10/07/2024
नेपाल हादरनि कोशी राज्योनि गिबि मन्थ्रि हिकमत कुमार कार्किनो मेसे हारिनि बायदि जेंनाखौ सुफुंनो बर' रेबग्रा जथुमनि आफादगिरि राजेन बसुमतारी आरो मेसे समाज सिबियारि आफादनि आफादगिरि रन्जित कुमार मेसे बिथांमोना गोसोखां बिलाइ गथायदों ।
बिराट नगर, नेपाल
02/07/2024
नेपाल हादरनि कोशी राज्योनि ( प्रभिन्स) गिबि मन्थ्रिनो बर' रेबग्रा जथुम आरो नेपाल हादरनि मेसे समाज सिबियारि आफादा जथाइयै बर' मेसे हारिनि बायदि जेंनाखौ लानानै गोसोखां बिलाइ गथायो :
थावनि: मुख्यमन्त्री तथा मन्त्री परिषदको कार्यालय कोशी प्रदेश : बिराट नगर, नेपाल
अक्ट : 2 जुलाइ, मंगलबार, 2024
हानजाखौ दैदेनदोंमोन बर' रेबग्रा जथुमनि आफादगिरि राजेन बसुमतारी आरो नेपाल हादरनि मेसे समाज सिबियारि आफादनि आफादगिरि रन्जित कुमार मेसे बिथांमोना। हानजायाव बर' रेबग्रा जथुमनि आफादगिरि राजेन बसुमतारी, लेङाइ आफादगिरि सारदा प्रसाद मोसाहारी, गाहाइ नेहाथारि आनन्द राम औवारी, नेहाथारि सदानन्द दैमारी, आगु नेहाथारि उमेश ब्रह्म, लाइथुननि सेयारमेन कमलाकान्त बसुमतारी, रेबग्रा लाइसिनि आगु गाहाइ सुजुगिरि अरुन चन्द्र मोसाहारी, रेबग्रा लाइसिनि सुजुगिरि श्यामाचरण नार्जारी, नेपाल मेसे समाज सिबियारि आफादनि आफादगिरि रन्जित कुमार मेसे, गाहाइ नेहाथारि बिरेन मेसे आरो मावफुं आफादनि सोद्रोमा राजकुमार मेसे गासै सा 11 सोद्रोमा थानाय गोख्रों हान्जाया नेपाल हादरनि कोशी राज्योनि मानगोनां गिबि मन्थ्रि हिकमत कुमार कार्कि बिथांखौ कोशी राज्योनि राजथावनि बिराट नगर नगराव थानाय गिबि मन्थ्रि आरो मन्थ्रि परिषदनि मावख'आव लोगो हमनानै गोसोखां बिलाइ गथायो। गोसोखां बिलाइयाव मख'नाय गासै आयदानि सायाव नेपाल हादरनि कोशी राज्योनि गिबि मन्थ्रि मानगोनां हिकमत कुमार कार्कि बिथाङा मावफुंना होगोन होन्नानै जोंनो फोरमायथियो। बे बिथिङाव जोंखौ जेबो सिन्था खालामनो नाङा होन्नानै फोरमायथिदोंमोन। जों नेपाल हादरनि कोशी राज्योनि मानगोनां गिबि मन्थ्रि हिकमत कुमार कार्किनिसिम गोथौ सिबिनाय बाउदोंमोन। जिहेथु बर' मेसे रावखौ देबनागरि हांखोजों लिरो बेनि थाखाय नेपालाव बर' मेसे राव फोरोंनायाव जेबो जेंना सोमजिनाय नङा होन्नानै गेदेमा गिबि मन्थ्रि हिकमत कुमार कार्कि बिथाङा ओंथिगोनाङै बिबुंथियो।
* गोसोखां बिलाइयाव मख'नाय आयदाफ्रा जाबाय :
*1 मेसे हारिनो नेपाल सोरखारा साफ्रोम सुबुंनो दानफ्रोमबो होबोबाय थानाय 5000/ ( बा रोजा) रांखौ बारायनानै दानफायाव 10,000/ (जि रोजा) रां खालामनो ( अनसुंथाइ होनो) खावलायो।
*2 नेपालनि बर' मेसे समाजनि गोबां जेंना आरो हारिखौ जौगाहोनो थाखाय मावथांखि लानानै खमैबो 5 कौटि रां आलादायै बाजेट लानानै मावफुंनाय।
*3 बर' मेसे समाज सिबियारि आफादनि थाखाय बोसोरफ्रोमबो 10,00,000/( जि लाख) रां अनसुंथाइ होनाय।
* 4 झापा जिल्लानि हालदिबारियाव थानाय श्री महेन्द्र माध्यमिक बिद्यालय (गोजौ फरायसालि) आव मेसे राव फरायनो हानाय खाबु होनाय।
*5 मोन 10 बर' राव सोलोंथाइ मिरु गायसंनानै गासै सा 20 फोरोंगिरि थिसननाय आरो फोरोंथाइ होनाय।
*6 नेपालाव थानाय मेसे हारिनि हारिमुखौ रैखा खालामनो थाखाय झापा जिल्लानि जलधल गामि आरो धाइजान गामियाव खमैबो मोननै उइभिं सेन्टार गायसननाय एबा दानाय लुनायनि मिरु गायसंनाय।
*7 नेपालनि मेसे हारिखौ जौगाहोनो ' मेसे कमिउनिटि डेभेलपमेन्ट काउनसिल ' दानानै होनाय बेफोरनो गाहाइ।
कोशी राज्योनि मानगोनां गिबि मन्थ्रि बिथाङा बर' रेबग्रा जथुम आरो नेपाल हादरनि मेसे समाज सिबियारि आफादनि थान्दै हान्जाखौ जोबोद गोसो दुंब्रुदयै बरायदोंमोन आरो गावनो नेपाल हादरनि दोरोङारि खान्थिजों थान्दै हान्जाखौ नेपालनि फालि गांफा होनानै आरो लोगोसे बयखौबो नेपालनि दोरोङारि माला गानहोनानै बरायदोंमोन। बर' रेबग्रा जथुमनिफ्रायबो गेदेमा गिबि मन्थ्रि बिथांनो बर'नि नेर्सोनथि आर'नाइ गानहोनानै बर' रेबग्रा जथुमनि आफादगिरि राजेन बसुमतारी बिथाङा बरायदोंमोन। थान्दै हान्जाखौ नेपाल हादरनि झापा जिल्लानि भद्रपुरनिफ्राय सायख'जानाय कोशी राज्यो परिषदनि सोद्रोमा चुबि सुराज बिथाङाबो जोंनि थान्दै हान्जाखौ जोबोद मदद होफादोंमोन। गेदेमा बिथांनोबो बर' रेबग्रा जथुमनिफ्राय आफादगिरि राजेन बसुमतारी बिथाङा आर'नाइ गांसे बाउनानै मान जासियो।
कोशी राज्योनि मानगोनां गिबि मन्थ्रि हिकमत कुमार कार्कि बिथाङा मेसे समाज एबा मेसे हारिनि जेंनानि बागै बिबुंथि लाखिनो होनायाव बर' रेबग्रा जथुमनि आफादगिरि राजेन बसुमतारी बिथाङा जोबोद सुंथाबै बानबुंथि गोनां बिबुंथि लाखिदोंमोन। बर' रेबग्रा जथुमनि आफादगिरि राजेन बसुमतारी बिथाङा बर' मेसे हारिनि जारिमिनारि बिथिं, मेसे बर' हारिनि एखे धोरोम, आसारखान्थि थानाय, एखे राव रायज्लायनाय बागै फोरमायथियो। गोदोनि महाभारत, रामायण बिजाबमाफोराव बर' मेसे हारिखौ म्लेच्छ, किरात हारि होन्नानै फोरमायथिबोनाय बागै बिबुंथि लाखियो। जापान हादरनि मिमासाका इउनिभारसिटिनि भाइस सेन्सेलर गेदेमा स्कलार काजुयुकि किर्यु बिथाङा मेसे राव रिसार्स खालामफैनाय आरो मेसे रावनि सोदोब बिहुं (dictionary) सुजुनाय बागै फोरमायथियो। थारैनो मेसे हारिया नेपाल हादरनि थागिबि हारि । बिथांमोना बे नेपाल हादरावनो जिउ खुंना थानांगोन। मेसे हारिनो साफ्रोमनोबो दानफायाव 5000/ रां जिउ खांनो अनसुंथाइ होनाय थाखाय बिथां बसुमतारीया नेपाल हादरनि सोरखारखौ गोरबोजों सिबिनाय बाउनाय जासियो। जोंनि बर' हारिया गेदेमा नेपाल सोरखारखौ मेसे हारिनो जिउ खुंनो थाखाय आरोबाव साफ्रोमनोबो दानफायाव 5000/ बाहायना होनानै थामहिनबा साफ्रोमनोबो दानफायाव 10,000 ( जि रोजा) रां अनसुंथाइ होनो खावलायो। बर' रेबग्रा जथुमनि आफादगिरि राजेन बसुमतारी बिथाङा बर' रेबग्रा जथुमनि थांखि आरो नोजोरनि बागैबो बुंथियो। बर' रेबग्रा जथुमनि आफादगिरिनि बिबुंथिखौ कोशी राज्योनि मानगोनां गिबि मन्थ्रि बिथाङा जोबोद गोसो होनानै खोनासङो आरो गोजोन्नाय मोनो आरो साबायखर जासियो। बिथाङा थारैनो बर' मेसे हारिनि जेंनाफोरखौ मावना होगोन होन्नानै जोंनो फोरमायथिदोंमोन। थारैनो नेपाल हादरनि कोशी राज्योनि मानगोनां गिबि मन्थ्रि हिकमत कुमार कार्किजों बर' मेसे हारिनि बायदि जेंनाखौ लानानै गोसोखां बिलाइ गथायनानै सावरायनो मोन्नाया बर' रेबग्रा जथुम, मेसे समाज सिबियारि आफादनि थाखाय बाउनो हायि बिसम्बि जानानै थासिगोन। कोशी राज्योनि मानगोनां गिबि मन्थ्रि हिकमत कुमार कार्किजों जोंनि सावरायनाया जोबोद फिथाइलु गोनांमोन।
नेपाल हादरनि कोशी राज्यो ( प्रभिन्स ) :
* नेपाल हादरनि मोन 7 ( स्नि)राज्योनि मादाव कोशी राज्योआबो मोनसे।
* नेपाल हादरनि सानजाथाराव थानाय कोशी राज्योआ गाव खुंथाइ गोहो थानाय गंसे राज्यो (autonomous easternmost province ) । बे अटनमास राज्योखौ नेपाल सोरखारा संबिजिर बादियै 2015 मायथाइनि 20सेप्टेम्बरआव गायसंदोंमोन आरो 2023 मायथाइनि से मार्सआव कोशी मुं होनानै अटनमास राज्योखौ दायो। कोशी राज्योनि मुंखौ नेपाल हादरनि देरसिन दैमा कोशी दैमानि मुङै लाखियो।
* कोशी राज्योनि हा अरथाइ : 25,905 बर्ग किल'मिटार । नेपाल हादरनि हा बाहागोनि 17.5% बाहागो हा थानाय।
* राजथावनि : बिराट नगर
सुबुं अनजिमा : 4,961,412 (2021)
जिल्लानि अनजिमा : 14
पार्लियामेन्टरि अनजिमा: 28
प्रभिन्सियेल एसेमब्लि सिट : 56
कोशी राज्यो परिषदाव सायख'जानाय सोद्रोमा : 37
कोशी राज्योनि झापा जिल्लायाव बर' मेसेफ्रा जिउ खुंनानै दं। थारैनो कोशी राज्योया नेपाल हादरनि गंसे जोबोद समायना गेजोन राज्यो। *
