20/12/2025
बी. के. मॉडेलच्या शताब्दी महोत्सवाचे उदघाटन
बेळगाव प्रतिनिधी
आजच्या आधुनिक तंत्रज्ञान काळात विद्यार्थ्यांना अनेक यशस्वी जीवन घडविण्याच्या अनेक संधी प्राप्त झालेल्या आहेत. शैक्षणिक संस्थांनाही एका साच्यातील शिक्षणाऐवजी वेगवेगळ्या प्रकारच्या मूल्यांवर आधारित शिक्षणांवर भर देत, देशाची सक्षम पिढी घडविण्याचे काम करावे असे आवाहन, खा. तेजस्वी सूर्या यांनी केले.
आज सायंकाळी बी के मॉडल हायस्कूलच्या शताब्दी सोहळ्यात तेजस्वी सूर्या यांच्यासह खा. इरण्णा कडाडी, आ. अभय पाटील,माजी आ. महांतेश कवटगीमठ, भारतीय रेल्वेतील वरिष्ठ अधिकारी श्रेयस होसुर, अभिनेते आणि विचारवंत दीपक करंजीकर,उद्योजिका विद्या मुरकुंबी, अनिल पोतदार आदी मान्यवर कार्यक्रमाच्या व्यासपीठावर प्रमुख अतिथी म्हणून उपस्थित होते.
यावेळी आपल्या भाषणात पुढे बोलताना तेजस्वी सूर्या म्हणाले,कोणतीही संस्था 100 वर्ष चालविणे यासाठी विश्वासाहर्ता महत्त्वाची असते. बि.के मॉडेल हायस्कूलने लोक विश्वासाच्या जोरावर शंभर वर्षाची यशस्वी वाटचाल केली आहे. आजच्या काळात मूल्यांवर आधारित भारतीय संस्कृती प्रेरीत शिक्षण महत्त्वाचे आहे. जिज्ञासा हीच शिक्षणाची खरी सुरुवात असते. जिज्ञासा संपते तिथे ज्ञानाचा ऱ्हास होतो. त्यामुळे पालकांनी आपल्या मुलांच्या अंगभूत कलागुणांना प्रोत्साहित करावे. शिक्षकांनी सक्षम भावी पिढी घडविण्यासाठी प्रयत्न करावेत असे आवाहनही यावेळी त्यांनी केले.
कार्यक्रमाच्या प्रारंभी उपस्थित मान्यवरांच्या हस्ते दीप प्रज्वलन करण्यात आले. संस्थेचे अध्यक्ष अविनाश पोतदार यांनी उपस्थितांचे स्वागत केले. संस्थेच्या वतीने उपस्थित मान्यवरांचा सत्कार करण्यात आला. श्रीनिवास शिवणगी यांनी कार्यक्रमाचे आभार प्रदर्शन केले.
