31/05/2026
मोनसे खावलायनाय — जारिमिनखौ थांना थानो हो, सिनायथिखौ थांना थानो हो
बड' मेच टाइम्सनि हाबाफारिया खालि खौरां फोसावनायनि थाखायल' नङा; जोंनि गुबै थांखियानो जाबाय मेक-बड' हारिनि थार जारिमिन, उनमोनथाइ, हारिमु आरो सिनायथिखौ बयनिबो सिगाङाव दिन्थिनाय। जाहाथे मुलुगनि गुबुन गुबुन जायगायाव थानाय मेच-बड' आरो गुवार बर'-कचारी हारिफोरा गावसोरनि थार जारिमिनखौ मिथिनो हायो आरो मुलुगनि सुबुंफोराबो जोंनि फोलेरनि गुबै सिनायथिखौ मिथिनो हायो।
दिनैनि समाव मोनसे गिनाय दं दि जारिमिना गाज्रि जालांनो हागौ आरो गोबां बेसेन गोसा खारिथिफोरा लासै-लासै गोमालांनो हमदों। Bodo Mech Times आ गोमालांनाय जारिमिनखौ बुथुमनो, संरैखा खालामनो आरो मानसिफोरनो होनो थाखाय मेंनाय गैया जासे खामानि मावो। गिदिर फसंथानफोरनिफ्राय जेबो राङारि मदद एबा हेफाजाब होयालासे, खालि जोंनि हादर आरो हानि फारसे बिबान लानानै, जों खौरां बुथुमनो, गेदेरफोरनि गोसोखांथिखौ लिरथुमनो आरो गोदान जोलैनि सिगाङाव सैथोखौ फोरमायनो थाखाय जायगा-जायगा दावबायो।
नाथाय दुखुनि बाथ्रादि, गोबां खेब नोंथाङा गावनो खारिथिखौ नुब्लाबो गुबुनफोरखौ नायनो खाबु होआ। मोनसे शेयार, मोनसे बिबुंथि, एबा मोनसे मोजां मददआ जानो हागौ सैथो जारिमिनखौ रोजा रोजा सुबुंफोरनि गेजेराव लाबोनो हागौ।
जों बयबो खौसेथिनि बाथ्रा रायज्लायो, जों हादरनि जौगानायनि बाथ्रा रायज्लायो; नाथाय जेब्ला सोरखौबा खौसेथिनि थाखाय आगान होयो, अब्ला बिखौ हेफाजाब होनायनि अनगायै गोबां खेब जों गावनो बिखौ सिखारनो एबा दावगानो होया। गोसोयाव लाखि, मोनसे हादोरनि गोहोआ बिनि खौसेथियाव, बिनि जारिमिनाव आरो सिनायथियाव थायो। जुदि जों गावनो जोंनि जारिमिनखौ मान होआ, अब्ला इयुन जोलैफोरा माबोरै गावनि गुदिखौ सिनायगोन? बेनिखायनो फै जों बोडो' मेच टाइम्सनि बे फिसा नाजानायखौ गसंनानै थानि। फै जों खारिथिखौ फरायनि, फोरमान खालामनि, शेयार खालामनि आरो गुबुनफोरखौबो मिथिनायनि खाबु होनि। मानोना जारिमिना थांनाय समनिल' नङा – जारिमिना जोंनि थाथि, जोंनि गोग्गानाय आरो गाबोननि लामा दिन्थिग्रा । "जुदि हादोरा थांनानै थागोन, अब्ला जारिमिना थांनानै थागोन; जारिमिना थांनानै थायोब्ला सिनायथिया थांनानै थागोन"।
