26/08/2025
#କୋର_ଟିମକୁ_ଚକ୍ମା_ଦେଲେ_ପାଣ୍ଡିଆନ_ଦମ୍ପତି:
ଚିନ୍ମୟ ଓ ଇପସିତାଙ୍କୁ ଯୁବ-ଛାତ୍ର ଦାୟିତ୍ୱ
ଦଳର କୋରଟିମ୍ ସଦସ୍ୟମାନଙ୍କ ସହ କୌଣସି ପ୍ରକାରର ପରାମର୍ଶ ନକରି ଅଚାନକ ଏହି ଘୋଷଣା କରାଯିବା ଦଳୀୟ ନେତାମାନଙ୍କୁ ଚକିତ କରିଥିବା ଜଣାପଡ଼ିଛି ।
“ଦଳରେ ରହିବ ତ ଆମ ସପକ୍ଷରେ ଗଣମାଧ୍ୟମରେ ଓକିଲାତି କର, ବିରୋଧୀଙ୍କ ଅପପ୍ରଚାରକୁ କାଉଂଟର କର । ନଚେତ୍ ତୁମେ ଯେତେବଡ଼ ନେତା ହେଲେବି ପାୱାରଲେସ୍ କରିଦିଆଯିବ ।” ଆଜି ଅପ୍ରତ୍ୟାଶିତ ଢଙ୍ଗରେ ବିଜେଡିର ଯୁବ ଓ ଛାତ୍ର ସଂଗଠନର ନୂଆ ସଭାପତିଙ୍କ ନାଁ ଘୋଷଣା ସହ ଏଭଳି ସଙ୍କେତ ଦେଇଛନ୍ତି ପାଣ୍ଡିଆନ ଦମ୍ପତି । ଦଳର କୋରଟିମ୍ ସଦସ୍ୟମାନଙ୍କ ସହ କୌଣସି ପ୍ରକାରର ପରାମର୍ଶ ନକରି ଅଚାନକ ଏହି ଘୋଷଣା କରାଯିବା ଦଳୀୟ ନେତାମାନଙ୍କୁ ଚକିତ କରିଥିବା ଜଣାପଡ଼ିଛି । ଏପରିକି ପାଣ୍ଡିଆନଙ୍କ ଖାସ୍ ଅନୁଗତ ପ୍ରଣବପ୍ରକାଶ ଦାସ ଓରଫ ବବି ଦାସଙ୍କ ଖାସ୍ ପ୍ରଣବ ବଳବନ୍ତରାୟ(ଜିତୁ)ଙ୍କୁ ଦଳର ଯୁବ ବ୍ୟାପାରରୁ ସମ୍ପୂର୍ଣ୍ଣ ଦୂରେଇ ରଖିବା ଓ କଟ୍ଟରବିରୋଧୀ ପ୍ରଭାତ ବିଶ୍ୱାଳଙ୍କ ପୁଅ ସୌଭିକ ବିଶ୍ୱାଳଙ୍କୁ ଛାତ୍ର ବ୍ୟାପାରରେ ସାମିଲ କରି ପାଣ୍ଡିଆନ ଦମ୍ପତି ବିଜେଡିରେ ନୂଆ ସମୀକରଣର ସନ୍ଦେଶ ଦେଇଥିବା ସୂଚନା ମିଳିଛି ।
କୋର ଟିମଙ୍କ ପରାମର୍ଶ ଲୋଡ଼ିଲେନି?
ବିଜେଡିର କୋର ଟିମଙ୍କ ସହ ସାମାନ୍ୟତମ ବିଚାରବିମର୍ଶ ନକରି ଦଳର ଯୁବ ଓ ଛାତ୍ର ସଂଗଠନର ସଭାପତିଙ୍କ ନାଁ ଆଜି ଘୋଷଣା ହୋଇଛି । ଦଳର ଛାତ୍ର ସଂଗଠନର ସଭାପତି ଭାବେ ଇପସିତା ସାହୁ ଓ ଯୁବ ସଂଗଠନର ସଭାପତି ଚିନ୍ମୟ ସାହୁଙ୍କୁ କରାଯାଇଛି । ଏହି ଦୁଇ ସଭାପତିଙ୍କ ନାମ ଘୋଷଣା ସହ ଉଭୟ ସଂଗଠନ ପାଇଁ ୪ଜଣ ଲେଖାଏଁ ବରିଷ୍ଠ ନେତାଙ୍କୁ ମଧ୍ୟ ଦାୟିତ୍ୱ ନ୍ୟସ୍ତ ହୋଇଛି ।
ତେବେ ଦଳର ଯୁବ ଓ ଛାତ୍ର ୱିଙ୍ଗର ସଭାପତିଙ୍କ ନାଁ ଘୋଷଣା ହୋଇଥିଲେ ମଧ୍ୟ ବିଜେଡିର କୌଣସି ବରିଷ୍ଠ ନେତା ବିଶେଷକରି କୋର୍ ଟିମ୍ ସଦସ୍ୟମାନଙ୍କ ସହ ପରାମର୍ଶ ହୋଇନଥିବା ଜଣାପଡ଼ିଛି । ନିର୍ଭରଯୋଗ୍ୟ ସୂତ୍ର ଅନୁସାରେ, ଦଳର କୋର ଟିମ୍ ଭାବେ ଏବେ କାର୍ଯ୍ୟ କରୁଥିବା ସମନ୍ୱୟ କମିଟି ଅଧ୍ୟକ୍ଷ ଦେବୀ ପ୍ରସାଦ ମିଶ୍ରଙ୍କ ନେତୃତ୍ୱାଧୀନ ଟିମକୁ ଏହି ସମଗ୍ର ପ୍ରକ୍ରିୟାରୁ ଦୂରେଇ ରଖାଯାଇଥିବା ସୂଚନା ମିଳିଛି । ଦଳର କୋରଟିମ୍ ଭାବେ ପ୍ରଣବପ୍ରକାଶ ଦାସ ଓରଫ ବବି, ସଞ୍ଜୟ ଦାସବର୍ମା, ଅତନୁ ସବ୍ୟସାଚୀ ନାୟକ, ପ୍ରତାପ ଜେନା, ଅରୁଣ ସାହୁ ଓ ପ୍ରତାପ ଦେବ ପ୍ରମୁଖ କାର୍ଯ୍ୟ କରୁଛନ୍ତି । ଏହି ନେତାମାନେ ଦଳର ବିଭିନ୍ନ ସାଂଗଠନିକ ପ୍ରସଙ୍ଗରେ ଦୀର୍ଘ ପ୍ରାୟ ୧୪ମାସ ଧରି କାର୍ଯ୍ୟ କରୁଥିଲେ ମଧ୍ୟ ଦଳର ଯୁବ ଓ ଛାତ୍ର ୱିଙ୍ଗ ସଭାପତିଙ୍କ ନାଁ ଘୋଷଣା ପୂର୍ବରୁ କାହିଁକି ସେମାନଙ୍କ ସହ ବିଚାରବିମର୍ଶ କରାଯାଇ ନାହିଁ ତାହା ଏବେ ଚର୍ଚ୍ଚାର ବିଷୟ ପାଲଟିଛି ।
ମହଙ୍ଗା ପଡ଼ିଲା ଦେବାଶୀଷଙ୍କ ଘରେ ମେଳି ଓ ଭୋଜି
ଦଳର ରାଜ୍ୟସଭା ସାଂସଦ ଦେବାଶୀଷ ସାମନ୍ତରାୟଙ୍କ ଗରେ ଗତ ୨ଦିନ ତଳେ ଭୋଜି କରିବା କିଛି ବିଜେଡି ନେତା( ବରିଷ୍ଠ ନେତାମାନଙ୍କ ପୁଅମାନେ)ଙ୍କୁ ମହଙ୍ଗା ପଡ଼ିଛି । ଦେବାଶୀଷ ଏବେ ପାଣ୍ଡିଆନଙ୍କୁ ଖୋଲାଖୋଲି ବିରୋଧ କରୁଥିବାରୁ ତାଙ୍କ ଘରେ ଏହି ନେତାମାନଙ୍କ ମେଳି ପାଣ୍ଡିଆନ ଦମ୍ପତିଙ୍କୁ କ୍ଷୁବ୍ଧ କରିଛି । ଦେବାଶୀଷଙ୍କ ଘରେ ଭୋଜିରେ ପ୍ରଣବ ବଳବନ୍ତରାୟ(ଜିତୁ), ଚନ୍ଦ୍ରସାରଥୀ ବେହେରା, ରୁଦ୍ର ମହାରଥୀ, ବିଷ୍ଣୁବ୍ରତ ରାଉତରାୟଙ୍କ ସମେତ ବହୁ ବରିଷ୍ଠ ନେତାଙ୍କ ପୁଅମାନେ ଯୋଗ ଦେଇଥିଲେ । ଯେଉଁଠି ପାଣ୍ଡିଆନଙ୍କ ବିରୁଦ୍ଧରେ ମନ୍ତ୍ରଣା ହୋଇଥିବା ଚର୍ଚ୍ଚା ହେଉଛି । ଏହି ଖବର ମିଳିବା ପରେ ଆଜି ତରବରିଆ ଭାବେ ଦଳର ଯୁବ ଓ ଛାତ୍ର ସଂଗଠନ ସଭାପତିଙ୍କ ନାଁ ଘୋଷଣା ସହ ଦେବାଶୀଷଙ୍କ ଘରେ ଭୋଜିରେ ସାମିଲ ନେତାମାନଙ୍କୁ କଡ଼ା ସନ୍ଦେଶ ଦିଆଯାଇଥିବା କୁହାଯାଉଛି । ପ୍ରଣବ ବଳବନ୍ତରାୟ ପୂର୍ବରୁ ଦଳର ଯୁବ ବ୍ୟାପାର ଦାୟିତ୍ୱରେ ଥିଲେ କିନ୍ତୁ ତାଙ୍କୁ ଆଜି ସେଥିରୁ ବାଦ୍ ଦିଆଯାଇଛି । ଯଦିଓ ସେ ବବିଙ୍କ ଖାସ୍ ଅନୁଗତ ଭାବେ ପରିଚିତ । ଦେବାଶୀଷଙ୍କ ଘରେ ମେଳି ପଛରେ ବବିଙ୍କ ସହମତି ଥିବା ମଧ୍ୟ ପାଣ୍ଡିଆନ ଦମ୍ପତି ସନ୍ଦେହ କରୁଥିବା ନବୀନ ନିବାସ ସୂତ୍ରରୁ ସୂଚନା ମିଳିଛି । ଯେଉଁଥିପାଇଁ ଜିତୁଙ୍କ ବଦଳରେ ବବିଙ୍କ କଟ୍ଟରବିରୋଧୀ ସୌଭିକ ବିଶ୍ୱାଳଙ୍କୁ ଛାତ୍ର ବ୍ୟାପାରରେ ଦଳର ସାଧାରଣ ସମ୍ପାଦକ ଭାବେ ଦାୟିତ୍ୱ ମିଳିଛି । ସେହିପରି ଦେବେଶ ଆଚାର୍ଯ୍ୟ ଦିନେକାଳେ ଛାତ୍ର ରାଜନୀତି ସହ ଜଡ଼ିତ ନଥାଇ ମଧ୍ୟ ତାଙ୍କୁ ଦଳର ଯୁବ ବ୍ୟାପାରର ସାଧାରଣ ସମ୍ପାଦକ ଦାୟିତ୍ୱ ମିଳିଛି । ୫୮ବର୍ଷ ବୟସ୍କ ରାଜେନ୍ଦ୍ର ସାହୁଙ୍କୁ ଯୁବ ବ୍ୟାପାର ସାଧାରଣ ସମ୍ପାଦକ ଓ ୪୫ବର୍ଷୀୟ ବ୍ୟୋମକେଶ ରାୟଙ୍କୁ ଛାତ୍ର ବ୍ୟାପାର ବରିଷ୍ଠ ସାଧାରଣ ସମ୍ପାଦକ ଭଳି ଦାୟିତ୍ୱ ନ୍ୟସ୍ତ କରାଯିବା ଦଳୀୟ ଅସଙ୍ଗତିକୁ ମଧ୍ୟ ଦର୍ଶାଉଥିବା ଚର୍ଚ୍ଚା ।
ବ୍ୟୋମକେଶ ଓ ଦେବୀରଞ୍ଜନଙ୍କୁ ମିଳିଥିଲା ଆଶ୍ୱାସନା
ବିଜେଡି ସୁପ୍ରିମୋ ନବୀନ ପଟ୍ଟନାୟକ ଚଳିତବର୍ଷ ଜାନୁୟାରୀ ୨୬ତାରିଖରେ ଦଳର ସବୁ ସାଂଗଠନିକ କମିଟିକୁ ଭାଙ୍ଗି ଦେଇଥିଲେ । ସେବେଠୁ ଦଳର ଯୁବ ଓ ଛାତ୍ର ସଭାପତି ପଦବୀରେ କେହି ନଥିଲେ । କିନ୍ତୁ ଯୁବ ସଭାପତି ବ୍ୟୋମକେଶ ରାୟ ଓ ଛାତ୍ର ସଭାପତି ଦେବୀରଞ୍ଜନ ତ୍ରିପାଠୀଙ୍କୁ ନିଜ ନିଜର ଦାୟିତ୍ୱ ବଜାୟ ରଖି କାର୍ଯ୍ୟ କରିବାକୁ ପରାମର୍ଶ ଦିଆଯାଇଥିଲା । ଏପରିକି ସେମାନେ ପୁନର୍ବାର ଏହି ଦାୟିତ୍ୱ ପାଇବେ ବୋଲି ଆଶ୍ୱାସନା ଦିଆଯାଇଥିବା ମଧ୍ୟ ତାଙ୍କୁ ଦଳୀୟ ସୂତ୍ରରୁ ଜଣାପଡ଼ିଛି । ତେବେ ଦେବୀରଞ୍ଜନଙ୍କ ପିତା ବରିଷ୍ଠ ନେତା ପ୍ରଭାତ ତ୍ରିପାଠୀ ନିକଟରେ ଓଳାଶୁଣି ଗୁମ୍ଫାଠାରେ ଅମର ଶତପଥୀଙ୍କ ଭୋଜିରେ ଯୋଗ ଦେଇ ପାଣ୍ଡିଆନ ବିରୋଧୀ ମେଳିରେ ସାମିଲ ହେବାରୁ ତାଙ୍କୁ ଏହି ପଦବୀରେ ନରଖି ତାଙ୍କୁ କେବଳ ଛାତ୍ର ବ୍ୟାପାରର ସାଧାରଣ ସମ୍ପାଦକ ଦାୟିତ୍ୱ ନ୍ୟସ୍ତ ହୋଇଛି । ସେହିପରି ଭଦ୍ରକ ଜିଲ୍ଲା ରାଜନୀତି ସମୀକରଣ ପାଇଁ ବ୍ୟୋମକେଶଙ୍କୁ ମଧ୍ୟ ଯୁବ ସଭାପତି ପଦରୁ ହଟାଇ ଦିଆଯାଇଥିବା ଚର୍ଚ୍ଚା ହେଉଛି।
ଅରୁଣଙ୍କ ଦବଦବା
ଦଳର ବରିଷ୍ଠ ବିଧାୟକ ଅରୁଣ ସାହୁଙ୍କ ଖାସ୍ ଭାବେ ଯୁବ ଓ ଛାତ୍ର ସଂଗଠନ ଦାୟିତ୍ୱ ପାଇଥିବା ଉଭୟ ଚିନ୍ମୟ ସାହୁ ଓ ଇପସିତା ସାହୁ ଦଳୀୟ ମହଲରେ ପରିଚିତ । ଏହି ଦୁଇ ଜଣଙ୍କୁ ଦାୟିତ୍ୱ ଦେଇ ଅରୁଣଙ୍କ ତୁଣ୍ଡରେ ତୁଣ୍ଡି ବାନ୍ଧିବାକୁ ମଧ୍ୟ ପ୍ରୟାସ ହେଉଥିବା ଚର୍ଚ୍ଚା । ବିଗତ କିଛିମାସ ଧରି ଅରୁଣ ଗଣମାଧ୍ୟମରେ ବିଭିନ୍ନ ପ୍ରସଙ୍ଗରେ ବେଧଡ଼କ ମନ୍ତବ୍ୟ ରଖି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛନ୍ତି ।
