13/08/2026
ಆತ್ಮೀಯ ಓದುಗ ಮಿತ್ರರೇ,
ಪಂಚಮಿ ಪ್ರಕಟಣೆಯ ನೂತನ ಕೃತಿ
ನಾಡಿನ ಖ್ಯಾತ ಲೇಖಕರು, ಕವಿಗಳು ಆದಂತಹ
ಶ್ರೀ ಚಿಂತಾಮಣಿ ಕೊಡ್ಲೆಕೆರೆ ಅವರ
‘ಫುಲ್ ಅರ್ಧ ಟೀ’ (ಹನಿಗವಿತೆಗಳು)
-----------------------------------------------------------
ಅರ್ಧ ಟೀ ಕೊಟ್ಟು
ಹೇಳುವರು ಫುಲ್ಲು
ಸಣ್ಣ ಪದ್ಯ ಬರೆದು
ನೀಡುವರು ಥ್ರಿಲ್ಲು
ಹೆಸರು ಚಿಂತಾಮಣಿ
ಕವಿತೆ ಘಂಟಾಮಣಿ
ಚಿಂತಾಮಣಿ ಕೊಡ್ಲೆಕೆರೆ ಅವರ ಹನಿಗವಿತೆಗಳ ಸಂಕಲನ ಎಷ್ಟು ಫ್ರೆಶ್ ಆಗಿದೆಯೆಂದರೆ ಇಂಥ ಪದ್ಯಗಳನ್ನು ಓದಿ ಯಾವುದೋ ಕಾಲವಾಯಿತು. ಹನಿಗವನಗಳು ಗಿಡಗಳಿಂದ ತೊಟ್ಟಿಕ್ಕುವ ಹನಿಗಳಂತೆ, ಬಹಳ ಹೊತ್ತು ಕಟ್ಟಿಡುವುದು ಕಷ್ಟ. ಚಿಂತಾಮಣಿ ಯಾವುದೋ ಮೋಡಿ ಮಾಡಿ ಈ ಕವಿತೆಗಳೆಲ್ಲ ನೆನಪಲ್ಲಿ ಉಳಿಯುವಂತೆ ಮಾಡುತ್ತಾರೆ.
ಜಿಗಿಜಿಗಿದು ಸಾಗುವ ಪದಗಳು, ಪದಗಳಿಗೆ ಕಚಗುಳಿ ಇಡುವ ಪದ್ಯ. ಚಿಂತಾಮಣಿ ಕೈಯಲ್ಲಿ ಪುಟ್ಟ ಪುಟ್ಟ ಪದಗಳು ಚಪ್ಪಟೆ ಕಲ್ಲು ನೀರನ್ನು ಚಿಮ್ಮುತ್ತಾ ಹೋಗಿ ಸೃಷ್ಟಿಸುವ ಸೊಗಸಾದ ವಿನ್ಯಾಸ ಹುಟ್ಟುಹಾಕುತ್ತವೆ. ಕುತೂಹಲದಿಂದ ಶುರುವಾಗಿ ವಿಸ್ಮಯಕಾರಿಯಾಗಿ ಕೊನೆಯಾಗುತ್ತವೆ. ಶುಂಠಿ ಪೆಪ್ಪರಮಿಂಟಿನ ರುಚಿಯಂತೆ ಬಹಳ ಕಾಲ ನಾಲಗೆಯಲ್ಲಿ ನೆಲೆಸುತ್ತವೆ. ಮತ್ತೊಮ್ಮೆ ಓದು ಎಂದು ಪ್ರೇರೇಪಿಸುತ್ತವೆ. ಕನ್ನಡದ ಶಕ್ತಿಯ ನೋಡು, ತುಂಟತನವ ನೋಡು, ಸಂಭ್ರಮವ ನೋಡು, ಉಲ್ಲಾಸವ ನೋಡು, ಬೆಡಗ ನೋಡು ಎಂದು ಕೈತಟ್ಟಿ ಕರೆಯುತ್ತವೆ.
ಚಿಂತಾಮಣಿ ಅವರ ಸುದೀರ್ಘ ಪದ್ಯಗಳನ್ನು ಓದಿದ್ದೆ. ಪುಟ್ಟ ಕವಿತೆಗಳನ್ನು ಅವರು ಇಷ್ಟು ದಿನ ಎಲ್ಲಿ ಬಚ್ಚಿಟ್ಟುಕೊಂಡಿದ್ದರೋ ಕಾಣೆ. ಇವೆಲ್ಲ ಮುದ ನೀಡುವ ಹದವರಿತ ರಚನೆಗಳು. ವೈಯನ್ಕೆಯ ಪನ್, ಡುಂಡಿರಾಜರ ವಿಟ್, ಲಕ್ಷ್ಮಣರಾಯರ ಫನ್ ಮತ್ತು ಆಗ್ಡನ್ ನ್ಯಾಶ್ ಎಂಬ ಇಂಗ್ಲಿಷ್ ಕವಿಯ ರೈಮ್- ಈ ಪದ್ಯಗಳನ್ನು ಮಜವಾಗಿಸಿವೆ. ಅವರೊಳಗಿನ ಕವಿ ಗಾಢವಾದ ಹೈಕುಗಳನ್ನೂ ಬರೆಯಬಲ್ಲ ಎಂಬುದಕ್ಕೂ ಈ ಸಂಕಲನದಲ್ಲಿ ಸಾಕ್ಷಿಗಳು ಸಿಗುತ್ತವೆ.
ಈ ಸಂಕಲನ ನಮ್ಮ ಚಿಂತೆಯನ್ನು ಓಡಿಸುವ ಸ್ವರ್ಶಮಣಿ.
-ಜೋಗಿ
----------------------------------------------------------
ನಾನು ಹೀಗೆ ನನಗಿಷ್ಟವಾದ ಹನಿಗವನಗಳನ್ನು ಕೋಟ್ ಮಾಡುತ್ತಲೆ ಹೋದರೆ ಮನೆಗಿಂತ ಗೇಟೇ ದೊಡ್ಡದು ಅನ್ನುವಂತೆ ಆಗಬಹುದು. ಉಸ್ತಾದ್ ಝಾಕಿರ್ ಹುಸೇನ್ “ವಾಹ್ ತಾಜ್ ಬೋಲಿಯೆ” ಅಂದ ಹಾಗೆ ಕೊಡ್ಲೆಕೆರೆಯವರ ‘ಫುಲ್ ಅರ್ಧ ಟೀ’ ಯನ್ನು ನಾನಂತೂ “ವಾಹ್! ಚಿಂತಾಮಣಿ ಬೋಲಿಯೆ!” ಎಂದು ಚಪ್ಪರಿಸುತ್ತ ಸವಿದಿದ್ದೇನೆ. ಸಂಕಲನದ ಆರಂಭದಲ್ಲಿ ಕವಿ -
ಒಲವೆಂಬ ಸಕ್ಕರೆಯ ಬೆರೆಸಿ ಮಾಡಿರುವ ಟೀ
‘ಅರ್ಧ’ ಸಾಲದು ಎಂದು ಮುನಿಯದಿರು ಮಿತ್ರ
ನಿನಗೆ ಪೂರ್ಣಾನಂದ ಸಿಗಲೆಂದು ಬೇಡುವೆನು
ತಿಳಿದವರು ಒಪ್ಪುವುದು ಸತ್ವವನು ಮಾತ್ರ !
ಎಂದಿದ್ದಾರೆ. ಅನುಮಾನವೇ ಬೇಡ. ಖಂಡಿತವಾಗಿಯೂ ಈ ಸಂಕಲನದ ಹನಿಗವನಗಳು ಕಾವ್ಯ ಪ್ರಿಯರಿಗೆ ಪೂರ್ಣಾನಂದವನ್ನು ನೀಡುತ್ತವೆ. ಕವಿ ನರಸಿಂಹಸ್ವಾಮಿಯವರದು ‘ಇಹದ ಪರಿಮಳದ ಹಾದಿ’ಯಾದರೆ ಚಿಂತಾಮಣಿಯವರದು ಅಷ್ಟೇ ಚೇತೋಹಾರಿಯಾದ ‘ಚಹದ ಪರಿಮಳದ ಹಾದಿ’. ಹನಿಗವನ ಎಂಬ ಕಾವ್ಯ ಪ್ರಕಾರದ ಗೌರವವನ್ನು ಹೆಚ್ಚಿಸುವಂಥ ಸಂಕಲನವನ್ನು ನೀಡಿದ್ದಕ್ಕಾಗಿ ಕವಿಮಿತ್ರ ಚಿಂತಾಮಣಿ ಕೊಡ್ಲೆಕೆರೆಯವರನ್ನು ಹಾರ್ದಿಕವಾಗಿ ಅಭಿನಂದಿಸುತ್ತೇನೆ.
-ಎಚ್.ಡುಂಡಿರಾಜ್
------------------------------------------------------------------
ಕೃತಿಗಾಗಿ ಸಂಪರ್ಕಿಸಬಹುದು.
ಮೊ: 097400 69123
ನಿಮ್ಮ ಮನೆಗೆ ಪುಸ್ತಕವನ್ನು ತಲುಪಿಸಲಾಗುವುದು.
ಪುಸ್ತಕ ಅಮೇಜಾನ್ ನಲ್ಲಿಯೂ ಕೂಡ ಲಭ್ಯವಿದೆ.
ಅದರ ಕೊಂಡಿ ಕೆಳಕಂಡಂತಿದೆ.
https://www.amazon.in/dp/B0HBJXX1W9
