17/10/2025
*सांसद राजु बिष्टको कार्यालय*
*प्रेस विज्ञप्ति*
*१७ अक्टोबर, २०२५*
हाम्रो क्षेत्रको लागि स्थायी समाधान सम्बन्धित वार्तालाई अगाड़ि बढ़ाउन भारतका राष्ट्रीय सुरक्षा उपसल्लाहकार (Dy-NSA) रहनुभएको श्री पंकज कुमार सिंह, आईपीएस(सेवानिवृत्त) लाई इन्टरलोक्युटर नियुक्त गरिएको घोषणाका लागि दार्जिलिङ पहाड़, तराई अनि डुवर्सका जनताको तर्फबाट म आदरणीय प्रधानमन्त्री श्री नरेन्द्र मोदीज्यू र माननीय गृहमन्त्री श्री अमित शाहज्यूप्रति हार्दिक कृतज्ञता टक्र्याउँदछु।
हाम्रो क्षेत्रको इतिहासमा पहिलोपटक हामी कुनै रक्तपात, राजनीतिक अशान्ति, वा एउटा पनि ज्यान नगुमाइकन इन्टरलोक्युटरको नियुक्तिको चरणमा पुगेका छौँ। हाम्रोलागि, यो दार्जिलिङ पहाड़, तराई अनि डुवर्स क्षेत्रका जनताको एक उल्लेखनीय विजयको द्योतक हो। मेरो सदादेखि विश्वास रहिआएको छ कि दिगो राजनीतिक समाधानको मार्ग वार्तालाप अनि शान्तिको मार्गद्वारा प्रशस्त हुनु आवश्यक छ।
इन्टरलोक्युटरको नियुक्तिले हाम्रो क्षेत्रका जनताका आकांक्षाहरूको सम्बोधनको दिशामा एक महत्त्वपूर्ण पाइलोलाई दर्शाउँछ। इन्टरलोक्युटरको भूमिकाले हाम्रो क्षेत्रका राजनीतिक प्रतिनिधिहरू लगायत सबै सरोकारवालाहरूमाझ वार्ताको मार्ग प्रशस्त गर्नेछ।
माननीय प्रधानमन्त्री श्री नरेन्द्र मोदीज्यूको अगुवाईमा भाजपा नेतृत्ववादी एनडीए सरकारले हाम्रो राष्ट्र समक्ष रहेका अनेकौँ संवेदनशील मुद्दाहरूको सम्बोधन र समाधान गरेको छ। “सबका साथ सबका विकास” एउटा नारामात्रै नभएर हाम्रो सरकारको मूल सिद्धान्त हो। वार्तालाई अगाड़ि बढ़ाउन अनि हाम्रो सामाजिक-आर्थिक उन्नति, सांस्कृतिक मान्यता, हाम्रो सांस्कृतिक विरासतको संरक्षण, अनि संवैधानिक ढाँचाअन्तर्गत हाम्रा आकांक्षाहरूको सम्बोधन गर्न इन्टरलोक्युटरको नियुक्ति एक स्वागतनीय पाइलो हो। सबै इस्टेकहोल्डरहरूलाई यसप्रकार सकारात्मक ढङ्गमा संलग्न गरिनुले समावेशी शासन र केन्द्रीय सरकारद्वारा पटक-पटक प्रदर्शित राष्ट्रीय एकीकरणप्रति वचनबद्धतालाई झल्काउँछ।
भारतका राष्ट्रीय सुरक्षा उपसल्लाहकार (Dy-NSA) समेत रहनुभएको श्री पंकज कुमार सिंहलाई इन्टरलोक्युटरको रूपमा नियुक्त गरिनाले एकपटक फेरि राष्ट्रीय सुरक्षाको दृष्टिले हाम्रो क्षेत्रको महत्त्वलाई रेखाङ्कित गर्दछ।
हामीलाई पूर्ण आशा छ कि सबै इस्टेकहोल्डरहरू इन्टरलोक्युटरसँग सकारात्मक ढङ्गले संलग्न हुनेछन्, अनि हाम्रो क्षेत्रका स्थायी समाधानको लागि अन्तिम पाइलो सार्ने दिशामा काम गर्नेछन्।
दार्जिलिङ पहाड़, तराई अनि डुवर्सका जनताका मुद्दा अनि आकांक्षाहरूलाई लिएर लामो समयदेखि चलिआएको संघर्षमा आफ्नो तन-मन-धन अर्पण गरेका हाम्रा असंख्य सङ्ग्रामी एवम् शहीदहरूको योगदान र बलिदान, अनि संवैधानिक ढाँचाअन्तर्गत स्थायी राजनीतिक समाधानको लागि हामी र हाम्रा गठबन्धन साथीहरूको निरन्तर प्रयत्नको परिणामस्वरूप निर्णायक मोडमा आइपुगेका छौँ जुन हाम्रा मुद्दाहरूको समाधानको दिशामा अंन्तिम खुड़किलो हो।
इन्टरलोक्युटरले वार्तालाई ठोस परिणामतिर लैजान, अनि भावी पिँढ़ीहरूको उज्ज्वल भविष्यको मार्ग प्रशस्त गर्न निर्णायक भूमिका निर्वाह गर्नुहुनेछ भन्ने हामीलाई पूर्ण आशा र विश्वास छ।
*राजु बिष्ट*
*लोकसभा सांसद दार्जिलिङ एवं*
*राष्ट्रीय प्रवक्ता, भारतीय जनता पार्टी*
