17/09/2025
📩Honoring U Abishag Bawi Hlei Iang: A Blessing in My Life
Tuzaan cu ka u zong a si i ka hawikom ṭha zong a simi U Abi ka upatnak le ka uarnak kong ka rak ṭial lai.
Pathian nih hawikom ṭha hi tampi a ka pek, an nih hna kong zong ka rak post tawn te lai🤍
Minung hi ( a bik in Nu pawl hi ) kan i komh/theih deuhdeuh ah kan ziaza kan i thei deuhdeuh ve tawn i, kan theih hlan hna ah kan rak uar tuk mi hna zong khi a hnu ah uar ti lo tbk khi kan hmang tawn.
Asinain theih hnu le komh hnu ah an ziaza kan uar chinchin mi hna zong an tampi ve.
Cu hna lak ah U Abi kong, ka uar tuk nak kong te ka rak ṭial ta lai..
A pakhatnak bik ah cun a nunnak ah Pathian a duh, Pathian a ṭih timi hi ka hmuh khawh.
Amah he Pathian ṭhatnak kong kan chim hin cun a d**gh in a d**g kho tawn lo. Pathian a thangṭhat tik zong ah aa biatak. Bia kan i ruah ah a tambik cu Pathian ṭhatnak kong hi a si ko❤️ A sin um cu zeitluk in dah thinlung a hei dam mu !
Cun a sin ka um ah hin mikong ceih le mi thangchiat a hmang bel lo , mi ṭhatlonak a chim hi tutiang ah voikhat te zong ka thei bak lo.
Keimah nih ka chim sual tawn zong ah khin a ṭhatnak lei in a ka merh piak tawn.Bia a chim paoh ahhin a ṭhatnak lei hoih in chim aa zuam zungzaal. A aw a nem i biachim holh rel zong a thiam fawn. A naal fawn lo. Bia-eng le biafak in mi a ti ka thei bel lo. Midang nih fak nawn i an ti caan zong ah khin, a thinhang bak cang lai tiah ka ruah caan zong ah khin, nem tein le a ṭhatnak lei in a leh peng hna.
A hawikom siseh , a rian ṭuanṭi hawi si hna seh, an ṭhatlonak a chim ka thei bel lo. A sin rianṭuan a nuam. A rian ah a lung a pek, a teima , aa zuam.
Ṭhancho a duh mi a si , thachiatnak lei in bia a chim bel lo. Cawnnak zong a duh mi a si, fimnak zong Pathian nih a pek. A ruahnak a kau i a lung a thiang fawn. Nun zong a siang.
Ṭial ding hi tamtuk te ka ngei nain hi vial hi si rih seh law, a tu i a konglam ka ṭialmi hi keimah nih ka hmuhnak kong ka ṭial mi a si. A ziaza 100 ah 100 a si ka tinak a si lo.
Kan minung hawi hna hi kan nunlio ah cawisang in an ṭhatnak hi chim ko hna usih. Thih hnu ruak cung i va cawisan le va dawt kha san a tlai ti lo.
Pathian nih hin thluachuah hi a phunphun in a kan pek. Cu hna lakah hawikom ṭha hi a sunglawi tuk mi thluachuah an rak si ve.
“Ṭha chin pakhat hnu pakhat rel tuah”❤️
Appreciating Her Kindness, Faith, and Light 🪄
