04/01/2025
#आर्यन शुगर संचालक मंडळावर #गुन्हा #दाखल
#बार्शी : आर्यन शुगर प्रा.लि. खामगांव, ता. बार्शी येथील साखर कारखान्याच्या संचालक आणि बँकेच्या अधिकाऱ्यांवर बँकेचे कर्ज फसवण्याचा गंभीर आरोप करण्यात आला आहे. बार्शी येथील जिल्हा मध्यवर्ती सहकारी बँक लिमिटेडच्या शाखेतील शाखाधिकारी राहूल लक्ष्मण खुने यांनी शंभर कोटींच्या कर्जातील फसवणुकीसंबंधी फिर्याद दाखल केली आहे.
याप्रकरणात, आर्यन शुगर प्रा.लि. यांना १८ सप्टेंबर २०१२ रोजी ५५ कोटी रुपये कर्ज मंजूर करण्यात आले होते. या कर्जासाठी गोडावुनच्या माध्यमातून साखर ठेवण्याची अट होती. बँकेने कर्जाची रक्कम मंजूर केली आणि कर्जाच्या अटीही स्पष्ट केल्या होत्या. मात्र, आरोप आहे की, कारखान्याच्या संचालकांनी बँकेच्या गोडावुनमधील साखर विक्री केली आणि त्या विक्रीतून आलेली रक्कम बँकेच्या कर्ज खात्यात न भरता इतर कर्ज खात्यात भरली, ज्यामुळे बँकेला मोठा आर्थिक नुकसान सहन करावा लागला.
यामध्ये मुख्य आरोपी म्हणून आर्यन शुगर प्रा.लि.चे संचालक योगेश सुधीर सोपल आणि त्यांची पत्नी, सुधीर गंगाधर सोपल आणि त्यांची पत्नी तसेच विलास दगडूअप्पा रेणके, अविनाश बसंतराव भोसले, श्रीकांत गोपाल नलवडे, राजू बसंतराव भोसले, तसेच बँकेचे तत्कालीन शाखाधिकारी आर.एस. उबेरदंड आणि बँक इन्स्पेक्टर व्ही. एस. आगलावे यांचा समावेश आहे.
बँकेच्या निरीक्षकाने दिलेल्या अहवालानुसार, साखरेची विक्री करून आलेली रक्कम कर्ज खात्यात न भरता अन्य खात्यात भरली गेली. या व्यवहारामुळे, बँकेच्या मालतारण कर्ज खात्यात ४२,२५,४९,४८४ रुपये बाकी आहेत. या फसवणुकीमुळे बँकेचे आर्थिक नुकसान झाले असून, संबंधित आरोपींवर भारतीय दंड संहितेच्या कलम ४२०, ४०८, १०८, ४०९, १२० (ब), ३४ अन्वये गुन्हा दाखल करण्यात आला आहे.
त्यानुसार, या प्रकरणातील सर्व आरोपींवर कायदेशीर कारवाई करण्याची विनंती करण्यात आली आहे. सोलापूर जिल्हा मध्यवर्ती सहकारी बँक लि. सोलापूर शाखेच्या अधिकाऱ्यांनी या प्रकरणाशी संबंधित १ ते १२६ साक्षांकित दस्तऐवज सादर केले आहेत.
तसेच, सोपल कुटुंबावर आरोप ठेवण्यात आले आहेत आणि संबंधित तक्रार बार्शी शहर पोलीस स्टेशनमध्ये दाखल करण्यात आली आहे.
