22/03/2015
Suarez goal thun hmangin El Clasico ah Barca in Real lakah hnena an chang
Barcelona chun La Liga hmațhuoitu inchu na ah Real Madrid chu Camp Nou ah an lo mikhuola, 2-1 a hnena changin points 4 in hma anțhuoi fal ta a ana chu game 10 lai khel ding a la um.
Hi match hmunuom um takah hin 1st half ah mikhuol team an tlangnel lema, chance khawm anin siem rawn hle. 12mins ah Ronaldo chun Banzema cross anthawk goal chungkhang an dengtir a, a goal teu hle. Real khelțhat laitak Barca in freekick an hmu a. Hi freekick hi Messi chun mawi takin a pet a, Mathieu chu chieng takin head goal in Casillas an ring hman nawh, a goal nal hle. Barca chun Real khelțhat laitak hma anthuoi.
Real in an nawr sunzawm zinga, 31mins ah an dit an hmu. Box sungah Banzema chun mawi takin Ronaldo ta dingin a kheng peka, Ronaldo chun chieng takin goal ah a sui lut. Real in an nawr sunzawm zinga, 40mins ah Ronaldo head pass Bale goal thun chu offside leiin pawm an nawh. 1st half ah Real an khelțha takzeta, ana chu goal khat ve ve thunin anin hnetawk.
2nd half an khel a, Real an khelțha nawk nghala. 48mins a Banzema shot chu ropui takin Bravo'n a save. Real an khelțha laitak 56mins ah centre lai anthawk Alves chun Suarez chu through ball a peka. Suarez hin box sungah khal pheiin Casillas man phak loin goal kil sirah a peta Barca bawkin hma anțhuoi nawk.
Hi zo hin chu Barca game khel a f*k țan a. Chance khawm țha tak tak anin siem nuol. Neymar in chance țha deu de vawi 2 lai a țhel a. Messi khawmin 73mins ah box puo char anthawkin goal a thun teu hle. 86mins ah Messi ball pek anthawk Jordy Alba in box sunga a shoot chu Casillas in pumin a lo dang hlau a. A goal teu hle. Hun tawp chen goal dang a lut ta naw a. Barca chun an hmelma Real Madrid lakah points 3 hlutak an hlawsuok.
A game hrim hrim hi anin hnetawk hle a. 1st half ah Real an khelțha a, 2nd half ah Barca an khelțha thung. A tu tu khawm hrat hai sien an phu ve ve niin an lang. 1st half ah Ronaldo a langsar vieu a. 2nd half a ruok chu Messi a langsar thung.
