYD, Bawngkawn Bial PYD leh Ainawn Veng PYD atang te a thawkchhuakin Oneness Royal Enfield Riders ten an hnatlanpui bawk.

Hnatlangah hian bawlhhlawh garbage bag 256 lai chhar khawm niin, Garbage bag leh Glove hi UD&PA Department in tumin Sanitation deartment in Garbage Truck an lo thawhchhuak bawk a ni.

11/04/2026

Lunglei April 11, 2026: District Legal Services Authority, Lunglei buatsaihin Regular Lok Adalat chu District Court Building, Lunglei-ah hman a ni a. Lunglei District chhunga thubuai 146 ngaihtuah a ni.

Vawin Lok Adalat-a thubuai ngaihtuah tur hian Bench pakhat siam niin, Bench -I hi Pu Lalramsanga, Chief Judicial Magistrate in kaihruai in, Pu B. Laldinpuia, Advocate leh Pu H. Vanlallawma, Social Worker te an thu a. Thubuai 146 atang hian 38 sawirempui niin, tihfel a ni a. Vawiina thubuai ngaihtuahah hian leiba inṭhinna tam berin, cheng 8,69,757 lai chinfel a ni.

Lok Adalat-ah hian thubuai neitute duhdan angin inremna ziahpui ṭhin a ni a. Sum sen ngai loin, ukil rawih man ngai lovin thubuai hi chinfel sak ṭhin a ni.

11/04/2026

April 11, 2026: Chhiarpui 2027 atana thawhkhatna chu kalpui mek a ni a, mahni a inziahluhna Self Enumeration ah Mizoram atangin 6030 an in ziaklut tawh.

Sawkar Laipui Registrar General and Census Commissioner of India hmalakna in Chhiarpui thawhkhatna chu kalpui mek a ni a, India rama a vawikhatna atana Houselisting atana Online Portal a mahni inziahluh theihna chu April ni 1 atang khan kalpui a ni a, vawiin thleng in Mizoram ah 6030 an in ziak lut tawh a ni.

State sawrkar a Chhiarpui buaipuitu te chuan awlsam zawk a he chhiarpui ah hian in ziahluh a nih theihnana online portal ruahman chu mitinin hmang tangkai se an duh thu sawiin, hei hian Houselisting atan Enumerator ten mimal ina hun an hman chu nasa takin a chhawk zangkhai dawn tih an sawi an sawi bawk.

Self Enumeration hi se.census.gov.in ah April Ni 15 thleng a tih theih a ni dawn a ni.

DD News Mizoram

12/04/2026

12/04/2026

12/04/2026

12/04/2026

12/04/2026

12/04/2026

12/04/2026

11/04/2026

11/04/2026

11/04/2026

11/04/2026

11/04/2026

Address

Telephone

Website

Alerts

Contact The Business

Shortcuts

Share

Category