22/07/2025
PRESS RELEASE
NO. 85/2025
Puhpa M. Laikaw, Hon'ble CEM ta Puhpa K.Thalau nata Laihsa Sonia Ruddy Azyu Châbu ropazy palâhâh
SIAHA, 22 Khihpa, 2025, Hriaheinoh - Atanoh dawh 11:00am khata Puhpa M. Laikaw, Hon'ble Chief Executive Member, MADC ta Puhpa K. Thalau châbu ropa "Mara reih - English Grammar Achuna Bu" nata Laihsa Sonia Ruddy Azyu châbu ropa "The Seeker's Odyssey (Journey)" zy cha Forest Hall, MADC Complex, Siaha liata zawpizy reih thei awpa ta aly kawpa ta a palâhâh.
Board of Mara Literature (BML) pachhuahpanohpa châbu palâhâhna programme he Puhpa K. Beingiachhie, Senior Education Officer (MS) & Secretary, BML, MADC ta chhihtha ta, Rev. K. Laichhua Azyu ta Biehrai, Ryhpachaneina 28:58 reina hneipa ta Khazohpa lâta daihti pavaosana thlahchhâna a hnei.
Puhpa M. Laikaw, CEM chata, "Mara reih ta châbu ropa, châbu rohtuhpazy ta riethei kawpa nata daihti hluhpi pahryuhpa ta nata ama lathli thata hmâh ta, châbu pha kawpazy roh ei ta, cha liata, châbu palâhâh daihti (châbu release programme) liata eima pua chyh thei dâh tyh hela, a pei hmeiseih. MADC liata hriapa Heads of Department (HoD) dâhdei hmahta hmia hmô awpa chyh kaw ei ta. He tawhta châbu release hei daihti liata la, a palâhâhtuhpa (release tuhpa) ta raopa ei châ khiahta la, BML chhihtuhpazy kha vaw ngia u la, MADC liata hriapazy ama pua pha nata pha lei attendance eima la bâ aw," a tah.
"Châbu pasôna châh pahno lei via ngâ kaw pi ta, a pei hmeiseih. A rohtuhpazy ta tha nah zâh, daihti hluhpi pahryuhpa ta nata patuapaluana, pachâna zydua hmâpa ta roh ei ta, ama roh khai tawhta Publication board liata hriapa expert zy ta papua tlâh a châ nata châ lei moh khai heih ei ta, papua tlâh a châpa kha, papuapa a vaw châ tyh. Keimo châbu roh thei hra leipazy pi ta, pasô thai ta, chalei ta, eima reih hluh lymâ awpa he a peimawh ngaita kaw," CEM ta a tah.
CEM chata, "Chi nah pho kaw laiseih lymâ n’awpa châta châbu phapa, Library liazy ta soh tlâhpa châbuzy he reih hluh ta pasô thai ta, Mara reih a kaw laiseih thei lymâ n’awpa ta Mara reih ta châbu apuapa he eima pasô thai lymâ awpa a byuh," a tah.
"Chi hro pho hrozy la ama chiheihpazy ta châbuzy ama papua khiahta la aly-ua thai kaw ei ta, hlasa thaipazy ama y khiahta la, amâ ly-ua thai kaw. Châbu rei eima thathi khiahta la, eima chi nah pho he laiseih thai ma pi. Mara reih ta châbu ropa chhao reih hoh lei, Mongyuh reih ta châbu ropa chhao reih hoh lei ta y thlâhpa cha, a pei hmeiseih. Atahmâ tawhta la, Mara reih ta châbu ropa he pasô thai bâ sih la, reih hluh bâ suh vy," CEM ta a tah.
Puhpa MH. Tiabi, EM i/c Edu. (M/S) nata BML Chairman chhaota biereina hnei hra ta, Khazohpa ta Mara reih miah pie ta, pasô thai suh vy. Mara reih eima cheih vâ deita ta na MADC piepa eima châ. Mara reih ta châbu ropazy pasôna châh pahno sih la, eima o chhôh, khôtho lâ chhao Mara reih chei hluh lymâ suh vy, tahpa ta zawpi hnohta ahawna a tao.
Laihsa Femina Hlychho ta Laihsa Sonia Ruddy Azyu châbu ropa 'The Seeker's Odyssey (Journey)' saichhieliena a hnei.
He châbuzy palâhâhna liata Elected Office Holders, MADC hry tawhta Puhpa C. Chehnei, Deputy Chairman, MADC nata Puhpa Beihu Nohro, Deputy Chief Whip, MADC zy ta CEM he amâ tyudualâh.
Zawpi châbu palâhâhna su liata avypakhypazy cha Laihsa Priscilla Nôtlia ta pahnie kawpa ta hlasapa ta a palôhpahawh ei.
Puhpa K. Thalau, Mawhrei nata Puhpa A. Arawna, F/o Laihsa Sonia Ruddy Azyu zy ta châbu palâhâhna liata avaw hlaopazy hnohta alynabie reina ama hnei khai nahta Abeipa Thlahchhâna reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
