01/08/2026
जीवनात यशस्वी होण्यासाठी मनाचा भक्कम निर्धार हवा असतो. शिक्षण घेताना तरूण वयात अनेक मोहाचे क्षण येतात. त्यात अडकले तर जीवनाला प्रतिकूल कलाटणी मिळते. नैराश्य, व्यसनाधीनता, भाईगिरी हे जीवनाला उध्वस्त करतात. शिक्षण घेत असतांनाचे काही वर्ष जर मनोरंजन, मोबाईल, प्रेमप्रकरण, मौजमजा यापासून दूर राहिलो तर उर्वरीत जीवन आनंदाने व पाहिजे तसे जगता येते. मुलेमुली जर अभ्यासाचे कष्ट घेण्यास तयार असतील तर भविष्यात गोरेगरीब, खेडयातील शेतकरी, कष्टकऱ्यांच्या घरातील विद्यार्थी निश्चित अधिकारी होतील असे विचार मेहकरचे उपविभागीय पोलीस अधिकारी संतोष खाडे यांनी विवेकानंद कृषि महाविद्यालयात आयोजित कार्यक्रमात शनिवारी ता. १ रोजी अण्णाभाऊ साठे जयंतीनिमित्त बोलतांना व्यक्त केले. कार्यक्रमाच्या सुरूवातीला अण्णाभाऊ साठे, लोकमान्य टिळक, स्वामी विवेकानंद, प. पू. शुकदास महाराज यांच्या प्रतिमेचे प्रमुख पाहूण्याच्या हस्ते पूजन करून दिप प्रज्वलन करण्यात आले. संस्थेच्या वतीने उपाध्यक्ष अशोक थोरहाते यांनी त्यांचे महाविद्यालयात आगमन प्रसंगी स्वागत केले. कार्यक्रमाच्या प्रास्ताविकात संस्थेचे सचिव संतोष गोरे यांनी विद्यार्थ्यांना वेळावेळी प्रेरणा मिळावी व यशस्वी व्यक्तीमत्वाशी संवाद साधता यावा यासाठी महापुरूषांच्या जयंती, पुण्यतिथी निमित्त व्याख्यान आयोजित केल्या जाते असे सांगितले. यावेळी उपस्थित विद्यार्थ्यांकडून व्यसनमुक्तीची शपथ घेण्यात आली. कार्यक्रमात नशामुक्त युवक याविषयावर उत्कृष्ट लघुचित्रपट बनविण्याऱ्या जान्हवी वानखेडे, पल्लवी वरपे, पूजा सुरडकर यांची राज्यपातळीवर निवड झाल्याबद्दल सन्मान करण्यात आला. कार्यक्रमाला महसूल सहाय्यक बाजीराव सानप, कर सहाय्यक वैभव बडे व सुरेश खाडे तसेच कृषि व्यवसाय व्यवस्थापन महाविद्यालयाचे प्राचार्य मंगेश जकाते,महाविद्यालयाचे विद्यार्थी, प्राध्यापक मोठया संख्येने उपस्थित होते. कार्यक्रमाचे सूत्रसंचालन प्रा. समाधान जाधव यांनी केले.
